તેહરાન : ઈરાન અને અમેરિકા વચ્ચે તણાવ એકવાર ફરી ચરમસીમાએ પહોંચ્યો છે, જ્યાં ઈરાની સેનાના ખાતમ અલ-અનબિયા સેન્ટ્રલ હેડક્વાર્ટર્સે અમેરિકાને કડક ચેતવણી આપી છે કે જો તેહરાન વિરુદ્ધ કોઈ પણ સૈન્ય પગલું ભરવામાં આવશે તો પશ્ચિમ એશિયામાં હાજર તમામ અમેરિકી સૈન્ય અને તેના હિતોને નિશાન બનાવવામાં આવશે. ઈરાને સ્પષ્ટ કર્યું છે કે તે યુદ્ધ શરૂ કરવા માંગતું નથી, પરંતુ કોઈપણ આક્રમક કાર્યવાહીની સ્થિતિમાં જડબાતોડ જવાબ આપવા માટે સંપૂર્ણ રીતે તૈયાર છે.

આ ગંભીર સ્થિતિ વચ્ચે વ્યૂહાત્મક રીતે અત્યંત મહત્ત્વપૂર્ણ ગણાતા સ્ટ્રેટ ઓફ હોર્મુજ ખાતે તણાવ ચરમસીમાએ છે, કારણ કે આ જળમાર્ગ વૈશ્વિક તેલ અને ગેસ સપ્લાય માટે જીવાદોરી સમાન છે. ઈરાને અમેરિકા સમક્ષ એક પ્રસ્તાવ મૂક્યો છે કે જો અમેરિકા સૈન્ય દબાણ ઓછું કરે, પોર્ટ્સની નાકાબંધી હટાવે અને તેલ પરના પ્રતિબંધો દૂર કરે, તો તે સાત દિવસની અંદર આ જળમાર્ગ ખોલી શકે છે અને ન્યુક્લિયર પ્રોગ્રામ પર વાતચીત ફરી શરૂ કરી શકે છે.

વોલ સ્ટ્રીટ જર્નલના અહેવાલ મુજબ, યુએસ પ્રમુખ ડોનાલ્ડ ટ્રમ્પે ઈરાનનો આ પ્રસ્તાવ ફગાવી દીધો છે, જોકે આ અંગે અમેરિકી સરકાર તરફથી કોઈ અધિકૃત પુષ્ટિ કરવામાં આવી નથી અને તેહરાન હાલ વોશિંગ્ટનના આગામી સત્તાવાર પ્રતિસાદની રાહ જોઈ રહ્યું છે. ઈરાને એવા દેશોને પણ ચેતવણી આપી છે કે જે કોઈપણ અમેરિકી લશ્કરી અભિયાનને મદદ કરશે, જેનાથી સમગ્ર ક્ષેત્રમાં સંઘર્ષ વકરવાની દહેશત ઊભી થઈ છે.

આ ભૂતકાળની કડીઓ અને વર્તમાન તણાવને ધ્યાનમાં લેતા, વૈશ્વિક મહાસત્તાઓ અને મધ્ય પૂર્વના દેશોની નજર હવે અમેરિકાના આગામી પગલાં અને સ્ટ્રેટ ઓફ હોર્મુજની સ્થિતિ પર છે. જો આ મામલે રાજદ્વારી સ્તરે કોઈ સમાધાન નહીં આવે, તો વૈશ્વિક ઊર્જા બજાર અને આંતરરાષ્ટ્રીય સુરક્ષા માટે ગંભીર પરિણામો સર્જાઈ શકે છે.