ભારતના રાષ્ટ્રીય સુરક્ષા સલાહકાર અજિત ડોભાલે દેશના આર્થિક ભવિષ્ય અને યુવા શક્તિને લઈને એક અત્યંત મહત્વપૂર્ણ અને આશાસ્પદ દ્રષ્ટિકોણ રજૂ કર્યો છે. IIT રૂરકીના દીક્ષાંત સમારોહમાં મુખ્ય અતિથિ તરીકે ઉપસ્થિત રહેલા NSA અજિત ડોભાલે દેશના આર્થિક ભવિષ્યનો રોડમેપ રજૂ કરતા સ્પષ્ટ કહ્યું કે ભારત હાલમાં એક અભૂતપૂર્વ અને ઐતિહાસિક પરિવર્તનના તબક્કામાંથી પસાર થઈ રહ્યો છે. તેમણે દેશની આર્થિક તાકાતનો ચિતાર આપતા જણાવ્યું કે ભારતનો વર્તમાન GDP $૪.૦૧૫ ટ્રિલિયન છે, જે આગામી ૨૦ વર્ષના ગાળામાં ઉછળીને $૩૮ ટ્રિલિયન સુધી પહોંચવાની પ્રબળ ક્ષમતા ધરાવે છે. વડાપ્રધાન નરેન્દ્ર મોદીના ૨૦૪૭ સુધીના "અમૃત કાળ"ના વિઝનનો ઉલ્લેખ કરતા તેમણે ઉમેર્યું કે વર્તમાન યુવા પેઢી અત્યંત ભાગ્યશાળી છે કે તેઓ દેશના આ સુવર્ણ યુગના સાક્ષી અને મુખ્ય ભાગીદાર બની રહ્યા છે.

નવા સ્નાતકો અને દેશના ભાવિ ગણિતશાસ્ત્રીઓ-ટેકનોક્રેટ્સને સંબોધતા અજિત ડોભાલે જીવનમાં પડકારો સામે હિંમતપૂર્વક અડીખમ રહેવાની ખાસ સલાહ આપી હતી. તેમણે રામાયણનો પ્રેરણાદાયી પ્રસંગ ટાંકતા કહ્યું કે, જ્યારે રાક્ષસોનો સંહાર કરવાનો સમય આવ્યો ત્યારે મહર્ષિ વિશ્વામિત્રએ ભગવાન રામના અસાધારણ સાહસ અને નિર્ભય સ્વભાવને કારણે જ તેમની પસંદગી કરી હતી. આ જ રીતે વર્તમાન સમયના યુવાનોએ પણ દેશ અને સમાજ સામે આવતા વિઘ્નોનો સામનો કરવા માટે સાહસ, નિશ્ચય અને હિંમત કેળવવી પડશે, કારણ કે ભવિષ્યના ભારતનું સુકાન હવે તેમના હાથમાં છે.

પોતાની કરિયરના શરૂઆતના દિવસોને યાદ કરતા ડોભાલે સિક્કિમમાં બોર્ડર ઇન્ટેલિજન્સ પોસ્ટિંગ સમયનો એક રસપ્રદ કિસ્સો શેર કર્યો હતો. એક મુશ્કેલ મિશન અને તપાસ દરમિયાન હતાશ થયેલા ડોભાલને આઇબીના એક વરિષ્ઠ તિબેટીયન શેરપાએ "મૅપ રીડિંગ" (નકશા વાચન) પરથી સફળતાના ૩ ગોલ્ડન મંત્રો શીખવ્યા હતા:
૧. તમારી વર્તમાન સ્થિતિ: નકશા પર તમે હાલ ક્યાં ઊભા છો તેની સ્પષ્ટ સમજ હોવી જોઇએ.
૨. ધ્યેયની સ્પષ્ટતા: તમારે ક્યાં જવું છે તે લક્ષ્ય સુનિશ્ચિત હોવું જોઇએ.
૩. કાર્ય યોજના: ત્યાં પહોંચવાનો અને સુરક્ષિત પાછા ફરવાનો સચોટ માર્ગ ખબર હોવી જોઇએ.
તેમણે વિદ્યાર્થીઓને આ ૩ મંત્રો જીવનમાં ઉતારી દેશને આર્થિક મહાસત્તા બનાવવામાં સક્રિય યોગદાન આપવા આહ્વાન કર્યું હતું.