નવી દિલ્હી : ભારતના સ્વપ્નસમાન અને દેશના પ્રથમ હાઈ-સ્પીડ રેલ પ્રોજેક્ટને લઈને અતિ મહત્વના અને ઉત્સાહજનક સમાચાર સામે આવ્યા છે. ભારતની પ્રથમ બુલેટ ટ્રેન વર્ષ ૨૦૨૭ થી પાટા પર દોડતી થઈ જશે. હાલમાં હાઈ-સ્પીડ ટ્રેક, આધુનિક સ્ટેશનો, નદીઓ પરના બ્રિજ અને દરિયાઈ ટનલનું નિર્માણ કાર્ય યુદ્ધના ધોરણે ચાલી રહ્યું છે. જ્યારે આ બુલેટ ટ્રેન પોતાની પૂરી તાકાતથી દોડશે ત્યારે તેની મહત્તમ સ્પીડ ૩૨૦ કિલોમીટર પ્રતિ કલાક ની રહેશે.

રેલવે મંત્રાલયે સોશિયલ મીડિયા પ્લેટફોર્મ 'X' પર બુલેટ ટ્રેન કોરિડોરની કામગીરી દર્શાવતો એક વિશેષ વીડિયો શેર કર્યો છે, જેના કેપ્શનમાં લખવામાં આવ્યું છે કે: "બુલેટ ટ્રેન આગામી વર્ષે પટરીઓ પર દોડવા માટે તૈયાર!"

સુરત-વાપી સેક્શનમાં રોકેટ ગતિએ ચાલી રહ્યું છે કામ

રેલવે મંત્રી અશ્વિની વૈષ્ણવના જણાવ્યા અનુસાર, ૫૦૮ કિલોમીટર લાંબા મુંબઈ-અમદાવાદ બુલેટ ટ્રેન કોરિડોરનો પ્રથમ તબક્કો સૌથી પહેલા શરૂ કરવામાં આવશે. આ કુલ કોરિડોર પૈકી ૩૪૮ કિલોમીટરનો હિસ્સો ગુજરાતમાં આવે છે. મંત્રાલય દ્વારા જાહેર કરાયેલા વીડિયોમાં સુરતથી વાપી વચ્ચેના ૧૦૦ કિલોમીટરના સેક્શન પર રેલવે બ્રિજ, સ્ટેશન અને ટનલ નિર્માણમાં રાત-દિવસ કાર્યરત એન્જિનિયરો અને કર્મચારીઓ જોઈ શકાય છે, જે દર્શાવે છે કે આ લાઈનનું કામ આગામી વર્ષ સુધીમાં પૂર્ણ થઈ જશે.

અમદાવાદથી મુંબઈ માત્ર ૨ કલાકમાં, નક્કી કરાયા ૧૨ સ્ટેશનો

અમદાવાદ અને મુંબઈ વચ્ચે હાલમાં ટ્રેન દ્વારા મુસાફરી કરવામાં સામાન્ય રીતે ૬ કલાકથી વધુ સમય લાગે છે, પરંતુ બુલેટ ટ્રેન શરૂ થતાં આ સફર માત્ર ૨ કલાકમાં પૂરી થઈ જશે. બુલેટ ટ્રેન સરેરાશ ૩૦૦ કિમી/કલાકની ઝડપે દોડશે.

આ સમગ્ર બુલેટ ટ્રેન કોરિડોર પર કુલ ૧૨ સ્ટેશનો નક્કી કરવામાં આવ્યા છે:

• પ્રથમ સ્ટેશન: સાબરમતી (અમદાવાદ)

• વચ્ચેના સ્ટેશનો: અમદાવાદ, આણંદ, વડોદરા, ભરૂચ, સુરત, બીલીમોરા, વાપી, બોઈસર, વિરાર, થાણે

• અંતિમ સ્ટેશન: મુંબઈ (બીકેસી)

બુલેટ ટ્રેન શરૂ થવાથી ગુજરાત અને મહારાષ્ટ્ર વચ્ચે વેપાર-ઉદ્યોગ અને પ્રવાસનને અભૂતપૂર્વ વેગ મળશે.