સિદ્ધાર્થ નગર : ઉત્તર પ્રદેશના સિદ્ધાર્થ નગર જિલ્લામાં સોશિયલ મીડિયા પર ફેમસ થવાની લાયે પાંચ મિત્રોને મોત સાથે ભેટો કરાવી દીધો છે. કાંશીરામ આવાસ કોલોનીમાં આવેલી એક અત્યંત જર્જરિત અને ઊંચી પાણીની ટાંકી પર રીલ્સ બનાવવા ચઢેલા પાંચ મિત્રો પૈકી ત્રણ કિશોરો સીડી તૂટી પડતા નીચે પટકાયા હતા. આ ભયાનક અકસ્માતમાં સિદ્ધાર્થ નામના કિશોરનું ગંભીર ઇજાઓને કારણે ઘટનાસ્થળે જ કરુણ મોત નીપજ્યું હતું, જ્યારે અન્ય બે મિત્રો લોહીલુહાણ હાલતમાં હોસ્પિટલ ભેગા થયા હતા. આ ઘટનાએ સમગ્ર પંથકમાં અરેરાટી ફેલાવી દીધી છે અને જોખમી સ્ટંટ કરતા યુવાનો માટે લાલબત્તી ધરી છે.

ટાંકીની સીડી તૂટી જતાં પવન અને કલ્લુ નામના બે બાળકો 16 કલાક સુધી ટાંકીની ઉપરના ભાગે જ ફસાયેલા રહ્યા હતા. ઘટનાની ગંભીરતા જોઈ ગોરખપુરથી NDRFની ટીમ બોલાવવામાં આવી હતી, પરંતુ ટાંકી સુધી પહોંચવાનો રસ્તો કાચો હોવાથી અને વરસાદી માહોલને કારણે રેસ્ક્યુ ઓપરેશનમાં ભારે અવરોધ સર્જાયો હતો. આખી રાત તંત્ર અને સ્થાનિકોના જીવ તાળવે ચોંટ્યા રહ્યા હતા. અંતે જિલ્લા વહીવટીતંત્રે રાજ્ય સરકાર પાસે તાકીદે મદદ માંગતા ભારતીય વાયુસેનાના જવાનો મેદાને આવ્યા હતા અને રવિવારે વહેલી સવારે આકાશમાંથી જિંદગી બચાવવાની કવાયત શરૂ થઈ હતી.

રવિવારે સવારે 5:20 કલાકે વાયુસેનાનું શક્તિશાળી Mi-17 V5 હેલિકોપ્ટર ઘટનાસ્થળે પહોંચ્યું હતું. આસમાની ઊંચાઈએ પવનના જોર વચ્ચે વાયુસેનાના જબાંઝ જવાનોએ માત્ર 15 મિનિટના ટૂંકા ગાળામાં જ હેલિકોપ્ટરની મદદથી બંને બાળકોને સુરક્ષિત રીતે બહાર કાઢી લીધા હતા. રેસ્ક્યુ બાદ બાળકોને તાત્કાલિક મેડિકલ ચેકઅપ માટે ગોરખપુર લઈ જવામાં આવ્યા હતા. મોતને મંત્રમુગ્ધ કરી દેનારા આ દિલધડક રેસ્ક્યુ ઓપરેશને સૌના શ્વાસ થંભાવી દીધા હતા, પરંતુ એક મિત્રના ગુમાવવાનો શોક અને સોશિયલ મીડિયાની આ આંધળી દોટ સમાજ માટે એક ગંભીર ચેતવણી રૂપ બની રહી છે.