નવી દિલ્હી, તા. ૧૪: અમેરિકા અને ઈરાન વચ્ચે હોર્મુઝની સામુદ્રધુની (Strait of Hormuz) માં ફાટી નીકળેલા ભીષણ યુદ્ધને પગલે ભારતે પોતાના નાગરિકો અને જહાજોને બચાવવા માટે યુદ્ધના ધોરણે કમર કસી લીધી છે. પર્સિયન ગલ્ફ અને હોર્મુઝ વિસ્તાર અસરકારક રીતે બંધ થઈ જતાં અને આકાશી હુમલાનું જોખમ ચરમસીમાએ પહોંચતાં ભારત સરકાર, ભારતીય નૌકાદળ (Indian Navy) અને અન્ય સંરક્ષણ એજન્સીઓ સાથે મળીને ત્યાં ફસાયેલા ૧૪૮ ભારતીય ક્રૂ સભ્યોને બહાર કાઢવા માટે એક અત્યંત ગુપ્ત અને મોટો રેસ્ક્યુ પ્લાન તૈયાર કરી રહી છે.
દિલ્હીમાં ઉચ્ચ સ્તરીય બેઠકોનો દોર શરૂ
સૂત્રોના જણાવ્યા અનુસાર, બંદરો, શિપિંગ અને જળમાર્ગ મંત્રાલય દ્વારા નવી દિલ્હીમાં ઉચ્ચ સ્તરીય બેઠકોનો દોર શરૂ થઈ ગયો છે. આ બેઠકમાં ભારતીય જહાજોને દુશ્મનના રડાર અને મિસાઈલ હુમલાની રેન્જમાંથી બહાર કાઢી સુરક્ષિત આંતરરાષ્ટ્રીય જળસીમામાં કેવી રીતે લાવવા તેની સચોટ વ્યુહરચના ઘડવામાં આવી રહી છે. હાલમાં આ ભયાનક યુદ્ધક્ષેત્રમાં ભારતના ૭ મોટા જહાજો ફસાયેલા છે, જેમાં ૩ કન્ટેનર જહાજ, ૧ ક્રૂડ ઓઈલ ટેન્કર, ૧ કેમિકલ ટેન્કર, ૧ બલ્ક કેરિયર અને ૧ ડ્રેજરનો સમાવેશ થાય છે.
પરિવારો સાથે સંપર્ક અને કટોકટી કેન્દ્ર સક્રિય
આ કટોકટી વચ્ચે વિદેશ મંત્રાલય અને શિપિંગ મંત્રાલય સતત પરિસ્થિતિ પર બારીકાઈથી નજર રાખી રહ્યા છે. સમુદ્રમાં ફસાયેલા તમામ ૧૪૮ ભારતીય નાવિકોના પરિવારોને હિંમત આપવા માટે સરકાર સતત તેમના સંપર્કમાં છે. આ ઉપરાંત, પળેપળની માહિતી મેળવવા અને જહાજો સાથે સીધો સંપર્ક જાળવી રાખવા માટે ખાસ '૨૪x૭ ડીજી કોમ્યુનિકેશન સેન્ટર કંટ્રોલ રૂમ' (DGCOM) ને રાઉન્ડ-ધ-ક્લોક એક્ટિવ કરી દેવામાં આવ્યો છે.
અમેરિકા અને ઈરાન આમને-સામને
ઈરાન અને અમેરિકા વચ્ચેનો સંઘર્ષ હવે કાબૂ બહાર જઈ રહ્યો છે. એક તરફ ઈરાનનું કહેવું છે કે અમેરિકાએ દ્વિપક્ષીય કરાર (MoU) ની કલમ ૫ નું ઉલ્લંઘન કરીને હોર્મુઝનો માર્ગ રોક્યો છે, તેથી તેણે રક્ષણાત્મક પગલાં તરીકે નેવિગેશન પર નિયંત્રણો લાદ્યા છે. બીજી તરફ, અમેરિકી પ્રમુખ ડોનાલ્ડ ટ્રમ્પે જાહેરાત કરી છે કે યુએસ નૌકાદળ આ વિસ્તારમાં કડક નાકાબંધી લાગુ કરશે અને અમેરિકાએ ઈરાનના સૈન્ય ઠેકાણાઓ પર ત્રીજી રાત્રે પણ ભીષણ બોમ્બમારો ચાલુ રાખ્યો છે.
આ મહાસત્તાઓના ટકરાવ વચ્ચે ભારતની સર્વોચ્ચ પ્રાથમિકતા પોતાના નાગરિકોની સુરક્ષા સુનિશ્ચિત કરવાની છે. હવે જોવાનું એ રહેશે કે ભારતીય નૌકાસેના પોતાના પરાક્રમ અને રાજદ્વારી સંબંધોનો ઉપયોગ કરીને આ ૧૪૮ જાંબાઝ ખલાસીઓને ક્યારે માતૃભૂમિ પર હેમખેમ પાછા લાવે છે.