નવી દિલ્હી : સંયુક્ત રાષ્ટ્રના વૈશ્વિક મંચ પર ફરી એકવાર ભારતે પાકિસ્તાનના ભારત વિરોધી રાજકીય પ્રોપોગેન્ડાની આકરી ટીકા કરતા જડબાતોડ જવાબ આપ્યો છે. સંયુક્ત રાષ્ટ્ર મહાસભાની ત્રીજી સમિતિની બેઠક દરમિયાન 'લઘુમતી મુદ્દાઓ પર વિશેષ પ્રતિવેદક' સાથેની ચર્ચા વેળાએ પાકિસ્તાની પ્રતિનિધિઓએ ફરીથી કાશ્મીરનો મુદ્દો ઉઠાવવાનો નિષ્ફળ પ્રયાસ કર્યો હતો. ભારતના પ્રથમ સચિવ રઘુ પુરીએ પાકિસ્તાનના આ પાયાવિહોણા નિવેદનોનો કડક શબ્દોમાં વિરોધ કરતા જણાવ્યું કે પાકિસ્તાન પોતાના સંકુચિત રાજકીય હેતુઓ માટે યુએનના ગૌરવપૂર્ણ મંચનો સતત દુરુપયોગ કરી રહ્યું છે, જેની નીચી માનસિકતા હવે આંતરરાષ્ટ્રીય સ્તરે ખુલ્લી પડી ચૂકી છે.

સમગ્ર વિશ્વ સમક્ષ મક્કમતાપૂર્વક રાષ્ટ્રીય હિતોનું પ્રતિનિધિત્વ કરતા ભારતીય પક્ષે સ્પષ્ટ કર્યું કે જમ્મુ-કાશ્મીર હંમેશાં ભારતનો અભિન્ન અને અવિભાજ્ય હિસ્સો રહ્યું છે અને રહેશે. પાકિસ્તાને જે ભારતીય વિસ્તારો (પાકિસ્તાન અધિકૃત કાશ્મીર - PoK) પર દાયકાઓથી ગેરકાયદે અને બળજબરીપૂર્વક કબજો જમાવી રાખ્યો છે, તેને તાકીદે ખાલી કરવો જોઈએ. સરહદ પારથી ચાલતા આતંકવાદ અને કાલ્પનિક નરેટિવથી ક્યારેય જમીની હકીકત બદલી શકાતી નથી. ભારતીય રાજદ્વારીએ પાકિસ્તાની નેતૃત્વને ખરી-ખરી સંભળાવતા કહ્યું કે તેઓ પોતાની સેના અને લશ્કરી હેડક્વાર્ટરના નિર્દેશોનું આંધળું પાલન કરવાને બદલે પોતાના દેશના નાગરિકોનું જીવનધોરણ સુધારવા પર ધ્યાન આપે, કારણ કે પાકિસ્તાનમાં આર્થિક સંકટ અને મોંઘવારી વચ્ચે સામાન્ય જનતા પીડાઈ રહી છે ત્યારે શાસકો ભારત વિરોધી ઝેર ઓકવામાં વ્યસ્ત છે.

લઘુમતીઓના રક્ષણના મુદ્દે ભારતે સ્પષ્ટ કર્યું કે 'સાર્વભૌમ સમાનતા'ના સિદ્ધાંત મુજબ લઘુમતી સમુદાયોના મૂળભૂત અધિકારોની સુરક્ષા કરવી દરેક રાષ્ટ્રની પ્રાથમિક જવાબદારી છે. ભારતના બંધારણમાં ધાર્મિક અને ભાષાકીય લઘુમતીઓની સુરક્ષા માટે અટલ જોગવાઈઓ કરાઈ છે અને વિવિધતા એ ભારતની સદીઓ જૂની સાંસ્કૃતિક ધરોહર છે, જ્યાં લઘુમતી નાગરિકો દેશના વિકાસમાં બહુમૂલ્ય યોગદાન આપીને સર્વોચ્ચ પદો પર શોભી રહ્યા છે. અગાઉ 23 ઓક્ટોબરના રોજ 'ધર્મ કે આસ્થાની સ્વતંત્રતા' પરની બેઠકમાં ભારતના પ્રથમ સચિવ ભાવિકા મંગલાનંદને એક ખાસ રિપોર્ટના પક્ષપાતી વલણ સામે આકરા વાંધાઓ ઉઠાવતા આતંકવાદીઓ સાથે સંકળાયેલા મામલાઓમાં અંતિમ સંસ્કારના અધિકારોની ચર્ચા સામે ગંભીર ચિંતા વ્યક્ત કરી આતંકવાદ સામે ઝીરો ટોલરન્સની નીતિ દોહરાવી હતી.

આ વૈશ્વિક ટકરાવ બાદ હવે આંતરરાષ્ટ્રીય સ્તરે પાકિસ્તાનની આતંકવાદી નીતિઓ અને આંતરિક અસ્થિરતાનો મુદ્દો વધુ જોરશોરથી ચર્ચામાં આવ્યો છે. આગામી સમયમાં યુએન અને અન્ય વૈશ્વિક મંચો પર ભારત દ્વારા સીમા પારના આતંકવાદ તથા માનવાધિકારોના ઉલ્લંઘન સામે દબાણ વધુ તીવ્ર બનાવવામાં આવશે, જેથી પાકિસ્તાનને તેના ગેરકાયદે કૃત્યો અને પ્રપંચોનો જવાબ આપવાની ફરજ પડી શકે.