નવી દિલ્હી, તા.૧૬: ઇસ્લામ ધર્મના સૌથી પવિત્ર સ્થળ મક્કા નજીક બનેલી એક ગંભીર ડ્રોન ઘટનાને લઈને આંતરરાષ્ટ્રીય સ્તરે ચિંતાનું મોજું ફરી વળ્યું છે. ભારતે બુધવારે મક્કા નજીક થયેલા ડ્રોન હુમલાના પ્રયાસ અંગે ઊંડી ચિંતા વ્યક્ત કરી છે અને સાઉદી અરેબિયાના સાર્વભૌમ પ્રદેશ પરના કોઈપણ પ્રકારના હુમલાઓની સખત શબ્દોમાં નિંદા કરી છે. ભારતીય વિદેશ મંત્રાલયે આ પ્રદેશમાં તાકીદે શાંતિ અને સ્થિરતા પુનઃસ્થાપિત કરવા માટે હાકલ કરી છે.

સાઉદી એર ડિફેન્સે પ્રતિબંધિત વિસ્તારમાં પ્રવેશતા જ ડ્રોન ઉડાવી દીધું

સાઉદી અરેબિયાના સત્તાવાળાઓના જણાવ્યા મુજબ, તેમની હવાઈ સંરક્ષણ પ્રણાલી (Air Defense System) એ પવિત્ર શહેર મક્કાની દક્ષિણે ઈરાન સમર્થિત હુથી વિદ્રોહીઓ દ્વારા મોકલવામાં આવેલા એક ડ્રોનને અટકાવીને હવામાં જ નષ્ટ કરી દીધું હતું. આ ડ્રોન મક્કાના પ્રતિબંધિત હવાઈ ક્ષેત્રમાં પ્રવેશે તે પહેલાં જ તેનો ખાતમો બોલાવી દેવાયો હતો. ઘટના બાદ મક્કા સહિત સાઉદી અરેબિયાના પશ્ચિમ કિનારે આવેલી મહત્વની વિશિષ્ટ જગ્યાઓ પર હાઈ એલર્ટ જાહેર કરી દેવામાં આવ્યું છે.

ભારતીય વિદેશ મંત્રાલયનું સત્તાવાર નિવેદન

વિદેશ મંત્રાલયના પ્રવક્તાએ આ ઘટના અંગે પ્રતિક્રિયા આપતાં જણાવ્યું હતું કે, "અમે મક્કા નજીક થયેલા ડ્રોન હુમલાના પ્રયાસથી ખૂબ જ ચિંતિત છીએ. ભારત સાઉદી અરેબિયાના રાજ્યના સાર્વભૌમ પ્રદેશ પરના હુમલાઓ તેમજ નિર્દોષ નાગરિકોના જીવન અને માળખાગત સુવિધાઓને જોખમમાં મૂકતી પ્રવૃત્તિઓની સખત નિંદા કરે છે. વિશ્વભરના કરોડો મુસ્લિમો માટે મક્કા શહેર અત્યંત પવિત્ર અને વિશેષ મહત્વ ધરાવે છે, તેથી આ ઘટના વધુ ચિંતાજનક છે."

હુથી વિદ્રોહીઓ અને સાઉદી વચ્ચે વધી રહેલો તણાવ

આ ઘટના સાઉદી અરેબિયા અને ઈરાન-સમર્થિત હુથી જૂથો વચ્ચે સતત વધી રહેલા લશ્કરી તણાવ વચ્ચે બની છે. તાજેતરના દિવસોમાં હુથી વિદ્રોહીઓએ સાઉદી પ્રદેશો પર હુમલાઓ તેજ કર્યા છે અને લાલ સમુદ્ર (Red Sea) માં આંતરરાષ્ટ્રીય દરિયાઈ અવરજવર માટે મોટો ખતરો ઊભો કર્યો છે. બીજી તરફ, પાકિસ્તાનના વડાપ્રધાન શાહબાઝ શરીફે પણ આ કથિત હુમલાના પ્રયાસની સખત શબ્દોમાં નિંદા કરીને તમામ પક્ષોને સંયમ જાળવવા અને કૂટનીતિ દ્વારા શાંતિ સ્થાપવા અપીલ કરી છે.