તેહરાન:  ઈરાન અને અમેરિકા વચ્ચેનો સંઘર્ષ હવે ચરમસીમાએ પહોંચ્યો હોય તેવું લાગી રહ્યું છે. પિતાની હત્યા બાદ સત્તા સંભાળનારા ઈરાનના નવા સુપ્રીમ લીડર મોજતબા ખામેનીએ અમેરિકાને ધમકીભર્યા સૂરમાં જણાવ્યું છે કે પર્સિયન ગલ્ફમાં વિદેશી શક્તિઓ માટે માત્ર એક જ જગ્યા બાકી છે, અને તે છે દરિયાના પાણીનું ઊંડાણ. હજારો કિલોમીટર દૂરથી લોભી ઈરાદાઓ સાથે આવતા અમેરિકા જેવા દેશોને ચેતવણી આપતા ખામેનીએ સ્પષ્ટ કર્યું છે કે ઈરાન પોતાના પડોશી દેશો સાથે મળીને એક સામાન્ય ભવિષ્ય ધરાવે છે અને બહારની કોઈ શક્તિ અહીં હસ્તક્ષેપ કરશે તો તેને ડૂબાડી દેવામાં આવશે.

આક્રમક નિવેદન આપતા ખામેનીએ વધુમાં જણાવ્યું હતું કે ઈરાન હવે પ્રાદેશિક અને વૈશ્વિક વ્યવસ્થાના એક નવા જ અધ્યાયમાં પ્રવેશ્યું છે. ખાસ કરીને પરમાણુ અને મિસાઈલ ક્ષમતાઓ અંગે વાત કરતા તેમણે મક્કમતાથી કહ્યું કે ઈરાન પોતાની રક્ષણાત્મક શક્તિઓનું કોઈ પણ ભોગે રક્ષણ કરશે. અમેરિકા સાથેના કોઈ પણ કરારમાં આ મુદ્દાઓ હંમેશા વિવાદનું કેન્દ્ર રહ્યા છે, પરંતુ ઈરાને સ્પષ્ટ કરી દીધું છે કે તે પોતાની લશ્કરી ક્ષમતાઓમાં સહેજ પણ પીછેહઠ કરશે નહીં. આ નિવેદન એવા સમયે આવ્યું છે જ્યારે ડોનાલ્ડ ટ્રમ્પ ઈરાની બંદરો પર લાંબા ગાળાની નાકાબંધી લાદીને ઈરાનને વાટાઘાટો માટે દબાણ કરવાની તૈયારી કરી રહ્યા છે.

રાજદ્વારી મોરચે પણ ગરમાવો જોવા મળી રહ્યો છે, કારણ કે અમેરિકી વિદેશ મંત્રી માર્ક રુબિયોએ તાજેતરમાં જ ખામેનીની ધાર્મિક લાયકાત અને તેમના જીવંત હોવા અંગે સવાલો ઉઠાવ્યા હતા. તેના જવાબમાં ખામેનીએ લેખિત સંદેશાઓ દ્વારા પોતાની હાજરી અને મક્કમતાની પ્રતીતિ કરાવી છે. ટ્રમ્પ પ્રશાસન જે રીતે ઈરાનને આર્થિક અને સૈન્ય રીતે ભીંસમાં લેવાનો પ્રયાસ કરી રહ્યું છે, તેની સામે ઈરાને "યુદ્ધ અથવા વિનાશ" જેવી ભાષાનો ઉપયોગ કરીને વિશ્વભરમાં તણાવ વધારી દીધો છે. હવે જોવાનું એ રહેશે કે હોર્મુઝ અને પર્સિયન ગલ્ફની આ નાકાબંધી વિશ્વની શાંતિ પર કેવી અસર કરે છે.