મુંબઈ: સોશિયલ મીડિયા પર ક્યારે શું વાયરલ થઈ જાય તે કહેવું મુશ્કેલ છે, પરંતુ જ્યારે કોઈ દેશનું સત્તાવાર કોન્સ્યુલેટ 'સ્વેગ' જેવા શબ્દોનો ઉપયોગ કરે, ત્યારે ચર્ચા થવી સ્વાભાવિક છે. મુંબઈમાં ઈરાની કોન્સ્યુલેટ જનરલની એક તાજેતરની સોશિયલ મીડિયા પોસ્ટ અત્યારે ઇન્ટરનેટ પર ધૂમ મચાવી રહી છે. આ પોસ્ટમાં ભારત પ્રત્યેનો અખૂટ પ્રેમ વ્યક્ત કરતા લખવામાં આવ્યું છે કે, "આ જ કારણ છે કે આપણે ભારતને પ્રેમ કરીએ છીએ; એક એવી ભૂમિ જ્યાં દાર્શનિકો વૃક્ષો નીચે બેસીને ગહન ચર્ચાઓ કરતા હતા અને જ્યાં શૂન્યની શોધ થઈ હતી." જોકે, સૌથી વધુ ધ્યાન ખેંચ્યું તે વાક્ય હતું— "ભાઈ, અહીં તમને જ્ઞાન અને સ્વેગ બંને મળે છે." આ અનોખી અંદાજમાં કરાયેલી પ્રશંસાએ નેટીઝન્સને એ વિચારવા મજબૂર કરી દીધા છે કે શું આ એકાઉન્ટ કોઈ ભારતીય વ્યક્તિ ચલાવી રહી છે?

ભૂ-રાજકીય તણાવ વચ્ચે ઈરાને માત્ર પ્રશંસા જ નથી કરી, પરંતુ પોતાની આગવી શૈલીમાં અમેરિકાને ટોણો પણ માર્યો છે. હૈદરાબાદમાં ઈરાની કોન્સ્યુલેટે ડોનાલ્ડ ટ્રમ્પની નાકાબંધીની નીતિઓની મજાક ઉડાવતા ડિજિટલ યુગના ઉદાહરણનો સહારો લીધો. તેમણે લખ્યું કે, "હોર્મુઝની સ્ટ્રેટ (સમુદ્રધુની) એ કોઈ સોશિયલ મીડિયા પ્લેટફોર્મ નથી કે જો કોઈ તમને બ્લોક કરે તો તમે તેને વળતું બ્લોક કરી શકો." આ નિવેદન સ્પષ્ટપણે અમેરિકન નૌકાદળ દ્વારા કરવામાં આવતી નાકાબંધી અને આર્થિક પ્રતિબંધો સામેનો આક્રોશ દર્શાવે છે, જે સોશિયલ મીડિયા પર યુઝર્સને ખૂબ જ રમુજી છતાં ગંભીર લાગી રહ્યો છે.

બીજી તરફ, આ નિવેદનબાજી વચ્ચે વૈશ્વિક સ્તરે શાંતિ સ્થાપવાના પ્રયાસો પણ તેજ બન્યા છે. ફ્રાન્સના રાષ્ટ્રપતિ ઇમેન્યુઅલ મેક્રોને ઈરાની રાષ્ટ્રપતિ મસૂદ પેઝેશ્કિયન અને ડોનાલ્ડ ટ્રમ્પ સાથે મહત્ત્વપૂર્ણ મુલાકાતો કરી છે. મેક્રોને ભારપૂર્વક જણાવ્યું છે કે વર્તમાન મડાગાંઠને ઉકેલવા માટે તમામ પક્ષોએ ફરીથી વાટાઘાટોના ટેબલ પર આવવું પડશે. ઇસ્લામાબાદમાં થયેલી અગાઉની ચર્ચાઓ બાદ જે સ્થિરતા આવી ગઈ છે, તેને તોડવા માટે રાજદ્વારી પહેલ અત્યંત જરૂરી બની છે. હવે જોવાનું એ રહેશે કે ભારતની સંસ્કૃતિના વખાણ અને અમેરિકા સામેના આકરા તેવર વચ્ચે આગામી સમયમાં ઈરાન અને પશ્ચિમી દેશોના સંબંધો કેવો વળાંક લે છે.