ગ્વાંગઝૂ, તા. 29: ભારત અને ચીન વચ્ચેના વણસેલા સંબંધોમાં હવે કૂણું વલણ જોવા મળી રહ્યું છે અને તેની સૌથી મોટી અસર એવિએશન સેક્ટર પર પડી છે. મંગળવારે ઈન્ડિગોનું વિમાન દિલ્હીથી ઉડીને ચીનના ગ્વાંગઝૂ ખાતે સફળતાપૂર્વક લેન્ડ થયું હતું. આ સાથે જ બંને પાડોશી દેશો વચ્ચે લાંબા સમયથી બંધ રહેલી સીધી ફ્લાઇટ સેવાઓનો પુનઃ પ્રારંભ થયો છે. ઈન્ડિગો દ્વારા શરૂ કરાયેલી આ સેવાથી ખાસ કરીને વેપારી વર્ગને મોટી રાહત મળશે, જેમને અત્યાર સુધી અન્ય દેશો થઈને ચીન જવું પડતું હતું.
આ માત્ર શરૂઆત નથી, પરંતુ બંને દેશો વચ્ચે હવાઈ કનેક્ટિવિટી વધારવા માટેનો એક મોટો પાયો છે. ઈન્ડિગોની સાથે સાથે ચીનની સરકારી એરલાઇન 'એર ચાઈના' એ પણ બેઇજિંગ અને દિલ્હી વચ્ચે તેની સેવાઓ ફરી શરૂ કરી દીધી છે. એર ચાઈનાની ફ્લાઇટ અઠવાડિયામાં ત્રણ દિવસ (મંગળવાર, શુક્રવાર અને રવિવાર) ઉડાન ભરશે. આ ફ્લાઇટનું ભાડું અંદાજે 523 અમેરિકન ડોલર (લગભગ ₹43,000 થી વધુ) રાખવામાં આવ્યું છે.
નોંધનીય છે કે ગયા વર્ષે પ્રધાનમંત્રી નરેન્દ્ર મોદીની તિયાનજિન ખાતે એસસીઓ (SCO) સમિટની મુલાકાત બાદ બંને દેશોના રાજદ્વારી સંબંધોમાં સુધારો જોવા મળ્યો છે. આ સુધારાને પગલે ચીન ઈસ્ટર્ન એરલાઇન્સે પણ કુનમિંગ-કોલકાતા અને નવી દિલ્હી-શાંઘાઈ વચ્ચેની ફ્લાઇટ્સ ગત નવેમ્બરથી તબક્કાવાર શરૂ કરી દીધી છે. ઈન્ડિગોએ પણ 29 માર્ચથી કોલકાતા અને શાંઘાઈ વચ્ચે દરરોજ સીધી ફ્લાઇટ્સ શરૂ કરીને પોતાની પકડ મજબૂત કરી છે.
એક સમય હતો જ્યારે કોરોનાકાળ અને સરહદી તણાવને કારણે આ રૂટ સંપૂર્ણપણે બંધ કરી દેવાયા હતા. પરંતુ હવે જ્યારે સીધી ફ્લાઇટ્સ શરૂ થઈ છે, ત્યારે અપેક્ષા રાખવામાં આવે છે કે બંને દેશો વચ્ચે આર્થિક સહયોગ અને પ્રવાસન ક્ષેત્રે ફરીથી તેજી આવશે. ગ્વાંગઝૂ અને શાંઘાઈ જેવા ઔદ્યોગિક શહેરો સાથે સીધું જોડાણ થવાથી ભારતીય નિકાસકારો અને ટેક્સટાઈલ વેપારીઓ માટે નવી તકોના દ્વાર ખુલશે.