ગુઇયાંગ (ચીન): ચીનમાં રમાઈ રહેલા વર્લ્ડ બોક્સિંગ કપ 2 માં ભારતીય બોક્સરોએ પોતાની તાકાત અને કૌશલ્યનો પરચો આપીને ઇતિહાસ રચ્યો છે. સેમિફાઇનલના રોમાંચક મુકાબલાઓ બાદ ભારતે ૪ ફાઇનલિસ્ટ અને ૨ બ્રોન્ઝ મેડલ સાથે કુલ ૬ મેડલ સુરક્ષિત કરી લીધા છે. ભારતીય ખેલાડીઓનું આ પ્રદર્શન વૈશ્વિક સ્તરે બોક્સિંગમાં ભારતની વધતી જતી ઓળખને મજબૂત કરે છે.

ભારતીય મુક્કાબાજોનું પ્રભુત્વ

જ્યોતિ (૪૮ કિગ્રા) એ મેક્સિકોની મજબૂત પ્રતિસ્પર્ધી ફાતિમા હેરેરાને ૩-૨ થી હરાવીને ગોલ્ડ માટે દાવેદારી નોંધાવી છે. જ્યોતિની આ જીત એટલા માટે ખાસ છે કારણ કે હેરેરા વર્લ્ડ બોક્સિંગ કપ બ્રાઝિલમાં રજત ચંદ્રક જીતી ચૂકી છે. બીજી તરફ, વિશ્વની નંબર ૧ બોક્સર મીનાક્ષી (૫૧ કિગ્રા) એ સ્પેનની લૌરા ફુઅર્ટેસને ૫-૦ થી એકતરફી મુકાબલામાં હરાવીને પોતાની શ્રેષ્ઠતા સાબિત કરી છે.

તેમની સાથે જ, પ્રાચીએ ફ્રાન્સની અમીના ઝિદાનીને હરાવીને ફાઇનલમાં પ્રવેશ કર્યો છે. પ્રાચીએ ક્વાર્ટર ફાઇનલમાં પેરિસ ઓલિમ્પિકના મેડલ વિજેતાને હરાવીને પહેલા જ પોતાનું ફોર્મ બતાવી દીધું હતું. પુરુષોના વર્ગમાં દીપક (૭૦ કિગ્રા) એ ફ્રાન્સના મકન ટ્રોર સામે ૫-૦ થી ક્લિનિકલ જીત મેળવીને ભારતનો વિજય રથ આગળ વધાર્યો છે. જ્યારે જુગ્નુ અને નિખિલે સેમિફાઇનલમાં પરાજય છતાં બ્રોન્ઝ મેડલ સાથે દેશનું નામ રોશન કર્યું છે.

આવતીકાલે ગોલ્ડ માટે કાંટાની ટક્કર (૨૧ જૂન):

આવતીકાલનો દિવસ ભારતીય બોક્સિંગ માટે ખૂબ જ નિર્ણાયક છે, જ્યાં આપણા ચાર દિગ્ગજો ગોલ્ડ મેડલ માટે મેદાનમાં ઉતરશે:

·         ૪૮ કિગ્રા: જ્યોતિ વિ. ફરઝોના ફોઝિલોવા (ઉઝબેકિસ્તાન)

·         ૫૧ કિગ્રા: મીનાક્ષી વિ. વુ યુ (ચીન)

·         ૫૭ કિગ્રા: પ્રાચી વિ. નિગીના ઉક્તામોવા (ઉઝબેકિસ્તાન)

·         ૭૦ કિગ્રા: દીપક વિ. અબલાઈખાન ઝુસુપોવ (કઝાકિસ્તાન)

ચાર બોક્સરો ગોલ્ડ મેડલની નજીક હોવાથી ભારત હવે મેડલ ટેલીમાં ટોચનું સ્થાન મેળવવાની આશા રાખી રહ્યું છે.