ન્યૂ યોર્ક : તબીબી વિજ્ઞાનના ક્ષેત્રમાં ભારતીય મૂળના ડોક્ટરો ફરી એકવાર વિદેશમાં ભારતનું નામ રોશન કરી રહ્યા છે. અમેરિકી આર્મીના ભારતીય-અમેરિકન સર્જન મેજર જગતકુમાર પટેલે ખોપરી ખોલ્યા વિના જ મગજની ગાંઠ (Brain Tumor) દૂર કરવાની એક નવીન અને અત્યંત સુરક્ષિત સર્જિકલ તકનીક વિકસાવી છે. આ નવીનતમ ઓપરેશન પદ્ધતિને કારણે દર્દીને ચીરા કે મોટા ટાંકા વગર ઝડપથી રિકવરી મેળવવામાં મોટી મદદ મળે છે.

પેન્ટાગોનના અહેવાલ મુજબ, મેજર જગતકુમાર પટેલ અને આર્મી ન્યુરોસર્જન લેફ્ટનન્ટ કર્નલ ચાર્લ્સ મિલરે નાકના માર્ગેથી મગજના તળિયે (Skull Base) પહોંચીને ગાંઠ કાઢવાની આ અનોખી રીત શોધી કાઢી છે. તાજેતરમાં, તેમણે વોલ્ટર રીડ આર્મી નેશનલ મેડિકલ સેન્ટર ખાતે મરીન સ્ટાફ સાર્જન્ટ એન્ડી આર્ચર નામના દર્દી પર આ જટિલ સર્જરી સફળતાપૂર્વક પાર પાડી હતી. દર્દી છેલ્લા 15 વર્ષથી સતત માથાના દુખાવાથી પીડાતા હતા અને તેમની ઓપ્ટિક ચેતા પર ગોલ્ફ બોલ જેટલી (4.4 સેમી) મોટી ગાંઠ દબાણ કરી રહી હતી.

નવીન સર્જિકલ તકનીકની મુખ્ય ખાસિયતો:

·         ચીરા વિના સર્જરી: ખોપરી કાપવાને બદલે નાકના કુદરતી માર્ગમાંથી જ મગજ સુધી પહોંચીને ગાંઠ દૂર કરાઈ.

·         હાઈ-ડેફિનેશન એન્ડોસ્કોપિક કેમેરા: સર્જનને અંદરનું ક્લોઝ-અપ વિઝ્યુલાઇઝેશન પૂરું પાડવા માટે ખાસ કેમેરા ટેકનોલોજીનો ઉપયોગ થયો.

·         ઝડપી રિકવરી: સર્જરીના માત્ર બે જ દિવસમાં દર્દી સંપૂર્ણ ભાનમાં બેસતો થઈ ગયો અને તેની દ્રષ્ટિ પણ સ્પષ્ટ થઈ ગઈ.

મેજર પટેલે આ સફળતા વિશે નમ્રતાપૂર્વક જણાવતા કહ્યું, "ઐતિહાસિક રીતે આવી મોટાભાગની બ્રેઈન સર્જરી ખોપરી ખોલીને ખુલ્લામાં કરવામાં આવતી હતી, જે દર્દી માટે ખૂબ જ પીડાદાયક અને જોખમી હતી. પરંતુ જો ગાંઠ યોગ્ય કદ અને જગ્યા પર હોય, તો હવે નાક દ્વારા જ શ્રેષ્ઠ એક્સેસ મેળવીને તેને સંપૂર્ણપણે દૂર કરી શકાય છે." તબીબી જગતમાં આ અનોખા સંશોધનને ન્યુરોસર્જરીના ક્ષેત્રમાં એક ક્રાંતિકારી પગલું ગણાવવામાં આવી રહ્યું છે.