મણિપુરના અશાંત સરહદી વિસ્તારમાં સુરક્ષા દળોને નિશાન બનાવીને ફરી એકવાર મોટો આતંકવાદી હુમલો કરવામાં આવ્યો છે. પૂર્વોત્તર ભારતના સત્તાવાર અહેવાલો મુજબ, ઉખરુલ જિલ્લામાં સોમવારે શંકાસ્પદ ઉગ્રવાદીઓએ આસામ રાઇફલ્સના કાફલા પર આઈઈડી વિસ્ફોટ અને અંધાધૂંધ ફાયરિંગ કર્યું હતું, જેમાં દેશના બે વીર જવાન શહીદ થયા છે.

મણિપુર રાજ્યના ઉખરુલ જિલ્લાના જંગલ વિસ્તારમાં દેશની આંતરિક સુરક્ષાને હચમચાવી દેનારી એક ઘટના સામે આવી છે  સવારના સમયે આસામ રાઇફલ્સની 40મી બટાલિયનનો એક સૈન્ય કાફલો પોતાની કેમ્પ સાઇટ પરથી સ્થાનિક પોલીસ સ્ટેશન તરફ નિયમિત પેટ્રોલિંગ અને વહીવટી કામ અર્થે જઈ રહ્યો હતો આ કાફલામાં સેનાના વાહનો સામેલ હતા, જેમાં જવાનો સવાર હતા.

જ્યારે કાફલો ઉખરુલ જિલ્લાના શાંગશાક નજીક આવેલા નુંગશાંગ કોંગ ગામ પાસે પહોંચ્યો, ત્યારે પૂર્વનિર્ધારિત કાવતરાના ભાગરૂપે ત્યાં છુપાઈને બેઠેલા અજ્ઞાત ઉગ્રવાદીઓએ સૈન્ય વાહનોને નિશાન બનાવ્યા હતા આ હુમલો એટલો અચાનક અને ભયાનક હતો કે જવાનોને શરૂઆતમાં સ્થિતિ સમજવાની ક્ષણો મળી નહોતી, પરંતુ સેનાએ તુરંત જ જવાબી મોરચો સંભાળી લીધો હતો.

સુરક્ષા અધિકારીઓ પાસેથી પ્રાપ્ત વિગતો અનુસાર, આતંકવાદીઓએ કાફલાના રૂટ પર આવતા એક નાના પુલના બંને છેડે વ્યૂહાત્મક રીતે ત્રણ અત્યંત શક્તિશાળી IED ગોઠવી રાખ્યા હતા. સૈન્ય કાફલાનું પ્રથમ વાહન પુલ પરથી પસાર થતાંની સાથે જ એક પછી એક બે મોટા વિસ્ફોટો થયા હતા, જેના કારણે સેનાનું એક વાહન ખરાબ રીતે ક્ષતિગ્રસ્ત થયું હતું.

વિસ્ફોટોના તુરંત બાદ આસપાસની ટેકરીઓ અને ગાઢ ઝાડીઓમાંથી આતંકીઓએ અલગ-અલગ દિશાઓથી સૈન્ય વાહનો પર અંધાધૂંધ મશીનગનથી ફાયરિંગ શરૂ કરી દીધું હતું. આસામ રાઇફલ્સના બહાદુર જવાનોએ પણ અત્યંત બહાદુરી પૂર્વક પોઝીશન લઈને વળતો પ્રહાર કર્યો હતો. બંને પક્ષો વચ્ચે ગાઢ જંગલોની મધ્યે આશરે એક કલાક સુધી ભયાનક ગોળીબાર ચાલતો રહ્યો હતો. સેનાની મજબૂત જવાબી કાર્યવાહી જોઈને આતંકીઓ ઘનઘોર જંગલોનો લાભ લઈને ભાગી છૂટ્યા હતા. બાદમાં સર્ચ ઓપરેશન દરમિયાન સેનાએ રસ્તામાંથી ત્રીજો લાઈવ આઈઈડી બોમ્બ શોધી કાઢીને તેને સુરક્ષિત રીતે ડિફ્યુઝ કર્યો હતો.

આ કાયરતાપૂર્ણ આતંકવાદી હુમલામાં સેનાના એક વાહનને મોટું નુકસાન થયું હતું, જેમાં સવાર બે જવાનો ગંભીર રીતે ઘાયલ થયા હતા શહીદ થયેલા ભારતીય સેનાના જવાનોની સત્તાવાર ઓળખ વારંટ ઓફિસર બલવંત સિંહ અને રાઇફલમેન સી.એમ. સિંહ તરીકે થઈ છે. હુમલાની તીવ્રતા એટલી વધારે હતી કે બંને જવાનોને વિસ્ફોટના સ્પ્લિન્ટર્સ અને ગોળીઓ વાગવાને કારણે ગંભીર આંતરિક ઇજાઓ પહોંચી હતી.

ગોળીબાર શાંત થયા બાદ, બાકીના જવાનોએ તુરંત જ બંને ઘાયલ સૈનિકોને પ્રાથમિક સારવાર માટે શાંગશાક સ્થિત આસામ રાઇફલ્સના બેઝ કેમ્પ હોસ્પિટલમાં ખસેડ્યા હતા. ત્યાંથી પ્રાથમિક સારવાર આપીને તેમની નાજુક સ્થિતિને કારણે લશ્કરી હેલિકોપ્ટર મારફતે હાઈટેક મેડિકલ સેન્ટરમાં મોકલવામાં આવ્યા હતા. જોકે, તબીબોના અથાગ પ્રયત્નો છતાં અતિશય રક્તસ્ત્રાવ અને ગંભીર ઇજાઓના કારણે બંને જાંબાઝ જવાનોએ સારવાર દરમિયાન દેશ માટે પોતાના પ્રાણોની આહુતિ આપી દીધી હતી. હાલમાં હુમલાખોરોની શોધ માટે આખા પૂર્વોત્તરમાં એલર્ટ જાહેર કરવામાં આવ્યું છે.

મણિપુરના મુખ્યમંત્રી યુમનામ ખેમચંદે આ આતંકી હુમલાની આકરા શબ્દોમાં નિંદા કરી છે અને શહીદ પરિવારો પ્રત્યે સંવેદના વ્યક્ત કરી છે તેમણે ઉચ્ચ સ્તરીય સુરક્ષા બેઠક બોલાવીને સ્પષ્ટ શબ્દોમાં જણાવ્યું છે કે, રાજ્ય સરકાર શાંતિના માર્ગમાં અવરોધ ઊભો કરનારી હિંસાની આવી ઘટનાઓને કોઈપણ કિંમતે સહન કરશે નહીં. તેમણે રાજ્યની જનતાને ખાતરી આપી છે કે હુમલા પાછળ જે પણ શંકાસ્પદ સંગઠનો કે આતંકીઓ સામેલ છે, તેમને વહેલી તકે શોધીને કાયદા મુજબ કડકમાં કડક સજા અપાશે.