નૈનીતાલ  : રશિયાના ક્રૂડ ઓઇલ સાથે ભારત આવી રહેલા 'MV Smyrtos' ટેન્કરના ભારતીય કેપ્ટન અજય પંતની બ્રિટિશ સત્તાવાળાઓ દ્વારા ધરપકડ કરવામાં આવી છે. ૪ જૂને રશિયાના ઉસ્ત-લુગા બંદરથી નીકળેલા આ ટેન્કરમાં ૧.૦૧ લાખ ટન ક્રૂડ ઓઇલ હતું, જે સિક્કા પોર્ટ (ગુજરાત) તરફ જઈ રહ્યું હતું. બ્રિટને તેમના પર રશિયા સંબંધિત આંતરરાષ્ટ્રીય પ્રતિબંધોનો ભંગ કરવાનો આરોપ મૂકી સાઉથહેમ્પ્ટન કોર્ટમાં રજૂ કર્યા છે, જ્યાં તેમને ન્યાયિક કસ્ટડીમાં મોકલી આપવામાં આવ્યા છે.

બ્રિટિશ કોર્ટ દ્વારા આ કેસની આગામી સુનાવણી ૧૬ જુલાઈએ બોર્નમાઉથ ક્રાઉન કોર્ટમાં નક્કી કરવામાં આવી છે. જો આ ગંભીર આરોપ સાબિત થાય તો કેપ્ટન પંતને ૧૦ વર્ષ સુધીની જેલની સજા થઈ શકે છે. બીજી તરફ, કેપ્ટન પંતના પરિવારજનોએ દાવો કર્યો છે કે તેઓ છેલ્લા ૧૫ વર્ષથી નિષ્કલંક સેવા આપી રહ્યા છે અને આ માત્ર કંપનીના નિર્દેશોનું પાલન હોવાથી તેમને ખોટી રીતે ફસાવવામાં આવી રહ્યા છે. હાલમાં જહાજ ડોર્સેટ કિનારા નજીક કડક દેખરેખ હેઠળ છે, જેમાં ૨૪ ક્રૂ સભ્યો અટવાયેલા છે.

આ ઘટના બાદ ઉત્તરાખંડ સરકારે તાત્કાલિક અસરથી કેન્દ્ર સરકાર અને વિદેશ મંત્રાલયનો સંપર્ક સાધ્યો છે. ભારતીય ઉચ્ચાયોગે પણ કેપ્ટન પંત સાથે કોન્સ્યુલર એક્સેસ મેળવી લીધો છે, જેથી કાયદાકીય મદદ અને તેમના બચાવ માટે પ્રક્રિયા હાથ ધરી શકાય. આંતરરાષ્ટ્રીય સ્તરે ક્રૂડ ઓઇલના પરિવહન પરના કડક નિયમો અને ભૌગોલિક રાજકીય તણાવ વચ્ચે એક ભારતીય નાગરિકની ધરપકડથી સમગ્ર મર્ચન્ટ નેવી સમુદાયમાં ચિંતાનું મોજું ફરી વળ્યું છે.

હવે આ મામલે ભારતીય વિદેશ મંત્રાલયની દરમિયાનગીરી બાદ શું સકારાત્મક પરિણામ આવે છે તે જોવું રહ્યું. આગામી સુનાવણીમાં કેપ્ટન પંતના બચાવ પક્ષ દ્વારા રજૂ કરવામાં આવનાર પુરાવા અને સરકારના રાજદ્વારી પ્રયાસો કેપ્ટન પંતની મુક્તિનો માર્ગ નક્કી કરશે. આ કેસ વૈશ્વિક પ્રતિબંધોના પાલન અને દરિયાઈ માર્ગે થતા વેપારના નિયમો અંગે પણ એક મહત્વપૂર્ણ કાનૂની દાખલો સ્થાપિત કરી શકે છે.