નવી દિલ્હી: ભારતીય ગૃહિણીઓ માટે ચિંતાના સમાચાર સામે આવ્યા છે. વિશ્વની સૌથી મોટી ઓઇલ કંપની સાઉદી અરામકોએ તેના મુખ્ય નિકાસ ટર્મિનલ 'જુઆયમાહ' પર થયેલા ગંભીર નુકસાનને કારણે મે 2026ના અંત સુધી ભારત સહિતના દેશોને LPG (રસોઈ ગેસ)નો સપ્લાય સ્થગિત કરવાની સત્તાવાર જાહેરાત કરી છે. ફેબ્રુઆરીના અંતમાં મધ્ય પૂર્વમાં ફાટી નીકળેલા સંઘર્ષ દરમિયાન આ ટર્મિનલ પર થયેલા હુમલા અને ત્યારબાદ લાગેલી ભીષણ આગને કારણે પ્રોસેસિંગ યુનિટ્સને મોટું નુકસાન પહોંચ્યું છે. આ સ્થિતિમાં, જો હોર્મુઝની સામુદ્રધુનીમાં પરિવહન ફરી શરૂ થાય તો પણ, સાઉદી અરામકો પાસે શિપમેન્ટ લોડ કરવા માટે પૂરતો જથ્થો ઉપલબ્ધ નહીં હોય.

સાઉદી અરેબિયાનું આ જુઆયમાહ ટર્મિનલ વૈશ્વિક સ્તરે એલપીજી નિકાસમાં 3.5% હિસ્સો ધરાવે છે અને ભારત પોતાની જરૂરિયાતનો મોટો હિસ્સો અહીંથી મંગાવે છે. અરામકોએ તેના ખરીદદારોને સ્પષ્ટ સૂચના આપી છે કે સમારકામ હજુ અધૂરું હોવાથી આગામી દોઢ મહિના સુધી પ્રોપેન અને બ્યુટેનનો પુરવઠો મળી શકશે નહીં. આ એવા સમયે બન્યું છે જ્યારે રશિયા-ઈરાન-અમેરિકા વચ્ચેના તણાવને કારણે અન્ય વૈશ્વિક બજારોમાં પહેલાથી જ તેલ અને ગેસના ભાવ આસમાને પહોંચ્યા છે. ભારતમાં સરકારી તેલ કંપનીઓ (OMCs) હવે વૈકલ્પિક સ્ત્રોતો શોધવા માટે મથામણ કરી રહી છે, પરંતુ તાત્કાલિક ધોરણે આટલા મોટા જથ્થાની વ્યવસ્થા કરવી પડકારજનક બની રહેશે.

નિષ્ણાતોના મતે, આ પુરવઠાની ખાધને કારણે ભારતના બજારોમાં એલપીજી સિલિન્ડરના ભાવમાં મોટો ઉછાળો આવી શકે છે અથવા સપ્લાયમાં વિલંબને કારણે 'વેઇટિંગ પિરિયડ' વધી શકે છે. સાઉદી ઉર્જા મંત્રાલયે નુકસાનની હદ અંગે મૌન સેવ્યું છે, પરંતુ શિપમેન્ટ રદ થવાની જાહેરાત સૂચવે છે કે નુકસાન ધારણા કરતાં વધુ ઊંડું છે. રશિયા તરફથી મળતું સસ્તું ક્રૂડ ઓઇલ ભારત માટે તેલની અછત દૂર કરવામાં મદદરૂપ છે, પરંતુ રસોઈ ગેસ (LPG) માટે સાઉદી અરેબિયા પરની નિર્ભરતા અત્યારે ભારત માટે સૌથી નબળી કડી સાબિત થઈ રહી છે. આગામી દિવસોમાં જો ભારત કતાર કે સંયુક્ત આરબ અમીરાત પાસેથી વધારાનો જથ્થો મેળવી નહીં શકે, તો રસોડાનું બજેટ ખોરવાઈ જવાની પૂરેપૂરી શક્યતા છે.