<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 16th November 2026

સુપ્રીમ કોર્ટમાં ચૂંટણી પંચ સામે I.N.D.I.A. ગઠબંધનનો નવો મોરચો: રાહુલ ગાંધીએ 48 પ્રશ્નોના જવાબ માંગ્યા

મતદાર યાદીમાં કથિત અનિયમિતતા, SIR પ્રક્રિયા, ફોર્મ 6 અને ECINET સિસ્ટમના મુદ્દે મુખ્ય ચૂંટણી કમિશનર જ્ઞાનેશ કુમાર સહિત ત્રણેય કમિશનરો પાસે સોગંદનામા પર ખુલાસો માંગતી અરજી દાખલ

નવી દિલ્હી:  દેશની ચૂંટણી પ્રક્રિયામાં પારદર્શિતા અને મતદાર યાદીમાં કથિત ગેરરીતિઓના આક્ષેપો સાથે I.N.D.I.A. ગઠબંધને હવે સુપ્રીમ કોર્ટના દ્વાર ખટખટાવ્યા છે. કોંગ્રેસ નેતા રાહુલ ગાંધી અને અન્ય અરજદારો દ્વારા દાખલ કરવામાં આવેલી આ નવી અરજીમાં મુખ્ય ચૂંટણી કમિશનર (CEC) જ્ઞાનેશ કુમાર સહિતના ચૂંટણી પંચના ઉચ્ચ અધિકારીઓ પાસેથી 48 સવાલોના જવાબ માંગવાની પરવાનગી માંગવામાં આવી છે. અરજદારોનો આક્ષેપ છે કે મતદાર યાદીઓની સ્પેશિયલ ઇન્ટેન્સિવ રિવિઝન (SIR) પ્રક્રિયા અને મતદારોના નામ ઉમેરવા કે કમી કરવાની કામગીરીમાં ગંભીર અનિયમિતતાઓ થઈ છે. અરજીમાં માંગ કરવામાં આવી છે કે દેશભરમાં SIR લાગુ કરવાનો નિર્ણય ક્યારે લેવાયો અને શું તેના પર ત્રણેય ચૂંટણી કમિશનરોની સર્વસંમતિ હતી કે કેમ, તેના સત્તાવાર રેકોર્ડ અને ફાઇલો કોર્ટ સમક્ષ રજૂ કરવામાં આવે.

અરજીમાં ચૂંટણી પંચની ડિજિટલ પ્રણાલીઓ જેવી કે ECINET અને ERONETની કાર્યપદ્ધતિ પર પણ 15 જેટલા ગંભીર ટેકનિકલ પ્રશ્નો ઉઠાવવામાં આવ્યા છે. અરજદારોએ જાણવા માંગ્યું છે કે મતદાર યાદીના ડેટામાં ફેરફાર કરવાની સત્તા કોની પાસે છે અને શું કોઈ ખાનગી કંપની કે કોન્ટ્રાક્ટરના કર્મચારીઓને પણ આ ડેટા એક્સેસ કરવાની પરવાનગી આપવામાં આવી હતી? આ ઉપરાંત, ઓનલાઈન ફોર્મ 6 માં ઉમેરવામાં આવેલી નવી ઘોષણાને કારણે કેટલી અરજીઓ નકારી કાઢવામાં આવી કે પેન્ડિંગ રાખવામાં આવી, તેનો હિસાબ પણ માંગવામાં આવ્યો છે. પશ્ચિમ બંગાળમાં ન્યાયિક અધિકારીઓ દ્વારા મતદાર યાદીમાં નામ ઉમેરવાના આદેશો સામે દાખલ કરાયેલી અપીલોની વિગતો અને તેની વર્તમાન સ્થિતિ અંગે પણ અરજદારોએ સ્પષ્ટતા માંગી છે.

આ સમગ્ર મામલે અરજદારોએ કોર્ટને વિનંતી કરી છે કે ચૂંટણી પંચના અધિકારીઓને સોગંદનામા દ્વારા જવાબ રજૂ કરવાનો નિર્દેશ આપવામાં આવે. અરજી મુજબ, કમિશનરોની વ્યક્તિગત સંમતિ કે મતભેદોને લગતા પ્રશ્નોના જવાબ ખુદ મુખ્ય ચૂંટણી કમિશનર અને અન્ય બે ચૂંટણી કમિશનરોએ આપવા જોઈએ, જ્યારે ECINET સંબંધિત ટેકનિકલ પ્રશ્નોના જવાબ ચૂંટણી પંચના ડાયરેક્ટર જનરલ  અને નાયબ ચૂંટણી કમિશનર ભાનુ પ્રકાશ યેતુરુ દ્વારા રજૂ કરવામાં આવે. અરજદારોનું માનવું છે કે ચૂંટણી પંચ પાસે આ તમામ બાબતોના સત્તાવાર રેકોર્ડ ઉપલબ્ધ હોવાથી, આ પ્રશ્નોના જવાબો સુપ્રીમ કોર્ટને સમગ્ર મામલાની વાસ્તવિકતા સમજવામાં મદદરૂપ થશે.

(7:01 PM IST)