ભુવનેશ્વર, તા.૨૮: ઓડિશાના પારાદીપ બંદર નજીક ખુલ્લા દરિયામાં એક મસમોટી હોનારત ટળી ગઈ છે. બેલીઝ દેશનો ધ્વજ ધરાવતું અને ૯,૦૦૦ મેટ્રિક ટન પામ ઓઈલ ભરેલું 'એમટી સીગલ ૯' (MT Seagull 9) નામનું કેમિકલ ટેન્કર અચાનક દરિયામાં ડૂબવા લાગ્યું હતું. જાણે કાળ સામે આવીને ઊભો હોય તેવી ગંભીર પરિસ્થિતિ વચ્ચે ભારતીય કોસ્ટ ગાર્ડે (ICG) સમયસૂચકતા વાપરીને એક અત્યંત સાહસિક રેસ્ક્યૂ ઓપરેશન હાથ ધર્યું હતું અને જહાજમાં સવાર તમામ ૨૩ ક્રૂ મેમ્બર્સના જીવ બચાવી લીધા હતા.

મળતી વિગતો અનુસાર, ૨૭ સપ્ટેમ્બરના રોજ સવારે લગભગ ૭:૩૦ વાગ્યે ટેન્કરના મુખ્ય એન્જિનમાં અચાનક મોટી ખામી સર્જાઈ હતી. તેની સાથે જ જહાજની બેલાસ્ટ ટાંકીઓમાં ઝડપથી પાણી ભરાવાનું શરૂ થતાં ટેન્કર એક તરફ ખતરનાક રીતે ઝૂકી ગયું હતું. જહાજ પલટી જવાની તૈયારીમાં હતું ત્યારે જ ક્રૂ મેમ્બર્સ દ્વારા ઈમરજન્સી મેસેજ મોકલવામાં આવ્યો હતો. આ સંદેશ મળતાં જ કોસ્ટ ગાર્ડે તાત્કાલિક પોતાનું જહાજ 'આઈસીજીએસ વિશ્વસ્ત' (ICGS Vishwast) મદદ માટે રવાના કર્યું હતું.

ઘટનાસ્થળે પહોંચેલી કોસ્ટ ગાર્ડની વિશેષ ડેમેજ કંટ્રોલ ટીમે ભારે દરિયાઈ મોજાઓ વચ્ચે અસ્થિર થઈ ચૂકેલા ટેન્કર પર જઈને મોરચો સંભાળ્યો હતો. તેમણે સબમર્સિબલ ડી-ફ્લડિંગ પંપ અને સાધનોની મદદથી ટાંકીઓમાં ભરાયેલું પાણી બહાર કાઢવાનું શરૂ કર્યું અને લીક થઈ રહેલી સમુદ્રી પાઈપલાઈનોને સીલ કરી દીધી હતી. બીજી તરફ, પર્યાવરણને નુકસાન ન થાય તે માટે પોલ્યુશન કંટ્રોલ વેસલ અને ભુવનેશ્વરથી ડોર્નિયર વિમાન દ્વારા હવાઈ દેખરેખ રાખવામાં આવી હતી. શરૂઆતમાં સમુદ્ર પર પામ ઓઈલનું પાતળું સ્તર દેખાયું હતું, પરંતુ ત્વરિત પગલાંના કારણે તે સંપૂર્ણપણે ઓગળી ગયું હતું.

બહુવિધ એજન્સીઓના સંકલિત પ્રયાસો બાદ પારાદીપ પોર્ટ ઓથોરિટીના 'ડોલ્ફિન' ટગ દ્વારા અસ્થિર ટેન્કરને ખેંચીને સુરક્ષિત રીતે પારાદીપ એન્કરેજ વિસ્તારમાં લાવવામાં આવ્યું છે. ભારતીય કોસ્ટ ગાર્ડની આ સફળ ક્ષમતાના કારણે ૨૩ માનવજિંદગી બચવાની સાથે સાથે સમુદ્રી જીવસૃષ્ટિ પર તોળાતું મસમોટું સંકટ પણ ટળી ગયું છે.