તેહરાન:  મધ્ય-પૂર્વના રાજકારણમાં ફરી એકવાર યુદ્ધના વાદળો ઘેરાવા લાગ્યા છે. અમેરિકાના રાષ્ટ્રપતિ ડોનાલ્ડ ટ્રમ્પના આક્રમક વલણ સામે ઈરાને હવે ખુલ્લેઆમ મોરચો માંડ્યો છે. ઈરાની લશ્કરી મુખ્યાલયના નાયબ વડા મોહમ્મદ જાફર અસાદીએ એક સનસનાટીભર્યું નિવેદન આપતા કહ્યું છે કે અમેરિકા ક્યારેય કોઈ સંધિ કે કરાર પ્રત્યે વફાદાર રહ્યું નથી. તેમણે સ્પષ્ટ ચેતવણી આપી છે કે જો અમેરિકા કોઈ પણ પ્રકારની 'મૂર્ખાઈ' કે નવી લશ્કરી કાર્યવાહી કરવાનો પ્રયાસ કરશે, તો ઈરાની સશસ્ત્ર દળો તેનો સામનો કરવા માટે સંપૂર્ણપણે સજ્જ અને સતર્ક છે. ઈરાનનો આ રણકાર એવા સમયે આવ્યો છે જ્યારે ટ્રમ્પે ઈરાન સાથેના નવા કરારના પ્રસ્તાવને ઠુકરાવી દીધો છે.

ડોનાલ્ડ ટ્રમ્પે વ્હાઇટ હાઉસથી ફ્લોરિડા જવા રવાના થતી વખતે ઈરાન પર આકરા પ્રહારો કર્યા હતા. તેમણે દાવો કર્યો હતો કે ઈરાનનું નેતૃત્વ અત્યારે આંતરિક રીતે વિખેરાયેલું છે અને તેઓ એવી શરતો મૂકી રહ્યા છે જે અમેરિકાને મંજૂર નથી. ટ્રમ્પે અત્યંત કડક શબ્દોમાં કહ્યું કે, "કોઈ પણ સંજોગોમાં ઈરાન પરમાણુ શસ્ત્રો મેળવી શકશે નહીં." તેમના મતે, જો અમેરિકાએ ઈરાન સામે કડક કાર્યવાહી ન કરી હોત, તો આ 'પાગલો'ના હાથમાં પરમાણુ બોમ્બ આવી ગયો હોત, જે ઇઝરાયલ અને સમગ્ર યુરોપના વિનાશનું કારણ બનત. ટ્રમ્પના આ નિવેદને પેન્ટાગોનથી લઈને તેહરાન સુધી હલચલ મચાવી દીધી છે.

બીજી તરફ, ઈરાને અમેરિકાની આ રણનીતિને માત્ર મીડિયા સ્ટંટ ગણાવ્યો છે. અસાદીના મતે, અમેરિકન અધિકારીઓ માત્ર તેલના ભાવમાં ઘટાડો રોકવા અને પોતાની આંતરિક સમસ્યાઓ પરથી ધ્યાન ભટકાવવા માટે આવા ઉશ્કેરણીજનક નિવેદનો આપી રહ્યા છે. જોકે, ટ્રમ્પે અગાઉ એવો પણ દાવો કર્યો હતો કે યુદ્ધવિરામ બાદ સંઘર્ષ પૂરો થયો છે, પરંતુ તેમની 'પરમાણુ શસ્ત્રો' વાળી ટિપ્પણીએ ફરી જૂની દુશ્મની પર કેરોસીન છાંટવાનું કામ કર્યું છે. હવે જોવાનું એ રહેશે કે આ શબ્દોની લડાઈ ક્યારે રણભૂમિ સુધી પહોંચે છે કે પછી રાજદ્વારી સ્તરે કોઈ નવો વળાંક આવે છે.