અમદાવાદ: લોકશાહી વ્યવસ્થામાં ચૂંટણી પ્રક્રિયાની પારદર્શિતા, વિશ્વસનીયતા અને જવાબદેહીને વધુ સુદૃઢ કરવાના ઉદ્દેશ સાથે મુખ્ય નિર્વાચન અધિકારી, ગુજરાતની કચેરી દ્વારા આગામી ૨૧ જુલાઈ, ૨૦૨૬ના રોજ નિરમા યુનિવર્સિટી, અમદાવાદ ખાતે “Electoral Transparency: Political Parties as Concurrent Auditors” વિષય પર એક ભવ્ય આંતરરાષ્ટ્રીય વિષયક પરિસંવાદ (Thematic Symposium) યોજવામાં આવશે. આ ઉચ્ચ સ્તરીય પરિસંવાદનું આયોજન ઇન્ડિયા ઇન્ટરનેશનલ ઇન્સ્ટિટ્યૂટ ઑફ ડેમોક્રસી એન્ડ ઇલેક્શન મેનેજમેન્ટ (IIIDEM), નવી દિલ્હી સહિતની વિવિધ પ્રતિષ્ઠિત સંસ્થાઓના સંયુક્ત સહયોગથી કરવામાં આવી રહ્યું છે.

દેશ-વિદેશના ઉચ્ચ અધિકારીઓ અને કાયદા ક્ષેત્રના અગ્રણીઓ ઉપસ્થિત રહેશે:

આ આંતરરાષ્ટ્રીય પરિસંવાદમાં ગુજરાતના મુખ્ય નિર્વાચન અધિકારી સંદીપ સાગળે (IAS), રાજસ્થાનના મુખ્ય નિર્વાચન અધિકારી નવીન મહાજન (IAS) તેમજ છત્તીસગઢના ચૂંટણી તંત્રના ઉચ્ચ પ્રતિનિધિઓ વિશેષ રૂપે ઉપસ્થિત રહેશે. વૈશ્વિક સ્તરે ચૂંટણી પ્રક્રિયાના અનુભવોની આપ-લે કરવા માટે ફિલિપાઇન્સના ચૂંટણી વ્યવસ્થાપન ક્ષેત્રના પ્રતિનિધિઓ પણ આ મંચ પર સહભાગી થવાના છે. આ ઉપરાંત, દેશની વિવિધ પ્રતિષ્ઠિત કાયદા યુનિવર્સિટીઓના કુલપતિઓ, રજિસ્ટ્રાર, શિક્ષણવિદો, સંશોધકો, કાનૂની ક્ષેત્રના નિષ્ણાતો તથા ચૂંટણી વ્યવસ્થાપન સાથે સીધી રીતે સંકળાયેલા ઉચ્ચ અધિકારીઓ પણ ઉપસ્થિત રહીને પોતાના વિચારો રજૂ કરશે.

રાજકીય પક્ષો ચૂંટણી પ્રક્રિયાના "Concurrent Auditors":

આ પરિસંવાદનો કેન્દ્રવર્તી વિચાર એ છે કે રાજકીય પક્ષો ચૂંટણીમાં માત્ર એક સ્પર્ધક તરીકે જ નહીં, પરંતુ સમગ્ર ચૂંટણી પ્રક્રિયાના વિવિધ તબક્કાઓમાં ખૂબ મહત્વપૂર્ણ હિતધારક અને નિરીક્ષક તરીકેની ભૂમિકા ભજવે છે. મતદાર યાદીની તૈયારીથી લઈને મતદાન, મતગણતરી અને પરિણામો જાહેર કરવાની પ્રક્રિયા સુધી રાજકીય પક્ષોના અધિકૃત પ્રતિનિધિઓ અને એજન્ટોની પ્રત્યક્ષ ઉપસ્થિતિ ચૂંટણી પ્રક્રિયાની સતત દેખરેખ અને ચકાસણીમાં મહત્વપૂર્ણ યોગદાન આપે છે. આ પરિપ્રેક્ષ્યમાં રાજકીય પક્ષોની ભૂમિકાને “Concurrent Auditors” એટલે કે ચૂંટણી પ્રક્રિયાની સમાંતર અને સતત ચકાસણી કરનારા હિતધારકો તરીકે વધુ અસરકારક રીતે સમજવા અને વિકસાવવા અંગે પરિસંવાદમાં વિશેષ વિચારમંથન કરવામાં આવશે.

