પેરિસ: ભારતે તેના મહત્વકાંક્ષી ડીપ-ટેક સ્ટાર્ટઅપ પ્રોગ્રામ 'ભારત ઇનોવેટ્સ ૨૦૨૬' ને પેરિસમાં યોજાયેલા એક શાનદાર રોડ-શો દરમિયાન વૈશ્વિક રોકાણકારો સમક્ષ રજૂ કર્યો છે. આવતા મહિને ફ્રાન્સના નીસ (Nice) શહેરમાં યોજાનારા મુખ્ય કોન્ક્લેવ પહેલા આ આયોજન દ્વારા ભારતે વૈશ્વિક સ્તરે મોમેન્ટમ ઉભું કર્યું છે. આ કાર્યક્રમમાં ભારતની ઉચ્ચ શિક્ષણ આધારિત ઇનોવેશન ઇકોસિસ્ટમની ઝલક જોઈને ફ્રાન્સના બિઝનેસ જગતના માંધાતાઓ પ્રભાવિત થયા હતા.
ભારત-ફ્રાન્સની ખાસ ભાગીદારી
પેરિસમાં યોજાયેલા આ રોડ-શોમાં ભારત સરકારના શિક્ષણ મંત્રાલય, પેરિસમાં ભારતીય દૂતાવાસ અને કોન્ફેડરેશન ઓફ ઇન્ડિયન ઇન્ડસ્ટ્રી (CII) ના પ્રતિનિધિઓ હાજર રહ્યા હતા. ફ્રાન્સની દિગ્ગજ સંસ્થાઓ જેવી કે 'લા ફ્રેન્ચ ટેક', 'વિવાટેક' અને પ્રખ્યાત બિઝનેસ શાળાઓના ૫૦ થી વધુ પ્રતિનિધિઓએ ભારત સાથે જોડાવા ઉત્સાહ દાખવ્યો હતો. શિક્ષણ મંત્રાલયના સંયુક્ત સચિવોએ રજૂઆત કરતા જણાવ્યું હતું કે, આ પહેલ ભારત-ફ્રાન્સ વચ્ચેની વિશેષ વૈશ્વિક વ્યૂહાત્મક ભાગીદારીને નવી ઊંચાઈએ લઈ જશે.
૧૩ અત્યાધુનિક સેક્ટર્સ પર નજર
'ભારત ઇનોવેટ્સ ૨૦૨૬' હેઠળ ૧૩ મુખ્ય ટેકનોલોજી ક્ષેત્રો પર ધ્યાન કેન્દ્રિત કરવામાં આવ્યું છે. જેમાં એડવાન્સ કમ્પ્યુટિંગ, સેમિકન્ડક્ટર્સ, નેક્સ્ટ જનરેશન કમ્યુનિકેશન, ક્રિટિકલ મિનરલ્સ, બાયોટેકનોલોજી, સ્પેસ, ડિફેન્સ અને ઇન્ડસ્ટ્રી ૪.૦ હેઠળ મેન્યુફેક્ચરિંગનો સમાવેશ થાય છે. ભારત સરકાર આ પ્રોગ્રામ દ્વારા દેશના ટોચના ૧૨૦ ડીપ-ટેક સ્ટાર્ટઅપ્સને ફ્રાન્સ લઈ જશે, જેથી ત્યાં નવા રોકાણો, સંયુક્ત સંશોધનો અને વૈશ્વિક બજારમાં પ્રવેશની તકો ઊભી કરી શકાય.
પીએમ મોદીની જાહેરાત અને ભવિષ્યનું આયોજન
નોંધનીય છે કે, ૧૭ ફેબ્રુઆરીના રોજ વડાપ્રધાન નરેન્દ્ર મોદીએ ફ્રાન્સના રાષ્ટ્રપતિની હાજરીમાં 'ભારત-ફ્રાન્સ ઇનોવેશન વર્ષ' ના ઉદ્ઘાટન પ્રસંગે આ પહેલની જાહેરાત કરી હતી. હવે આ ભવ્ય કોન્ક્લેવ ૧૪ થી ૧૬ જૂન દરમિયાન ફ્રાન્સના નીસ શહેરમાં આવેલા 'પેલે ડેસ એક્સપોઝિશન્સ' ખાતે યોજાશે. આ આયોજનથી ભારતીય સ્ટાર્ટઅપ્સને માત્ર રોકાણ જ નહીં, પણ યુરોપિયન દેશો સાથે ટેકનોલોજીના આદાન-પ્રદાન માટે મોટું પ્લેટફોર્મ મળશે.