ધ હેગ, તા. 17  :વડાપ્રધાન નરેન્દ્રભાઈ મોદીએ નેધરલેન્ડ્સની મુલાકાત દરમિયાન ભારતીય સમુદાયને સંબોધતા વૈશ્વિક પરિસ્થિતિ પર મોટું નિવેદન આપ્યું છે. ધ હેગ ખાતે આયોજિત પ્રવાસી ભારતીયોના કાર્યક્રમમાં PM મોદીએ કહ્યું કે જો વિશ્વમાં ચાલી રહેલી યુદ્ધની સ્થિતિ નહીં સુધરે તો તેની અસર દાયકાઓ સુધી ભારે પડશે. તેમણે વિશ્વ શાંતિ અને સ્થિરતા માટે સંવાદના માર્ગે આગળ વધવાની અપીલ કરી.

વડાપ્રધાને કહ્યું કે યુદ્ધ ક્યારેય કોઈ સમસ્યાનું સમાધાન હોઈ શકે નહીં. યુદ્ધથી માત્ર વિનાશ થાય છે અને સામાન્ય નાગરિકોને સૌથી વધુ નુકસાન સહન કરવું પડે છે. આજે વિશ્વના અનેક ભાગોમાં સંઘર્ષ ચાલી રહ્યો છે જેના કારણે વૈશ્વિક સપ્લાય ચેઇન, ખાદ્ય સુરક્ષા અને ઊર્જા ક્ષેત્રે અનિશ્ચિતતા સર્જાઈ છે. જો આ સ્થિતિ લાંબો સમય ચાલુ રહેશે તો આવનારી પેઢીઓએ પણ તેનું પરિણામ ભોગવવું પડશે.

PM મોદીએ ભારતની વિદેશ નીતિનો ઉલ્લેખ કરતા કહ્યું કે ભારત હંમેશા વસુધૈવ કુટુંબકમની ભાવનામાં માને છે. ભારત કોઈપણ વિવાદના ઉકેલ માટે સંવાદ અને કૂટનીતિના માર્ગે શાંતિની હિમાયત કરે છે. દેશનો વિકાસ થાય તે માટે વિશ્વમાં સ્થિરતા અને શાંતિનું વાતાવરણ હોવું ખૂબ જરૂરી છે. તેમણે કહ્યું કે ભારત G20 અને અન્ય આંતરરાષ્ટ્રીય મંચો પર પણ શાંતિનો સંદેશ આપતું રહ્યું છે.

નેધરલેન્ડ્સમાં વસતા ભારતીય સમુદાયની પ્રશંસા કરતા વડાપ્રધાને કહ્યું કે પ્રવાસી ભારતીયો બંને દેશો વચ્ચે સેતુનું કામ કરે છે. નેધરલેન્ડ્સ ભારતનું મહત્વનું વેપારી ભાગીદાર છે અને ટેક્નોલોજી, કૃષિ તથા વોટર મેનેજમેન્ટ ક્ષેત્રે બંને દેશો વચ્ચે સહયોગ વધી રહ્યો છે. કાર્યક્રમમાં મોટી સંખ્યામાં ભારતીય સમુદાયના લોકો ઉપસ્થિત રહ્યા હતા અને PM મોદીના સંબોધનને વધાવી લીધું હતું.