પાંચ મહત્વપૂર્ણ વિષયો પર અલગ-અલગ સત્રોમાં ગહન ચર્ચા થશે:

પરિસંવાદ દરમિયાન પાંચ અત્યંત મહત્વપૂર્ણ અને સમકાલીન વિષયો પર અલગ-અલગ સત્રોમાં ગહન ચર્ચા-વિચારણા કરવામાં આવશે, જેમાં નીચે મુજબના મુદ્દાઓનો સમાવેશ થાય છે:

  સંસ્થાકીય માળખું, તટસ્થતા અને રાજકીય પક્ષ આધારિત દેખરેખ.

  સમગ્ર ચૂંટણીચક્ર દરમિયાન ચકાસણીની સાતત્યતા અને તેમાં રહેલી ખામીઓ.

  પારદર્શિતા, વિશ્વાસ અને રાજકીયકરણનું જોખમ.

  ટેક્નોલોજી આધારિત ચૂંટણી વ્યવસ્થામાં Auditability (ચકાસણીક્ષમતા).

  નિરીક્ષણથી લઈને જવાબદેહી સુધીની સમગ્ર પ્રક્રિયા.

આધુનિક ટેક્નોલોજી અને નવા પડકારો પર સંવાદ:

આધુનિક ચૂંટણી વ્યવસ્થામાં ઇલેક્ટ્રોનિક મતદાન પ્રણાલી, ડિજિટલ મતદાર યાદીઓ, પરિણામ વ્યવસ્થાપન અને ડેટા આધારિત ચૂંટણી પ્રક્રિયાઓ જેવા ટેક્નોલોજીના ઉપયોગથી નવી તકો ઊભી થઈ છે, તો બીજી તરફ ચકાસણીક્ષમતા, સાયબર સુરક્ષા અને જાહેર વિશ્વાસ જેવા નવા પડકારો પણ સામે આવ્યા છે. આવા સંજોગોમાં ચૂંટણી વ્યવસ્થાપન સંસ્થાઓ, રાજકીય પક્ષો અને કાયદા નિષ્ણાતો વચ્ચે અનુભવોનું આદાન-પ્રદાન વધુ મહત્વપૂર્ણ બની જાય છે. ફિલિપાઇન્સના પ્રતિનિધિઓના આંતરરાષ્ટ્રીય અનુભવો અને ભારતના વિવિધ રાજ્યોના ચૂંટણી અધિકારીઓના વ્યવહારુ દૃષ્ટિકોણના સમન્વયથી ચૂંટણી પ્રક્રિયામાં પારદર્શિતા અને જવાબદેહી વધુ મજબૂત બનશે.

નિરમા યુનિવર્સિટીના ILNU બિલ્ડિંગ ખાતે યોજાશે આયોજન:

આ પરિસંવાદનું આયોજન એવી રીતે કરવામાં આવ્યું છે કે જેમાં વિષય નિષ્ણાતો અને સહભાગીઓ વચ્ચે વિસ્તૃત અને અર્થપૂર્ણ સંવાદ થઈ શકે. ઉદ્ઘાટન સત્ર બાદ પાંચ અલગ-અલગ વિષય ટ્રેકમાં સમાંતર સત્રો યોજાશે અને દિવસના અંતે એક સમાપન સત્ર યોજવામાં આવશે. આ પરિસંવાદનું નિયત સ્થળ ILNU Building, Nirma University, Ahmedabad રહેશે. આ વિચારમંથનમાંથી પ્રાપ્ત થનારા સૂચનો અને શ્રેષ્ઠ પ્રથાઓના દસ્તાવેજીકરણ દ્વારા ભવિષ્યમાં ચૂંટણી પારદર્શિતા, જવાબદેહી અને જનવિશ્વાસને વધુ સુદૃઢ કરવાની દિશામાં એક મોટું અને નવું ભાથું મળી રહેશે.