રાજકોટ: સમુદ્રી સુરક્ષાના મામલે ભારતીય નૌકાદળે (Indian Navy) ફરી એકવાર વૈશ્વિક મંચ પર પોતાનો ડંકો વગાડ્યો છે. આંતરરાષ્ટ્રીય સ્તરે અત્યંત સંવેદનશીલ ગણાતા એડનના અખાત (Gulf of Aden) માં બુધવારે રાત્રે ભારતીય નૌકાદળે અદભુત બહાદુરી બતાવીને એક મોટા હાઇજેકિંગના કાવતરાને નિષ્ફળ બનાવી દીધું છે. ભારત તરફ આવી રહેલા એક મહત્વપૂર્ણ વેપારી કાર્ગો જહાજ 'MV ગોલ્ડન આર્સેનલ' પર હથિયારબંધ સમુદ્રી ચાંચિયાઓએ હુમલો કરીને તેને કબજે કરવાનો પ્રયાસ કર્યો હતો, પરંતુ ભારતીય નૌકાદળના યુદ્ધ જહાજ INS ત્રિકંદ અને ચુનંદા 'માર્કોસ' (MARCOS) કમાન્ડોએ સમયસૂચકતા વાપરીને આ ઓપરેશન સફળતાપૂર્વક પાર પાડ્યું હતું.
સંકટનો કોલ મળતા જ INS ત્રિકંદ એક્શનમાં આવ્યું
નૌકાદળના સત્તાવાર સૂત્રો પાસેથી મળતી માહિતી મુજબ, વેપારી જહાજ 'MV ગોલ્ડન આર્સેનલ' પર જ્યારે શંકાસ્પદ ચાંચિયાઓએ આક્રમણ કર્યું, ત્યારે જહાજ પર સવાર ક્રૂ મેમ્બર્સે (જેમાં એક ભારતીય નાગરિક પણ સામેલ હતો) સ્ટાન્ડર્ડ એન્ટી-પાયરસી પ્રોટોકોલનું પાલન કર્યું હતું. તેઓએ તાત્કાલિક પોતાની જાતને જહાજના એક અત્યંત સુરક્ષિત રૂમમાં લોક કરી દીધી હતી, જેને દરિયાઈ ભાષામાં 'સ citadel' (કિલ્લો) કહેવામાં આવે છે. આ રૂમમાંથી જ ક્રૂ મેમ્બર્સે કમ્યુનિકેશન ચેનલ દ્વારા ભારતીય નૌકાદળનો સંપર્ક કરીને મદદ માંગી હતી. મેસેજ મળતા જ એડનના અખાતમાં તૈનાત ભારતીય યુદ્ધ જહાજ INS ત્રિકંદ ફૂલ સ્પીડે ઘટનાસ્થળ તરફ રવાના થયું હતું.
ભારતીય નૌકાદળનો ખોફ: ચાંચિયાઓ મેદાન છોડી ભાગ્યા
જેમ જેમ ભારતીય નૌકાદળનું શક્તિશાળી યુદ્ધ જહાજ INS ત્રિકંદ હાઇજેક થયેલા જહાજની નજીક પહોંચવા લાગ્યું, તેમ તેમ સમુદ્રી લૂંટારુઓમાં ફફડાટ વ્યાપી ગયો હતો. ભારતીય નૌકાદળની આક્રમકતા અને તાકાત જોઈને ચાંચિયાઓએ જહાજ પર કબજો કરવાનો પોતાનો ઈરાદો પડતો મૂક્યો અને ધરપકડના ડરથી પોતાની નાની બોટ લઈને અંધારામાં જ ઘટનાસ્થળેથી રફુચક્કર થઈ ગયા હતા.
ઘાતક મરીન 'માર્કોસ' કમાન્ડોનું ઓપરેશન: ચાંચિયાઓ ભાગી ગયા હોવા છતાં જોખમ હજુ ટળ્યું ન હતું. આથી INS ત્રિકંદ પરથી ભારતીય નૌકાદળના ચુનંદા અને અત્યંત ખતરનાક ગણાતા 'માર્કોસ' (Marine Commandos) કમાન્ડો હેલિકોપ્ટર અને બોટ મારફતે કાર્ગો જહાજ પર ઉતર્યા હતા. માર્કોસ કમાન્ડોએ આખા જહાજ ખૂણે-ખૂણેથી સર્ચ કરીને 'સેનિટાઇઝ' કર્યું હતું, જેથી ખાતરી કરી શકાય કે કોઈ ચાંચિયો જહાજમાં છુપાયેલો નથી. કમાન્ડોએ લીલી ઝંડી આપ્યા બાદ કિલ્લામાં છુપાયેલા ક્રૂ મેમ્બર્સ બહાર આવ્યા હતા અને જહાજે ભારત તરફની પોતાની સફર ફરી શરૂ કરી હતી.
વૈશ્વિક વ્યાપારની સુરક્ષામાં ભારત મોખરે
આ કાર્ગો જહાજ ભારત માટે આર્થિક રીતે અત્યંત મહત્વપૂર્ણ એવો કિંમતી માલસામાન લઈને આવી રહ્યું હતું. પશ્ચિમ એશિયા અને આફ્રિકાના દરિયાઈ વિસ્તારોમાં તાજેતરના સમયમાં ચાંચિયાગીરી અને ડ્રોન હુમલાની ઘટનાઓ વધી છે, ત્યારે ભારતીય નૌકાદળ દ્વારા આ વિસ્તારમાં સતત પેટ્રોલીંગ કરવામાં આવી રહ્યું છે. આ સફળ ઓપરેશને ફરી એકવાર સાબિત કરી દીધું છે કે હિંદ મહાસાગર અને તેની આસપાસના વિસ્તારોમાં કોઈપણ વેપારી જહાજની સુરક્ષા માટે ભારતીય નૌકાદળ એક અદ્રશ્ય અને મજબૂત ઢાલ સમાન છે.