ઈરાનના વિદેશ મંત્રીનું દિલ્હીમાં આગમનઃ જયશંકર સાથે કરશે મહત્વપૂર્ણ મુલાકાત
બ્રિક્સ બેઠકમાં આપશે હાજરીઃ ‘હોર્મુઝ સ્ટ્રેટ' અને ઉર્જા સુરક્ષા જેવા સળગતા મુદ્દાઓ પર થશે મંથન
નવી દિલ્હી, તા.૧૪: ઈરાનના વિદેશ મંત્રી સૈયદ અબ્બાસ અરાઘચી બ્રિક્સ વિદેશ મંત્રીઓની બેઠક માટે નવી દિલ્હી પહોંચ્યા છે, જે એક અત્યંત ભાવુક અને શક્તિશાળી સંદેશ સાથેની મુલાકાત બની રહી છે. અરાઘચી ‘મિનાબ-૧૬૮' નામના વિમાનમાં દિલ્હી ઉતર્યા હતા, જે ઈરાનના મીનાબ શહેરમાં એક શાળા પર થયેલા મિસાઈલ હુમલામાં જીવ ગુમાવનારી ૧૬૮ માસૂમ બાળકીઓનું પ્રતીક છે. યુદ્ધની આ કરૂણ યાદ અપાવતા વિમાનમાં તેમનું આગમન વિશ્વ માટે એક સૂચક સંદેશ છે. ભારત તરફથી વિદેશ મંત્રાલયના પ્રવક્તા રણધીર જયસ્વાલે તેમનું ઉષ્માભર્યું સ્વાગત કર્યું હતું.
આ મુલાકાતનો મુખ્ય એજન્ડા વિદેશ મંત્રી એસ. જયશંકર સાથેની દ્વિપક્ષીય વાટાઘાટો છે, જેમાં વૈશ્વિક અર્થતંત્રની જીવાદોરી સમાન ‘હોર્મુઝ સ્ટ્રેટ' પર ચર્ચા કેન્દ્રસ્થાને રહેશે. વિશ્વના કુલ તેલ પુરવઠાનો ૨૦્રુ હિસ્સો આ માર્ગેથી પસાર થાય છે, અને હાલના તણાવમાં તેના બંધ થવાની આશંકાએ ભારત સહિત સમગ્ર વિશ્વની ઊર્જા સુરક્ષા પર જોખમ ઊભું કર્યું છે. ભારત આ બેઠકમાં વેપારી જહાજોના સલામત માર્ગ અને પ્રાદેશિક સ્થિરતા માટે ઈરાન સમક્ષ મજબૂત રજૂઆત કરે તેવી શકયતા છે.
બ્રિક્સના સભ્ય દેશોના પ્રતિનિધિઓ વડાપ્રધાન નરેન્દ્ર મોદીને પણ મળશે, જ્યાં મધ્ય પૂર્વના સંઘર્ષની વૈશ્વિક સપ્લાય ચેઇન પર થતી અસરો અંગે મંથન થશે. ઈરાનના નાયબ વિદેશ મંત્રી કાઝેમ ઘરીબબાદીએ સ્પષ્ટ કર્યું કે બ્રિક્સ જેવું મંચ ઈરાન માટે એકપક્ષીય પ્રતિબંધો સામે લડવા અને ન્યાયી આંતરરાષ્ટ્રીય વ્યવસ્થા સ્થાપિત કરવા માટેની સુવર્ણ તક છે. ભારત અત્યારે બ્રિક્સના અધ્યક્ષ તરીકે સભ્ય દેશો વચ્ચેના મતભેદો ઉકેલીને એક સર્વસંમત માર્ગ શોધવા માટે મહત્વપૂર્ણ ભૂમિકા ભજવી રહ્યું છે.(
(4:00 PM IST)
છેલ્લા 8 દિવસમાં સૌથી લોકપ્રિય 
