બાલાસોર : ભારતે સંરક્ષણ ક્ષેત્રે આજે એક નવો અધ્યાય લખીને વિશ્વને પોતાની સામરિક તાકાતનો પરચો આપ્યો છે. ઓડિશાના ડૉ. એપીજે અબ્દુલ કલામ દ્વીપ પરથી ‘અગ્નિ’ મિસાઈલના અત્યાધુનિક સંસ્કરણનું સફળ ઉડાન પરીક્ષણ કરવામાં આવ્યું છે. આ સિદ્ધિ એટલા માટે વિશેષ છે કારણ કે આ મિસાઈલ 'મલ્ટિપલ ઇન્ડિપેન્ડન્ટલી ટાર્ગેટેડ રી-એન્ટ્રી વ્હીકલ' (MIRV) ટેકનોલોજીથી સજ્જ છે, જે ભારતને ગણ્યાગાંઠ્યા દેશોની ક્લબમાં સામેલ કરે છે.
શું છે MIRV ટેકનોલોજી અને તેની તાકાત?
MIRV ટેકનોલોજી ભારત માટે ગેમ-ચેન્જર સાબિત થશે. આ ટેકનોલોજીની મદદથી એક જ મિસાઈલ અલગ-અલગ પેલોડ્સ (Payloads) સાથે ઉડાન ભરી શકે છે અને આકાશમાં પહોંચ્યા બાદ તે જુદા-જુદા દિશામાં રહેલા અનેક દુશ્મન ઠેકાણાઓને એકસાથે નિશાન બનાવી શકે છે. પરીક્ષણ દરમિયાન, મિસાઈલે હિંદ મહાસાગર ક્ષેત્રમાં રાખવામાં આવેલા લક્ષ્યોને અત્યંત ચોકસાઈપૂર્વક વીંધી નાખ્યા હતા. ટ્રેકિંગ સ્ટેશનો અને જહાજો દ્વારા કરાયેલા નિરીક્ષણમાં આ પરીક્ષણ તમામ ટેકનિકલ માપદંડો પર ૧૦૦% સફળ રહ્યું છે.
આત્મનિર્ભર ભારતનું નવું સીમાચિહ્ન
ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશન (DRDO) દ્વારા સંપૂર્ણપણે સ્વદેશી રીતે વિકસિત આ મિસાઈલ ‘આત્મનિર્ભર ભારત’નું ઉત્તમ ઉદાહરણ છે. દેશના વિવિધ ઉદ્યોગોના સહયોગથી તૈયાર થયેલી આ ટેકનોલોજી ભારતની સુરક્ષા પ્રણાલીને વધુ મજબૂત બનાવશે. સંરક્ષણ મંત્રી રાજનાથ સિંહે આ ઐતિહાસિક સફળતા બદલ વૈજ્ઞાનિકો અને સેનાની ટીમને અભિનંદન પાઠવ્યા છે.
દુશ્મનો માટે સ્પષ્ટ સંદેશ
આ પરીક્ષણ માત્ર એક તકનીકી સિદ્ધિ નથી, પરંતુ ભવિષ્યના જોખમો સામે ભારતનું અભેદ સુરક્ષા કવચ છે. સંરક્ષણ મંત્રીએ જણાવ્યું કે આ ટેકનોલોજીથી ભારતની સામરિક શક્તિમાં જબરદસ્ત વધારો થશે, જે વધતા જતા વૈશ્વિક જોખમો અને પડોશી દેશોના પડકારો સામે દેશને વધુ સુરક્ષિત અને સજ્જ બનાવશે.