નવી દિલ્હી : રાષ્ટ્રીય ધોરીમાર્ગો (National Highways) પર મુસાફરી કરતા કરોડો વાહનચાલકો માટે કેન્દ્ર સરકાર તરફથી એક અત્યંત રાહતના અને ઉત્સાહજનક સમાચાર સામે આવ્યા છે. ભારત હવે ઝડપથી સંપૂર્ણપણે ડિજિટલ અને બેરિયર-મુક્ત (અવરોધ-મુક્ત) ટોલિંગ સિસ્ટમ તરફ આગળ વધી રહ્યું છે. ગ્લોબલ ફિનટેક ફેસ્ટ ૨૦૨૬ ને સંબોધિત કરતા કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ જાહેરાત કરી છે કે ફેબ્રુઆરી-માર્ચ ૨૦૨૭ સુધીમાં દેશભરમાં આર્ટિફિશિયલ ઇન્ટેલિજન્સ (AI) આધારિત સીમલેસ ટોલ સિસ્ટમ અમલી બનાવી દેવામાં આવશે. આ નવી સિસ્ટમ લાગુ થયા બાદ વાહનોને ટોલ પ્લાઝા પર ઉભા રહેવાની બિલકુલ જરૂર રહેશે નહીં.

આગામી AI-આધારિત નવી ટેકનોલોજી ઓટોમેટિક વ્હીકલ નંબર પ્લેટ રેકગ્નિશન (ANPR) અને FASTag ને એકીકૃત (Integrate) કરીને કામ કરશે. જેના કારણે હાઇવે પરથી પસાર થતી વખતે વાહનોની સ્પીડ ઘટાડ્યા વગર જ આપોઆપ ટોલ કપાત થઈ જશે અને ટોલ પ્લાઝા પર રાહ જોવાનો સમય ઝીરો થઈ જશે. નીતિન ગડકરીએ જણાવ્યું હતું કે, આ ક્રાંતિકારી સુધારાથી ટોલ વસૂલાતમાં પારદર્શિતા આવશે અને લિકેજ અટકતા સરકારની વાર્ષિક ટોલ આવકમાં આશરે ₹૧૦,૦૦૦ કરોડનો મોટો વધારો થવાની ધારણા છે. ઉલ્લેખનીય છે કે, હાલમાં ૯૮ ટકાથી વધુ વાહનો FASTag નો ઉપયોગ કરે છે, જેનાથી અગાઉનો ૧૨ થી ૩૦ મિનિટનો રાહ જોવાનો સમય ૮૦ થી ૯૦ ટકા સુધી ઘટી ગયો છે.

આ સાથે જ કેન્દ્રીય મંત્રીએ FASTag યુઝર્સ માટે 'OneTag' નામની નવી અને અત્યંત સગવડભરી સુવિધા પણ લોન્ચ કરી છે. આ સુવિધા હેઠળ જો કોઈ વાહનચાલક પોતાની બેંક બદલવા માંગતો હોય, તો તેણે જૂનો FASTag ઉખાડીને નવો ટેગ ખરીદવાની જરૂર નહીં પડે. યુઝર્સ પોતાના વાહનમાં લગાવેલા જૂના FASTag ને જ બીજી બેંક સાથે સરળતાથી પોર્ટ (Link) કરી શકશે. ભવિષ્યના હાઇવે સ્માર્ટ, મુશ્કેલી-મુક્ત અને કેશલેસ બનાવીને ભારત માર્ગ પરિવહન ક્ષેત્રે એક નવો ઇતિહાસ રચવા જઈ રહ્યું છે.