વોશિંગ્ટન | તા. 27: અમેરિકામાં સ્થાયી થવાનું સપનું જોતા હજારો ભારતીય અને અન્ય દેશોના ઇમિગ્રન્ટ્સ માટે ચિંતાના વાદળો ઘેરાયા છે. યુએસ સિટિઝનશિપ એન્ડ ઇમિગ્રેશન સર્વિસીસ (USCIS) દ્વારા તાજેતરમાં જારી કરવામાં આવેલી નવી નીતિ (PM-602-0199) એ ગ્રીન કાર્ડ મેળવવાની પ્રક્રિયાને વધુ જટિલ બનાવી દીધી છે. હવે માત્ર કાનૂની જરૂરિયાતો પૂરી કરવી પૂરતી નથી, પરંતુ ઇમિગ્રેશન અધિકારીઓ અરજદારોના અમેરિકામાં કરેલા 'સકારાત્મક યોગદાન' અને ત્યાંના મજબૂત સંબંધોની પણ ઝીણવટભરી તપાસ કરશે. આ નવા ફેરફારોને કારણે પેન્ડિંગ અરજીઓ પર વધુ કડક સમીક્ષા અને કાગળની વધારાની જરૂરિયાતો (RFE) આવવાની શક્યતા વધી ગઈ છે.
શું બદલાયું છે?
અગાઉ, ગ્રીન કાર્ડ મેળવવા માટે મુખ્યત્વે કાનૂની પાત્રતા પર ધ્યાન આપવામાં આવતું હતું, પરંતુ નવી માર્ગદર્શિકા મુજબ અધિકારીઓને હવે અરજી મંજૂર કરવા માટે 'સકારાત્મક ઇક્વિટી' (Positive Equity) શોધવા પ્રોત્સાહિત કરવામાં આવે છે. આનો અર્થ એ છે કે અરજદારે સાબિત કરવું પડશે કે તેઓ અમેરિકા માટે કેવી રીતે મૂલ્યવાન છે. જેમાં સ્થિર રોજગાર, નિયમિત ટેક્સ ચુકવણી, શૈક્ષણિક સિદ્ધિઓ, સ્વયંસેવક કાર્યો અને લાંબા ગાળાના કાયદેસર રોકાણ જેવા પરિબળો મહત્વની ભૂમિકા ભજવશે. વકીલોના મતે, જેમની પ્રોફાઈલ ક્લીન છે, તેમને પણ હવે નજીકની તપાસનો સામનો કરવો પડી શકે છે.
વિદ્યાર્થીઓ અને પ્રવાસીઓ માટે જોખમ
આ નીતિની અસર અલગ-અલગ વિઝા શ્રેણીઓ પર અલગ રીતે પડશે. H-1B અને L-1 વિઝા ધારકો, જેઓ 'ડ્યુઅલ ઇન્ટેન્ટ' ધરાવે છે, તેઓ પ્રમાણમાં સુરક્ષિત છે. જોકે, F-1 (વિદ્યાર્થી) અને B-1/B-2 (પ્રવાસી) વિઝા ધારકો માટે મુશ્કેલી વધી શકે છે. જો અધિકારીઓને એમ લાગે કે તેમણે અમેરિકા પ્રવેશતા પહેલા જ ત્યાં કાયમી વસવાટ કરવાની યોજના બનાવી હતી, તો તેમની અરજી નકારાઈ શકે છે.
ઇમિગ્રેશન વકીલોની ખાસ સલાહ
ઘણા અરજદારો ગભરાટમાં તેમની અરજીઓ પાછી ખેંચવાનું વિચારી રહ્યા છે, પરંતુ નિષ્ણાતો તેને મોટી ભૂલ ગણાવે છે. અરજી પાછી ખેંચવાથી વર્ક પરમિટ અને મુસાફરીની પરવાનગી જેવી સુવિધાઓ છીનવાઈ શકે છે. સાથે જ, દેશ છોડીને કોન્સ્યુલર પ્રોસેસિંગ માટે જવું પણ જોખમી સાબિત થઈ શકે છે, કારણ કે ફરી પ્રવેશ વખતે ત્રણ કે દસ વર્ષના પ્રતિબંધનો સામનો કરવો પડી શકે છે.
અરજદારોએ હવે શું કરવું જોઈએ?
આ અનિશ્ચિત સમયમાં, તમામ ગ્રીન કાર્ડ અરજદારોને તેમના દસ્તાવેજો વ્યવસ્થિત રાખવાની સલાહ આપવામાં આવે છે. તેમાં ટેક્સ રિટર્ન, કાર્યનો ઇતિહાસ, શિક્ષણના પ્રમાણપત્રો અને સામાજિક યોગદાનના પુરાવાઓનો સમાવેશ થાય છે. કોઈપણ મોટો કાનૂની નિર્ણય લેતા પહેલા નિષ્ણાત વકીલની સલાહ લેવી અનિવાર્ય છે. આ નવી નીતિનો સીધો અર્થ એ છે કે ગ્રીન કાર્ડ માટેનો રાહ જોવાનો સમયગાળો હવે વધુ લાંબો થવાની પૂરેપૂરી શક્યતા છે.