અમદાવાદ, તા. ૧૨: સોશિયલ મીડિયા પર અત્યારે સુપ્રિયા નામની એક મહિલાની પોસ્ટ ભારે ધમાલ મચાવી રહી છે. સુપ્રિયાએ તેની કંપનીના HR વિભાગને મોકલેલા એક ઈમેલનો સ્ક્રીનશોટ શેર કર્યો છે, જેમાં તેણે રાષ્ટ્રપ્રેમના નામે ૨૦૨૭ સુધી ઓફિસ ન આવવાની અને ઘરેથી જ કામ કરવાની જાહેરાત કરી દીધી છે. આ પોસ્ટ વાયરલ થતા જ કોર્પોરેટ જગતમાં હાસ્ય અને ચર્ચાઓનું ઘોડાપૂર ઉમટ્યું છે.
શું લખ્યું છે ઈમેલમાં?
વાયરલ સ્ક્રીનશોટ મુજબ, સુપ્રિયાએ તેની HR ટીમને જાણ કરી છે કે તે ૧૦ મે, ૨૦૨૭ સુધી 'રિમોટ વર્કિંગ' એટલે કે ઘરેથી કામ કરશે. આ માટે તેણે વડાપ્રધાન નરેન્દ્ર મોદીની એ અપીલનો સહારો લીધો છે જેમાં પશ્ચિમ એશિયાના તણાવ અને તેલના વધતા ભાવો વચ્ચે નાગરિકોને ઈંધણ બચાવવા પ્રોત્સાહિત કરવામાં આવ્યા હતા. સુપ્રિયાએ ઈમેલમાં લખ્યું, "પીએમ મોદીની વિનંતી મુજબ, હું દેશહિતમાં ઈંધણ બચાવવા માટે આગામી એક વર્ષ માટે ઘરેથી કામ કરીશ. મારા દેશ માટે આ ઓછામાં ઓછું હું કરી શકું છું."
HRના કાલ્પનિક જવાબોએ જમાવી મહેફિલ
સુપ્રિયાની આ પોસ્ટ પર લોકોએ એકથી એક ચડિયાતા મીમ્સ અને રમુજી જવાબો આપ્યા છે. ખાસ કરીને યુઝર્સ એવી કલ્પના કરી રહ્યા છે કે આ ઈમેલ વાંચ્યા પછી HRની શું હાલત થઈ હશે. એક યુઝરે લખ્યું, "HR નો જવાબ હશે: પ્રિય સુપ્રિયા, તમારી દેશભક્તિ જોઈને અમે તમને પગારમાંથી પણ મુક્તિ આપી દીધી છે, હવે તમે સીધો મોદીજી પાસે પગાર માંગી શકો છો!" તો અન્ય એક યુઝરે ચેતવણી આપતા લખ્યું કે, "જોજો હોં, 'વર્ક ફ્રોમ હોમ' ક્યાંક 'પરમેનન્ટલી એટ હોમ' (બેરોજગારી) માં ન ફેરવાઈ જાય!"
કટાક્ષ કે ગંભીર મુદ્દો?
જોકે, આ પોસ્ટ પાછળ લોકોનો ઓફિસ સુધી પહોંચવા માટેનો મુસાફરીનો થાક અને ટ્રાફિકની પીડા પણ છુપાયેલી જોવા મળે છે. ઘણા યુઝર્સનું માનવું છે કે આ એક કટાક્ષભર્યો સ્ક્રીનશોટ છે જે ઓફિસ પાછા બોલાવતી કંપનીઓ સામે વિરોધ દર્શાવે છે. કોરોના બાદ શરૂ થયેલી 'વર્ક ફ્રોમ હોમ'ની સંસ્કૃતિ અને હવે ફરી શરૂ થયેલા ઓફિસના ધક્કા વચ્ચે સુપ્રિયાનો આ ઈમેલ અત્યારે સોશિયલ મીડિયા પર ટોક ઓફ ધ ટાઉન બન્યો છે.
રાષ્ટ્ર માટે યોગદાન આપવાના બહાને ૨૦૨૭ સુધીની રજા માંગી લેનારી આ મહિલાની હિંમત જોઈને નેટીઝન્સ પણ કહી રહ્યા છે કે, "બાકી સુપ્રિયાએ ખેલ તો જોરદાર પાડ્યો છે!"