નવી દિલ્હી : અરુણાચલ પ્રદેશ બાદ હવે પૂર્વ લદ્દાખમાં ચીનની વિસ્તારવાદી નીતિઓ સામે ભારતે અત્યંત કડક અને વ્યૂહાત્મક વલણ અપનાવ્યું છે. કેન્દ્રીય ગૃહ મંત્રાલયે 'સર્વે ઓફ ઈન્ડિયા' મારફતે કેન્દ્રશાસિત પ્રદેશ લદ્દાખના ૨૮ અત્યંત મહત્વપૂર્ણ અને વ્યૂહાત્મક સ્થળો તેમજ ભૌગોલિક વિશેષતાઓને ભારતના સત્તાવાર નકશા પર અંકિત કરીને નવો નકશો જાહેર કર્યો છે. આ પગલાથી સરહદ પર પોતાની દાવેદારી મજબૂત કરવાનો પ્રયાસ કરતા ચીનની અસ્વસ્થતા અને મુશ્કેલીઓમાં ભારે વધારો થવાની ધારણા છે.

ગોગરા અને હોટ સ્પ્રિંગ્સ જેવા મુખ્ય તણાવ કેન્દ્રોનો સમાવેશ

સત્તાવાર યાદીમાં સામેલ ૨૮ સ્થળોમાં ‘લાઇન ઓફ એક્ચ્યુઅલ કંટ્રોલ’ (LAC) પર આવેલા ગોગરા અને હોટ સ્પ્રિંગ્સ જેવા મુખ્ય સ્થળોનો સમાવેશ થાય છે. ઉલ્લેખનીય છે કે, મે ૨૦૨૦માં પેંગોંગ ત્સો વિસ્તારમાં થયેલી હિંસક અથડામણ બાદ આ બંને સ્થળો ભારતીય અને ચીની સેનાઓ વચ્ચેના તણાવના મુખ્ય કેન્દ્રો બન્યા હતા. ભારતીય સેનાના પેટ્રોલિંગ અને વ્યૂહાત્મક સુરક્ષાની દ્રષ્ટિએ આ વિસ્તારો અત્યંત મહત્વપૂર્ણ માનવામાં આવે છે.

અન્ય પ્રખ્યાત શિખરો, પાસ અને ગ્લેશિયર્સને મળ્યું સત્તાવાર નામ

કેન્દ્ર સરકાર અને લદ્દાખ વહીવટીતંત્ર વચ્ચેની વિસ્તૃત ચર્ચા બાદ પ્રમાણિત કરવામાં આવેલા સ્થળોની યાદીમાં કનિષ્ક શિખર, ઝોરાવર શિખર, કરુણ પીર પર્વત, માર્તંડ ગિરી, અલીશા ગિરી, બ્રાંગસા, ચાપચિંગલ પાસ, શાચમીરિક પાસ, પારપિક ગ્લેશિયર, સ્કામરી ગ્લેશિયર, શ્કોરગા ખીણ, કુકસેલ, ડેહરા કંપાસ અને ડ્રાક કાર્પોનો સમાવેશ થાય છે. આ તમામ સ્થળોની સચોટ ઓળખ અને સરહદી વિસ્તાર અંગે જનજાગૃતિ વધારવા માટે આ પ્રક્રિયા હાથ ધરવામાં આવી છે.

અરુણાચલ પ્રદેશ બાદ ચીન પર બીજો ડિજિટલ પ્રહાર

આ અગાઉ ઓગસ્ટ માસમાં પણ ભારત સરકારે અરુણાચલ પ્રદેશમાં ૨૭ સ્થળો અને ભૌગોલિક વિશેષતાઓના નામો પ્રમાણિત કરી નવો નકશો બહાર પાડ્યો હતો, જેની સામે પણ ચીને તીવ્ર વાંધો ઉઠાવ્યો હતો. હવે લદ્દાખના ૨૮ સ્થળોને સત્તાવાર નકશામાં અંકિત કરીને ભારતે સ્પષ્ટ સંદેશ આપ્યો છે કે ભારત પોતાની સરહદો અને પ્રદેશો પર પૂરી મજબૂતી અને સાર્વભૌમત્વ સાથે અડીખમ ઊભું છે.