નવી દિલ્હી: આધુનિક યુદ્ધમાં ડ્રોન અને ડ્રોનના ઝૂંડ  તરફથી વધી રહેલા જોખમો સામે દેશની સુરક્ષાને વધુ મજબૂત કરવા ભારતના ખાનગી સંરક્ષણ ક્ષેત્રે એક ઐતિહાસિક સિદ્ધિ હાંસલ કરી છે. દેશની અગ્રણી સંરક્ષણ ક્ષેત્રની ખાનગી કંપની આઇજી ડિફેન્સે  તેના ડ્રોન-વિરોધી પ્રોગ્રામના ભાગરૂપે સ્વદેશી માઇક્રો-મિસાઇલ 'જ્વાલા' (JWALA) ના બે સોલિડ રોકેટ મોટર્સનું સફળતાપૂર્વક પરીક્ષણ કર્યું છે. આ સફળ પરીક્ષણ ૩ ઓક્ટોબર, ૨૦૨૬ના રોજ વહેલી સવારે ૪:૦૦ વાગ્યે કરવામાં આવ્યું હતું.

આઇજી ડિફેન્સનો જ્વાલા મિસાઇલ પ્રોગ્રામ ભારતનો પ્રથમ સ્વદેશી ખાનગી માઇક્રો-મિસાઇલ પ્રોગ્રામ છે, જે મુખ્યત્વે 'હાર્ડ-કિલ' કાઉન્ટર-યુએએસ  પ્રણાલી વિકસાવવા પર કેન્દ્રિત છે.

હાલના સમયના યુદ્ધો અને સંઘર્ષોમાં સસ્તા અને મોટી સંખ્યામાં ઉપયોગમાં લેવાતા ડ્રોન મોટો પડકાર બની રહ્યા છે. અત્યંત મોંઘી હવાઈ સંરક્ષણ (Air Defence) મિસાઇલોથી આવા સસ્તા ડ્રોનને તોડી પાડવા આર્થિક રીતે પોષાય તેમ નથી. આ જ જરૂરિયાતને ધ્યાનમાં રાખીને 'જ્વાલા' માઇક્રો-મિસાઇલ તૈયાર કરવામાં આવી રહી છે, જે ઓછી કિંમતે મોટા પાયે નિર્માણ કરી શકાય તેવી (Cost-effective and Scalable) ઇન્ટરસેપ્ટર મિસાઇલ છે. તે ૨ થી ૫ કિલોમીટરની રેન્જમાં અને ૫૦ મીટરથી લઈને ૫,૦૦૦ મીટરની ઊંચાઈ સુધીના દુશ્મન ડ્રોનને ચોક્કસતાથી લક્ષ્ય બનાવી શકે છે.

વિંગ કમાન્ડર અનૂપ શર્માએ જણાવ્યું હતું કે, "ડ્રોનનો ખતરો જે ઝડપે વધી રહ્યો છે, તેની સામે કાઉન્ટર-યુએએસ સિસ્ટમ પણ તેટલી જ ઝડપે તૈયાર થવી જરૂરી છે. જ્વાલા પ્રોપલ્શનનું સફળ પરીક્ષણ ભારતની સ્વદેશી હાર્ડ-કિલ ક્ષમતા દિશામાં માઇલસ્ટોન છે. આ મિસાઇલ ભારતીય સૈન્યની મિસાઇલ ક્ષમતામાં મોટો વધારો કરશે."

જ્વાલા મિસાઇલ માત્ર એકલી કામ નહીં કરે, પરંતુ તે આઇજી ડિફેન્સના આર્ટિફિશિયલ ઇન્ટેલિજન્સ  આધારિત યુદ્ધ વ્યવસ્થાપન પ્લેટફોર્મ 'ગ્રીડ' સાથે જોડાયેલી રહેશે. 'ગ્રીડ' એક કમાન્ડ એન્ડ કંટ્રોલ સિસ્ટમ છે જે વિવિધ સેન્સર્સ, રડાર અને ઇફેક્ટર્સને એકીકૃત કરે છે.

 ગ્રીડ સિસ્ટમ હવામાં રહેલા ખતરાની ઓળખ, ટ્રેકિંગ અને જોખમનું મૂલ્યાંકન કરશે અને જ્વાલા મિસાઇલને સ્વાયત્ત રીતે સચોટ નિશાન સાધવાનો નિર્દેશ આપશે.

 આઇજી ડિફેન્સના સ્થાપક અને સીઈઓ બોધિસત્વ સંઘપ્રિયના જણાવ્યા મુજબ, જ્વાલાને સ્માર્ટ ડાયરેક્શન આર્કિટેક્ચર હેઠળ તૈયાર કરાઈ છે જેથી શોધથી લઈને એંગેજમેન્ટ સુધીની સમગ્ર કામગીરી માનવીય હસ્તક્ષેપ વિના ઝડપથી પૂરી થઈ શકે.

આ સફળતા દર્શાવે છે કે ભારતનું ખાનગી ક્ષેત્ર હવે અત્યાધુનિક અને જટિલ સૈન્ય ટેકનોલોજીમાં ઝડપથી આગળ વધી રહ્યું છે. આઇજી ડિફેન્સ હવે સિસ્ટમની પરિપક્વતા, નિર્માણ ક્ષમતા અને ગુણવત્તા પર કામ કરશે. આ સિદ્ધિથી ભારતને વિદેશી કાઉન્ટર-ડ્રોન સિસ્ટમ્સ પર નિર્ભર રહેવું નહીં પડે અને દેશના સંરક્ષણ ક્ષેત્રને નવી ઊંચાઈ મળશે.