જકાર્તા, તા.૦૭: પોતાના ત્રણ દેશોના સત્તાવાર પ્રવાસના પ્રથમ તબક્કામાં ઇન્ડોનેશિયા પહોંચેલા ભારતના પ્રધાનમંત્રી નરેન્દ્ર મોદીએ મંગળવારે ત્યાંની સંસદને સંબોધિત કરીને એક નવો ઇતિહાસ રચ્યો છે. પીએમ મોદીએ પોતાના સંબોધનમાં ભારત અને ઇન્ડોનેશિયાના સદીઓ જૂના સંબંધો, સહિયારી લોકશાહી વિરાસત, વિકાસ આધારિત ભાગીદારી અને પરસ્પર અતુટ વિશ્વાસ પર ભારે ભાર મૂક્યો હતો. વૈશ્વિક સમુદાયને એક મોટો સંદેશ આપતા પ્રધાનમંત્રીએ સ્પષ્ટ શબ્દોમાં જણાવ્યું હતું કે, ભારત ક્યારેય પણ 'વિસ્તારવાદ' (Expansionism) ની નીતિમાં માનતું નથી, પરંતુ ભારત હંમેશા 'વિકાસવાદ' (Development-oriented) ની વિભાવના પર આગળ વધે છે.
૧૪૦ કરોડ દેશવાસીઓ તરફથી પાઠવી શુભેચ્છાઓ
ઇન્ડોનેશિયાની સંસદમાં પોતાના સંબોધનની શરૂઆત કરતા પીએમ મોદીએ ભવ્ય આતિથ્ય સત્કાર બદલ ત્યાંના નેતૃત્વ અને જનતાનો આભાર માન્યો હતો. તેમણે કહ્યું, "આજની પવિત્ર સંસદમાં આપ સૌની વચ્ચે ઉપસ્થિત રહેવું એ મારા માટે બહુ મોટું સૌભાગ્ય છે. હું અહીં વિશ્વની સૌથી મોટી લોકશાહી અને લોકશાહીની જનની એવા ભારતના ૧૪૦ કરોડ નાગરિકોના પ્રતિનિધિ તરીકે આવ્યો છું અને તમામ ભારતવાસીઓ વતી ઇન્ડોનેશિયાને હાર્દિક શુભેચ્છાઓ પાઠવું છું." પીએમ મોદીએ આ મંચ પરથી 'સબકા સાથ, સબકા વિકાસ' ના વૈશ્વિક મંત્રને પણ દોહરાવ્યો હતો.
સંરક્ષણ અને વ્યૂહાત્મક ભાગીદારીના નવા અધ્યાયનો પ્રારંભ
પીએમ મોદીના આ પ્રવાસથી માત્ર ડિપ્લોમેટિક જ નહીં, પરંતુ બંને દેશો વચ્ચે મજબૂત લશ્કરી અને વ્યાપારિક સંબંધોના નવા દ્વાર ખુલ્યા છે. સંસદના સંબોધનની સાથે-સાથે અસ્ત્ર (Astra) અને બ્રહ્મોસ (Brahmos) મિસાઈલ જેવી અત્યાધુનિક ડિફેન્સ ડીલ અંગે પણ આ પ્રવાસમાં મહત્વના કરારો થવાની સંભાવના છે. રાજદ્વારી નિષ્ણાતોના મતે, ભારત અને ઇન્ડોનેશિયાનું આ નવું જોડાણ વૈશ્વિક સ્તરે અને ખાસ કરીને હિંદ-પ્રશાંત (Indo-Pacific) ક્ષેત્રમાં ચીનની દાદાગીરી અને વિસ્તારવાદી દબાણને રોકવામાં મોટો 'ગેમ ચેન્જર' સાબિત થશે.