નવી દિલ્હી : વર્ષ 2024ના બહુચર્ચિત હલ્દવાની હિંસા કેસમાં ઉત્તરાખંડ સરકારને સુપ્રીમ કોર્ટ તરફથી મોટો ઝાટકો લાગ્યો છે. હિંસાના કથિત મુખ્ય સૂત્રધાર અબ્દુલ મલિકને ઉત્તરાખંડ હાઈકોર્ટ દ્વારા આપવામાં આવેલા જામીનને રદ કરવાની રાજ્ય સરકારની અરજીને સર્વોચ્ચ અદાલતે ફગાવી દીધી છે. જામીનમાં દખલ કરવાનો સ્પષ્ટ ઇનકાર કરવાની સાથે જ કોર્ટે ઉત્તરાખંડ પોલીસ અને સરકાર દ્વારા આ કેસમાં ગેરકાયદેસર પ્રવૃત્તિઓ નિવારણ અધિનિયમ (UAPA) જેવો કડક આતંકવાદ વિરોધી કાયદો લાદવા સામે અત્યંત ગંભીર સવાલો ઉઠાવ્યા છે.

મુખ્ય ન્યાયાધીશ સૂર્યકાંત, જસ્ટિસ જોયમલ્યા બાગચી અને જસ્ટિસ વી. મોહનની પીઠ સમક્ષ રાજ્ય સરકાર તરફથી દલીલ કરતા વકીલે જણાવ્યું કે અબ્દુલ મલિકે પોલીસ સ્ટેશન પર હુમલો કરાવ્યો અને જાહેર વ્યવસ્થાને જોખમમાં મૂકી હતી. આ દલીલ પર આકરું વલણ અપનાવતા જસ્ટિસ બાગચીએ પૂછ્યું, "જો કોઈ ઉત્તેજિત ટોળું જઈને પોલીસ સ્ટેશનને આગ લગાવી દે છે, તો શું તે આપોઆપ UAPA નો ગુનો બની જાય? જાહેર વ્યવસ્થા બગાડવી અને રાષ્ટ્રીય સુરક્ષાને જોખમમાં મૂકવી એ બંને વચ્ચે બહુ મોટો તફાવત છે." કોર્ટે આ કેસમાં UAPA ની કલમો ઉમેરવા પર પોતાની ભારે અસંમતિ દર્શાવી હતી.

સુપ્રીમ કોર્ટની ઉત્તરાખંડ સરકારને આકરી ફટકાર:

·         ટ્રાયલમાં વિલંબ: "જો પોલીસનું મનોબળ તૂટવું તમારી ચિંતાનો વિષય હતો, તો બે વર્ષમાં આરોપીઓને સજા કેમ ન અપાવી શક્યા? તમે કાનૂની કાર્યવાહીમાં નિષ્ફળ રહ્યા છો."

·         વ્યક્તિગત સ્વતંત્રતા: "આરોપી બે વર્ષથી કસ્ટડીમાં છે. ટેકનિકલ કારણોસર અથવા હાઈકોર્ટના આદેશની લંબાઈના આધારે વ્યક્તિગત સ્વતંત્રતા છીનવી શકાય નહીં."

ઉલ્લેખનીય છે કે 8 ફેબ્રુઆરી 2024 ના રોજ હલ્દવાનીના બનભૂલપુરામાં થયેલી હિંસા વખતે અબ્દુલ મલિક ઘટનાસ્થળે હાજર પણ નહોતો. હાઈકોર્ટે તેને જામીન આપ્યા હતા અને તેના પુત્ર સહિત અન્ય આરોપીઓને પણ અગાઉથી જામીન મળી ચૂક્યા છે. સુપ્રીમ કોર્ટે સ્પષ્ટ કર્યું કે રાજ્ય સરકાર પોતાની નિષ્ફળતા છુપાવવા માટે આકરી કલમોનો દુરુપયોગ કરી શકે નહીં.