તહેરાન:  મધ્ય પૂર્વના યુદ્ધ મેદાનમાં ઈરાને પોતાનું સૌથી ઘાતક અને અદ્યતન હથિયાર મેદાનમાં ઉતારીને પશ્ચિમી દેશો અને ખાસ કરીને અમેરિકી સૈન્ય છાવણીઓમાં ભારે ખળભળાટ મચાવી દીધો છે. ઈરાનના 'ઇસ્લામિક રિવોલ્યુશનરી ગાર્ડ કોર્પ્સ' એ દાવો કર્યો છે કે તેમણે 'હદીદ-૧૧૦'  નામના આત્મઘાતી સ્ટીલ્થ ડ્રોનનું નવું વર્ઝન વિકસાવીને તેને અમેરિકી યુદ્ધ જહાજો અને લશ્કરી અડ્ડાઓ તરફ દાગ્યું છે. સામાન્ય રીતે ડ્રોન ધીમી ગતિએ ચાલતા પ્રોપેલરથી સજ્જ હોય છે, પરંતુ આ નવું 'હદીદ-૧૧૦' ટર્બોજેટ એન્જિન સાથે આવે છે જે ૫૧૦ કિલોમીટર પ્રતિ કલાકની ભયાનક ટોચની ઝડપ પ્રાપ્ત કરી શકે છે. આટલી પ્રચંડ ઝડપ અને વિશિષ્ટ બનાવટને કારણે પશ્ચિમી એર ડિફેન્સ સિસ્ટમ્સ અને રડાર માટે તેને શોધીને તોડી પાડવું લગભગ અશક્ય બની ગયું છે.

આ ડ્રોનની ખરી તાકાત માત્ર તેની સ્પીડ જ નહીં પરંતુ તેની અદ્રશ્ય રહેવાની 'સ્ટીલ્થ ટેકનોલોજી' છે. ડ્રોનની ડિઝાઈનમાં ઉપરની તરફ 'S-આકાર'નું એર ઇન્ટેક આપવામાં આવ્યું છે, જેથી એન્જિનના બ્લેડ રડાર સિગ્નલોથી છુપાયેલા રહે. આ ઉપરાંત તેના પર ખાસ રડાર-એબ્ઝોર્બિંગ મટિરિયલનું કોટિંગ કરવામાં આવ્યું છે. ૩૫૦ કિલોમીટરની રેન્જ ધરાવતું આ ડ્રોન પોતાના સાથે ૩૦ કિલોગ્રામ જેટલો ઘાતક વિસ્ફોટક પદાર્થ લઈ જઈ શકે છે અને લગભગ એક કલાક સુધી હવામાં ઘુમરાઈને ચોક્કસ લક્ષ્ય પર ત્રાટકી શકે છે. પશ્ચિમી પ્રતિબંધો છતાં ઈરાને આ સ્વદેશી ટેકનોલોજી વિકસાવીને સૈન્ય ક્ષેત્રે પોતાની ક્ષમતાનો સજ્જડ પુરાવો આપ્યો છે, જોકે નિષ્ણાતો તેમાં ચીન અને રશિયાની પરોક્ષ મદદ હોવાની પણ આશંકા વ્યક્ત કરી રહ્યા છે.

સૌથી રસપ્રદ વાત એ છે કે આ સુપર-ફાસ્ટ સ્ટીલ્થ ડ્રોનના ક્ષેત્રમાં પ્રવેશતા જ છેલ્લા બે અઠવાડિયાથી ચાલી રહેલા યુએસ-ઈરાન વચ્ચેના ભીષણ હુમલાઓ અચાનક રોકાઈ ગયા છે. કોઈપણ સત્તાવાર યુદ્ધવિરામ વિના બંને દેશો વચ્ચે હાલમાં એક અઘોષિત શાંતિ છવાઈ ગઈ છે. અમેરિકી સત્તાધીશો અને પ્રમુખ ડોનાલ્ડ ટ્રમ્પ આ વિરામને વાટાઘાટો માટેનો સમય ગણાવી રહ્યા છે, જ્યારે ઈરાને સ્પષ્ટ ચીમકી આપી છે કે યુદ્ધની શરૂઆત અને અંત ક્યારે થશે તેનો નિર્ણય અમેરિકા નહીં કરે. આ સ્થિતિ વચ્ચે 'હદીદ-૧૧૦' ડ્રોને IRGC ની શક્તિમાં મોટો વધારો કર્યો છે અને મધ્ય પૂર્વમાં સત્તાનું સંતુલન ઈરાન તરફ નમાવી દીધું છે.