છત્તીસગઢના કોરબા જિલ્લામાંથી એક મહત્વપૂર્ણ સમાચાર સામે આવ્યા છે. ત્યાંના એક ગામમાં લગભગ 200 ચામાચીડિયા મૃત હાલતમાં મળી આવ્યા છે. અધિકારીઓને શંકા છે કે ચામાચીડિયાના મૃત્યુ ગરમીને કારણે થયા છે. પાલી નગર પંચાયતમાં નૌકોનિયા તળાવ પાસે હજારો ચામાચીડિયાઓએ ઝાડ પર આશરો લીધો હતો.

કટઘોરા વિભાગીય વન અધિકારી કુમાર નિશાંતે રવિવારે જણાવ્યું હતું કે શનિવારે સ્થાનિકોએ મોટી સંખ્યામાં ચામાચીડિયા જમીન પર મૃત હાલતમાં પડેલા જોયા હતા, જ્યારે અન્ય ઝાડ પર લટકતા હતા. તેમણે કહ્યું કે વન અધિકારીઓ તાત્કાલિક ઘટનાસ્થળે પહોંચ્યા હતા. અધિકારીએ જણાવ્યું હતું કે આશરે 200 ચામાચીડિયા મૃત્યુ પામ્યા હતા, અને પ્રથમ દ્રષ્ટિએ એવું લાગે છે કે તેઓ હીટસ્ટ્રોકને કારણે મૃત્યુ પામ્યા હતા.

તેમણે કહ્યું કે પશુચિકિત્સા વિભાગે મૃત્યુનું ચોક્કસ કારણ નક્કી કરવા માટે મૃત ચામાચીડિયાના નમૂના એકત્રિત કર્યા છે. હવામાન વિભાગ અનુસાર, શનિવારે કોરબા વિસ્તારમાં તાપમાન 42 થી 44 ડિગ્રી સેલ્સિયસ હતું. દર વર્ષે ફેબ્રુઆરી અને માર્ચ મહિનામાં, મોટી સંખ્યામાં ચામાચીડિયા પાલી પહોંચે છે અને તળાવની આસપાસ માળા બનાવે છે.

અધિકારીઓએ જણાવ્યું હતું કે આ વર્ષે તેમની સંખ્યા ઘણી વધારે છે. રાયપુર હવામાન કેન્દ્રએ શનિવારે જણાવ્યું હતું કે મધ્ય છત્તીસગઢના બિલાસપુર (કોરબા સહિત), રાયપુર અને દુર્ગ વિસ્તારોમાં આગામી પાંચ દિવસ સુધી ગરમીનું મોજું ચાલુ રહેવાની શક્યતા છે. હવામાન વિભાગના જણાવ્યા અનુસાર, શનિવારે રાજ્યમાં સૌથી વધુ તાપમાન રાજનાંદગાંવમાં 46 ડિગ્રી સેલ્સિયસ નોંધાયું હતું જ્યારે રાજધાની રાયપુરમાં 44.4 ડિગ્રી સેલ્સિયસ તાપમાન નોંધાયું હતું.