વોશિંગ્ટન: ભારત અને અમેરિકા વચ્ચેના આર્થિક સંબંધો હવે એક નવી ઊંચાઈએ પહોંચી રહ્યા છે. ભારતીય કંપનીઓએ અમેરિકાના વિવિધ ક્ષેત્રોમાં ૨૦.૫ બિલિયન ડોલર (અંદાજે ૧.૭ લાખ કરોડ રૂપિયા) થી વધુનું રોકાણ કરવાની યોજના બનાવી છે. ભારતમાં અમેરિકાના રાજદૂત સર્જિયો ગોરે આ ગતિશીલતાને રાષ્ટ્રપતિ ડોનાલ્ડ ટ્રમ્પના આર્થિક નેતૃત્વ અને બંને દેશો વચ્ચેના અતૂટ વિશ્વાસનું સીધું પરિણામ ગણાવ્યું છે.
એક જ દિવસમાં રોકાણનો રેકોર્ડ
રાજદૂત સર્જિયો ગોરે સોશિયલ મીડિયા પ્લેટફોર્મ 'X' પર એક પોસ્ટ દ્વારા માહિતી આપી હતી કે, ૧૨ ભારતીય કંપનીઓએ માત્ર એક જ દિવસમાં ૧.૧ બિલિયન ડોલરના નવા રોકાણની જાહેરાત કરી છે. આ રોકાણ મુખ્યત્વે ટેકનોલોજી, મેન્યુફેક્ચરિંગ અને ફાર્માસ્યુટિકલ્સ જેવા મહત્વના ક્ષેત્રોમાં કરવામાં આવશે. ગોરે લખ્યું હતું કે, "આ ભાગીદારી અમેરિકામાં વાસ્તવિક નોકરીઓનું સર્જન કરી રહી છે અને બંને દેશો વચ્ચેની સપ્લાય ચેઈનને વધુ મજબૂત બનાવી રહી છે."
વિશ્વની સૌથી મોટી લોકશાહીઓનો વિજય
એમ્બેસેડરે વધુમાં ઉમેર્યું હતું કે, રોકાણનો આ પ્રવાહ એ વાતનો પુરાવો છે કે જ્યારે વિશ્વની બે સૌથી મોટી લોકશાહીઓ સાથે મળીને વ્યાપાર કરે છે, ત્યારે દરેકની જીત થાય છે. જોકે, તેમણે આ રોકાણ કરનારી ૧૨ કંપનીઓના નામ જાહેર કર્યા નથી, પરંતુ આ પગલાથી ભારત અને અમેરિકા વચ્ચેની વ્યૂહાત્મક ભાગીદારીને મોટું બળ મળશે તે નિશ્ચિત છે.
વેપારના આંકડામાં ભારતનું પલ્લું ભારે
તાજેતરના આંકડા મુજબ, અમેરિકાની એકંદર વેપાર ખાધમાં વધારો થયો હોવા છતાં, ભારત સામેની માલસામાનની ખાધમાં ગયા વર્ષની સરખામણીએ ઘટાડો જોવા મળ્યો છે. માર્ચ મહિનામાં અમેરિકાની ભારત તરફની નિકાસ વધીને ૪.૩ બિલિયન ડોલર થઈ હતી, જ્યારે ભારતમાંથી અમેરિકામાં ૮.૪ બિલિયન ડોલરની આયાત કરવામાં આવી હતી. આ આંકડાઓ સાબિત કરે છે કે વૈશ્વિક બજારમાં ભારતીય ઉત્પાદનો અને સેવાઓની માંગ સતત વધી રહી છે. હવે ભારતીય કંપનીઓ માત્ર નિકાસ જ નહીં, પણ અમેરિકાની ધરતી પર સીધું રોકાણ કરીને ત્યાંના અર્થતંત્રમાં પણ મહત્વનો ફાળો આપી રહી છે.