નવી દિલ્હી :  ભારતના ગ્રીન એનર્જી અભિયાન અને ઇથેનોલ બ્લેન્ડેડ પેટ્રોલ કાર્યક્રમે દેશના ઇંધણ ક્ષેત્રે એક અદ્ભુત ક્રાંતિ સર્જી છે. સંસદના રાજ્યસભા સત્ર દરમિયાન પેટ્રોલિયમ અને કુદરતી ગેસ રાજ્યમંત્રી સુરેશ ગોપીએ આપેલા લેખિત જવાબમાં ખુલાસો કર્યો છે કે જાહેર ક્ષેત્રની તેલ માર્કેટિંગ કંપનીઓ એ ઇથેનોલ ખરીદી પાછળ અત્યાર સુધીમાં ₹1.72 લાખ કરોડથી વધુનો પ્રચંડ ખર્ચ કર્યો છે. ઇથેનોલ સપ્લાય વર્ષ  2023-24 માં ₹48,757 કરોડ, ESY 2024-25 માં ₹73,996 કરોડ અને ચાલુ ESY 2025-26 માં જૂન મહિના સુધી જ ₹49,577 કરોડનું વિશાળ રોકાણ ઇથેનોલના પુરવઠા માટે કરવામાં આવ્યું છે.

આ મહાઅભિયાનને વેગ આપવા માટે સમગ્ર દેશમાંથી શેરડીના જ્યુસ, મોલાસીસ, ક્ષતિગ્રસ્ત અનાજ, મકાઈ અને FCI પાસે બચેલા ચોખા જેવા સ્ત્રોતોમાંથી મોટા પાયે બાયોફ્યુઅલનું ઉત્પાદન કરવામાં આવી રહ્યું છે. 16 જુલાઈ, 2026 સુધીના આંકડા મુજબ, દેશભરમાં નિર્જળ ઇથેનોલ સપ્લાય કરવા માટે 501 જેટલા વિશાળ ઉત્પાદન એકમોની નોંધણી કરવામાં આવી ચૂકી છે. આ રેસમાં ઇન્ડિયન ઓઇલ , ભારત પેટ્રોલિયમ અને હિન્દુસ્તાન પેટ્રોલિયમ  જેવી જાહેર ક્ષેત્રની કંપનીઓ પોતે પણ દૈનિક સેંકડો કિલોલિટર ઇથેનોલનું ઉત્પાદન કરીને દેશને આત્મનિર્ભરતા તરફ ઝડપથી આગળ ધપાવી રહી છે.

બીજી તરફ, દેશના વિવિધ રાજ્યોમાં ઇથેનોલ-મિશ્રિત પેટ્રોલના વપરાશમાં અભૂતપૂર્વ ઉછાળો જોવા મળ્યો છે. ESY 2024-25 દરમિયાન અકલ્પનીય 124.98 કરોડ લિટર ઇથેનોલ-મિશ્રિત પેટ્રોલના વેચાણ સાથે ઉત્તર પ્રદેશ સમગ્ર દેશમાં પ્રથમ ક્રમે રહ્યું છે, જ્યારે 110.66 કરોડ લિટર સાથે મહારાષ્ટ્ર બીજા અને 92.18 કરોડ લિટર સાથે તમિલનાડુ ત્રીજા ક્રમે છે. આ યાદીમાં ગુજરાત પણ 56.29 કરોડ લિટરના વપરાશ સાથે અગ્રણી રાજ્યોમાં સામેલ છે. મજબૂત સ્થાનિક સપ્લાય નેટવર્કના કારણે ભારત હવે વિદેશી ક્રૂડ ઓઇલ પરની પોતાની નિર્ભરતા ઘટાડીને ટકાઉ અને સ્વચ્છ ઊર્જાના એક નવા યુગમાં પ્રવેશી ચૂક્યું છે.