નવી દિલ્હી:  ભારત અને ઉઝબેકિસ્તાને પોતાના દ્વિપક્ષીય સંબંધોને એક નવો વળાંક આપતાં વ્યાપક વ્યૂહાત્મક ભાગીદારી  સ્તર સુધી પહોંચાડ્યા છે. તાશ્કંદ ખાતે વડાપ્રધાન નરેન્દ્ર મોદી અને ઉઝબેકિસ્તાનના રાષ્ટ્રપતિ શવકત મિર્ઝીયોયેવ વચ્ચે યોજાયેલી આઈકોનિક બેઠક બાદ બંને દેશોએ પરમાણુ ઊર્જા ક્ષેત્રે ભારતની જરૂરિયાતોને પૂર્ણ કરવા માટે લાંબા ગાળાના યુરેનિયમ સપ્લાય રોડમેપ પર મોટો કરાર કર્યો છે. આ સાથે જ વર્ષ ૨૦૩૦ સુધીમાં દ્વિપક્ષીય વેપારને ૫ બિલિયન ડોલર સુધી લઈ જવાનો મહત્વાકાંક્ષી ધ્યેય નક્કી કરવામાં આવ્યો છે, જે બંને દેશો વચ્ચેના આર્થિક સંબંધોમાં નવી ઊર્જા પૂરશે.

ડિજિટલ ટ્રાન્સફોર્મેશન ક્ષેત્રે પણ એક ક્રાંતિકારી મિશન શરૂ કરવામાં આવ્યું છે, જેના હેઠળ ભારતની ગ્લોબલ ડિજિટલ પેમેન્ટ સિસ્ટમ 'UPI' ને ઉઝબેકિસ્તાનની 'UZQR' સિસ્ટમ સાથે સફળતાપૂર્વક સાંકળી લેવાશે. આ સિસ્ટમ સક્રિય થતાં હવે ભારતીય પ્રવાસીઓ અને વેપારીઓ ઉઝબેકિસ્તાનમાં પોતાની સ્થાનિક UPI એપ્લિકેશન દ્વારા સરળતાથી UZQR કોડ સ્કેન કરીને રૂબરુ ચુકવણી કરી શકશે. આ ઉપરાંત સાંસ્કૃતિક વિનિમય, પર્યાવરણ, પરંપરાગત આયુર્વેદ, ઉચ્ચ શિક્ષણ, પ્રવાસન અને સમરકંદ પ્રદેશ તથા ગુજરાત વચ્ચે વિશિષ્ટ સિસ્ટર-સ્ટેટ ભાગીદારી સંબંધ સ્થાપવા સહિત કુલ ૧૧ કરારો પર હસ્તાક્ષર કરવામાં આવ્યા છે.

આ મુલાકાત દરમિયાન ભારતે મધ્ય એશિયા સાથેના પોતાના પ્રાચીન સભ્યતા સંબંધોને ઉજાગર કરવા માટે પણ અનેક મોટી ઘોષણાઓ કરી છે. ઉઝબેકિસ્તાનના ટર્મેઝ સ્થિત ફયાઝ ટેપા અને કારા ટેપા બૌદ્ધ વારસાના સંરક્ષણ અને પુનઃસ્થાપન માટે ખાસ સંમતિ દર્શાવવામાં આવી છે. વધુમાં, અરલ સમુદ્ર વિસ્તારમાં પર્યાવરણીય સુધારણા અને વનીકરણ માટે ભારતે $1 મિલિયન ડોલરની સહાયની જાહેરાત કરી છે, જ્યારે તાશ્કંદમાં હિન્દી શિક્ષણને વેગ આપવા ૧૦૦ લાલ બહાદુર શાસ્ત્રી શિષ્યવૃત્તિઓ અને ICCR સંસ્કૃત ચેર સ્થાપવાની ઐતિહાસિક જાહેરાત કરવામાં આવી છે.