સોશિયલ મીડિયા પર છેલ્લા કેટલાક સમયથી “કોકરોચ જનતા પાર્ટી” નામનું અનોખું અભિયાન ભારે ચર્ચામાં છે. યુવાનોમાં ઝડપથી લોકપ્રિય બનેલા આ સોશિયલ મીડિયા મૂવમેન્ટે રાજકીય વ્યવસ્થા, બેરોજગારી, સ્પર્ધાત્મક પરીક્ષાઓ અને સરકારી સંસ્થાઓ પ્રત્યેની નારાજગીને અવાજ આપવાનો પ્રયાસ કર્યો છે. હવે આ સમગ્ર મુદ્દે કોંગ્રેસના વરિષ્ઠ નેતા અને લોકસભા સાંસદ શશી થરૂરે  મહત્વપૂર્ણ નિવેદન આપ્યું છે.

થરૂરે ખાસ કરીને Gen Z યુવાનોને સંદેશ આપતા કહ્યું કે, “ઇન્સ્ટાગ્રામ તમારું જાહેર મંચ હોઈ શકે છે, પરંતુ તે બેલેટ બોક્સ નથી.” તેમના આ નિવેદનને રાજકીય વર્તુળો અને સોશિયલ મીડિયા બંનેમાં ખાસ મહત્વ આપવામાં આવી રહ્યું છે.

કોકરોચ જનતા પાર્ટી કોઈ પરંપરાગત રાજકીય પાર્ટી નથી, પરંતુ સોશિયલ મીડિયા પરથી શરૂ થયેલું એક આંદોલન છે. તેની શરૂઆત અભિજિત દિપકે દ્વારા કરવામાં આવી હોવાનું કહેવાય છે. આ અભિયાન ટૂંકા સમયમાં લાખો યુવાનો સુધી પહોંચ્યું છે. ખાસ કરીને એવા વિદ્યાર્થીઓ અને યુવાનો, જેઓ રોજગાર, સ્પર્ધાત્મક પરીક્ષાઓમાં ગેરરીતિઓ અને સિસ્ટમથી નિરાશ છે, તેઓ આ અભિયાન સાથે જોડાઈ રહ્યા છે.

શશિ થરૂરે કહ્યું કે આજના યુવાનો જે નિરાશા અનુભવી રહ્યા છે, તે માત્ર ભારતની સમસ્યા નથી. વિશ્વભરના યુવાનો વિવિધ કારણોસર સિસ્ટમ પ્રત્યે પ્રશ્નો ઉઠાવી રહ્યા છે. તેમણે કહ્યું કે માત્ર સોશિયલ મીડિયા પર પોસ્ટ કરવાથી કે ટ્રેન્ડ ચલાવવાથી સમસ્યાઓનો ઉકેલ આવતો નથી. તેના માટે વ્યવસ્થાની અંદર રહીને દબાણ ઊભું કરવું જરૂરી છે.

થરૂરે યુવાનોને સલાહ આપી કે તેઓ પોતાના વિસ્તારના ધારાસભ્યો અને સાંસદો સુધી સીધી પહોંચ બનાવે.

તેમણે કહ્યું કે લોકશાહી વ્યવસ્થામાં નાગરિકોની સક્રિય ભાગીદારી જ સૌથી મોટું હથિયાર છે. 

થરૂરના મતે સફળ આંદોલન માટે માત્ર વિરોધ પૂરતો નથી. તેમણે જણાવ્યું કે, યુવાનો પોતાની માંગણીઓને સ્પષ્ટ અને વ્યવહારુ બનાવે. જ્યારે કોઈ મુદ્દે સ્પષ્ટ માંગણી કરવામાં આવે છે ત્યારે મીડિયા તેને વધુ ગંભીરતાથી લે છે અને ચૂંટાયેલા પ્રતિનિધિઓ પર પણ કાર્યવાહી માટે દબાણ વધે છે. તેમણે કહ્યું કે સોશિયલ મીડિયા પર વાયરલ થવું અને વાસ્તવિક પરિવર્તન લાવવું, બંને અલગ બાબતો છે.

કોંગ્રેસ સાંસદે વિદ્યાર્થીઓ અને યુવાનોને વિવિધ વિદ્યાર્થી સંગઠનો, કાનૂની મંચો અને નીતિ-આધારિત સંસ્થાઓ સાથે જોડાવાની સલાહ આપી. તેમણે જણાવ્યું કે દેશના મોટા અને સફળ આંદોલનોમાં માત્ર વિરોધ પ્રદર્શન જ નહીં, 

છેલ્લા કેટલાક વર્ષોમાં રોજગાર, ભરતી પ્રક્રિયાઓમાં વિલંબ, પરીક્ષા પેપર લીક અને યુવાનોમાં વધતી અસંતુષ્ટિને કારણે આવા સોશિયલ મીડિયા આંદોલનોને મોટો પ્રતિસાદ મળી રહ્યો છે. કોકરોચ જનતા પાર્ટીએ પણ આ જ મુદ્દાઓને કેન્દ્રમાં રાખીને યુવાનોને પોતાની સાથે જોડવાનો પ્રયાસ કર્યો છે. તેના કારણે લાખો યુવાનો આ અભિયાન સાથે સોશિયલ મીડિયા પર જોડાયા છે.

શશિ થરૂરનો સંદેશ સ્પષ્ટ હતો કે સોશિયલ મીડિયા અવાજ ઉઠાવવા માટે મહત્વપૂર્ણ છે, પરંતુ લોકશાહીમાં અંતિમ નિર્ણય બેલેટ બોક્સ અને સંસ્થાકીય પ્રક્રિયાઓ દ્વારા જ લેવામાં આવે છે. તેમના મતે યુવાનોએ માત્ર ઓનલાઇન અસંતોષ વ્યક્ત કરવા કરતાં વ્યવસ્થાની અંદર રહીને સક્રિય ભાગીદારી કરવી જોઈએ, કારણ કે સાચો બદલાવ ત્યાંથી જ આવે છે.