ન્યૂ જર્સી, તા. 28: અમેરિકાના ન્યૂ જર્સીમાં ટેલિફોન પ્રોવાઈડર્સ અને ઈન્સ્યોરન્સ કંપનીઓ સાથે લાખો ડોલરની છેતરપિંડી કરવાના ગુનામાં એક ભારતીય નાગરિકને જેલની સજા ફટકારવામાં આવી છે. 35 વર્ષીય ધનંજય સિંહને આ મલ્ટી-મિલિયન ડોલરના કૌભાંડમાં તેની મુખ્ય ભૂમિકા બદલ યુએસ ડિસ્ટ્રિક્ટ જજ મેડલિન કોક્સ આર્લેઓએ 41 મહિનાની જેલની સજા સંભળાવી છે.
શું હતું આ આખું કૌભાંડ?
કોર્ટના દસ્તાવેજો અનુસાર, ધનંજય સિંહ જૂન 2013 થી જૂન 2019 દરમિયાન એક મોટા નેટવર્કનું સંચાલન કરતો હતો. તે અને તેના સાથીદારો ચોરાયેલી અથવા નકલી ઓળખ (Fake IDs) નો ઉપયોગ કરીને મોબાઈલ ફોન ખોવાઈ ગયા, ચોરાઈ ગયા અથવા ડેમેજ થયા હોવાના ખોટા વીમા દાવાઓ સબમિટ કરતા હતા. આ દાવાઓ દ્વારા તેઓ કંપનીઓ પાસેથી મોંઘા રિપ્લેસમેન્ટ ડિવાઈસ (નવા ફોન) મેળવી લેતા હતા.
નેટવર્ક અને વેચાણની પદ્ધતિ
આ ગેંગે ન્યૂ જર્સી સહિત સમગ્ર અમેરિકામાં મેઈલબોક્સ અને સ્ટોરેજ યુનિટ્સનું મોટું નેટવર્ક ઉભું કર્યું હતું. કંપનીઓ દ્વારા મોકલવામાં આવતા નવા ફોન આ લોકેશન્સ પર મેળવવામાં આવતા હતા. ત્યારબાદ, આ ફોનનો જથ્થો અમેરિકાની બહાર અન્ય દેશોમાં ત્રીજી પાર્ટીને વેચી દેવામાં આવતો હતો. આ સ્કીમના કારણે સેલ્યુલર કંપનીઓ અને વીમા કંપનીઓને કરોડો ડોલરનું નુકસાન થયું હતું.
કડક સજા અને દંડ
જજ આર્લેઓએ સિંહને 41 મહિનાની જેલ ઉપરાંત ત્રણ વર્ષના સુપરવાઈઝ્ડ રિલીઝ (કડક દેખરેખ હેઠળ મુક્તિ) ની સજા કરી છે. સૌથી મહત્વની વાત એ છે કે, કોર્ટે તેને 10 મિલિયન ડોલર (આશરે ₹83 કરોડથી વધુ) નુકસાનની ભરપાઈ (Restitution) તરીકે ચૂકવવાનો આદેશ આપ્યો છે.
તપાસમાં અનેક એજન્સીઓ સામેલ
આ કેસની તપાસ અત્યંત જટિલ હતી, જેમાં FBI (ફેડરલ બ્યુરો ઓફ ઇન્વેસ્ટિગેશન), યુએસ પોસ્ટલ ઇન્સ્પેક્શન સર્વિસ, હોમલેન્ડ સિક્યુરિટી અને સ્ટેટ ડિપાર્ટમેન્ટ જેવી અગ્રણી એજન્સીઓએ સાથે મળીને કામ કર્યું હતું. ધનંજય સિંહે અગાઉ કોર્ટમાં મેઈલ ફ્રોડ અને ચોરાયેલી મિલકતની હેરાફેરીના ગુનાની કબૂલાત કરી હતી. અમેરિકામાં આર્થિક ગુનાઓ સામે લેવામાં આવેલા આ કડક પગલાથી છેતરપિંડી કરતા તત્વોમાં ફફડાટ ફેલાયો છે.