શિરડી: ધર્મના નામે ધતિંગ કરનારા અને ભોળી જનતાને અંધશ્રદ્ધામાં ફસાવનારા સ્વયંભૂ બાબા અશોક ખરાટ ઉર્ફે 'કેપ્ટન બાબા'ના કાળા કરતૂતોનો ભાંડો ફૂટતા સમગ્ર પંથકમાં ભારે ચકચાર મચી ગઈ છે. ૧૫૦૦ કરોડની અઢળક સંપત્તિ અને ૧૦૦ જેટલા નકલી બેંક ખાતાઓના માલિક એવા આ પાખંડી સામે અત્યાર સુધીમાં મની લોન્ડરિંગ, નાણાકીય છેતરપિંડી અને યૌન શોષણ સહિતના ૧૩ ગંભીર ગુનાઓ દાખલ કરવામાં આવ્યા છે. ૫૮ જેટલા બિભત્સ વીડિયો અને ૧૫૦ મહિલાઓના શોષણના આક્ષેપો સાથે આ કેસમાં હવે ઈડી (ED) દ્વારા પણ સકંજો કસવામાં આવ્યો છે, જેના કારણે રાજકીય વર્તુળોમાં પણ ખળભળાટ મચી ગયો છે.

પોલીસ કસ્ટડીમાં પૂછપરછ દરમિયાન આ પાખંડી બાબાએ અત્યંત આઘાતજનક ખુલાસાઓ કર્યા છે, જેમાં તેણે પોતાની ક્રૂરતાને છુપાવવા માટે 'દૈવી શક્તિ'નો સહારો લીધો છે. ખરાટનો દાવો છે કે તેણે જે કંઈ પણ કર્યું તે બધું જ દૈવી શક્તિઓના સંકેત અને કાવતરા હેઠળ થયું હતું. તે પોલીસ સમક્ષ વારંવાર રટણ કરી રહ્યો છે કે લોકો પોતાની સમસ્યાઓ લઈને તેની પાસે આવતા હતા અને પોતે સમાધિ જેવી અવસ્થામાં હોય ત્યારે જ આ બધું થતું હતું. જોકે, તપાસ એજન્સીઓ આ વાતને માત્ર કાયદાના સકંજામાંથી બચવા માટેનું એક લુચ્ચું બહાનું ગણાવી રહી છે.

એસઆઈટી (SIT) ની પ્રાથમિક તપાસમાં એવું પણ બહાર આવ્યું છે કે ખરાટ પીડિત મહિલાઓને ઘેનની દવા અથવા કેફી દ્રવ્યો આપીને બેભાન અવસ્થામાં તેમનું શારીરિક શોષણ કરતો હતો. ધરપકડ બાદ તેની પૂછપરછમાં એ વાત પણ સામે આવી છે કે તેણે અનેક રાજકીય નેતાઓ, મંત્રીઓ અને ધારાસભ્યો સાથેના સંબંધોનો ઉપયોગ કરીને પોતાનું આ કાળા કારનામાનું સામ્રાજ્ય વિસ્તાર્યું હતું. આ કેસમાં સૌથી વળાંક ત્યારે આવ્યો જ્યારે મુખ્ય સાક્ષી જીતેન્દ્ર શેલ્કેનું રહસ્યમય સંજોગોમાં મોત થયું, જેણે આ સમગ્ર પ્રકરણને વધુ ગંભીર બનાવી દીધું છે.

આર્થિક તપાસ દરમિયાન જાણવા મળ્યું છે કે ખરાટે ૫૬ જેટલા વિશ્વાસુ લોકોના નામે ૧૦૦ થી વધુ બેંક ખાતા ખોલાવ્યા હતા અને દરેક ખાતામાં પોતે જ નોમિની તરીકે રહ્યો હતો, જેથી ૧૫૦૦ કરોડના કાળા નાણાં પર તેનો સીધો અંકુશ રહે. ૯ મેના રોજ જ્યારે તેને શિરડી કોર્ટમાં રજૂ કરવામાં આવ્યો ત્યારે કોર્ટે ગુનાની ગંભીરતાને ધ્યાનમાં રાખીને તેને ૧૪ દિવસની જ્યુડિશિયલ કસ્ટડીમાં મોકલી દીધો હતો. પોલીસ હવે એ દિશામાં તપાસ કરી રહી છે કે આ મની લોન્ડરિંગના ખેલમાં અન્ય કયા મોટા માથાઓની સંડોવણી હોઈ શકે છે.

સૂત્રોના જણાવ્યા અનુસાર, ખરાટે જ્યોતિષ અને આધ્યાત્મિક જ્ઞાનના ઓઠા હેઠળ મહિલાઓને ભોળવી હતી. તે દાવો કરતો હતો કે તેની પાસે એવી ચમત્કારિક શક્તિઓ છે જે કોઈપણ સમસ્યાનો ઉકેલ લાવી શકે છે. પીડિત મહિલાઓ જ્યારે લાચારીમાં તેની પાસે આવતી ત્યારે તે તેમની આસ્થાનો ગેરફાયદો ઉઠાવતો હતો. અત્યાર સુધીમાં જે ૧૩ કેસ નોંધાયા છે તેમાં આઠ કેસ માત્ર શારીરિક અત્યાચાર અને છેતરપિંડીના છે, જે દર્શાવે છે કે તેણે કેટલા મોટા સ્તરે માનવતાને લજવી છે.

આ કેસમાં પોલીસને મળેલા ૫૮ બિભત્સ વીડિયો સૌથી મોટા પુરાવા તરીકે જોવામાં આવી રહ્યા છે. આ વીડિયો ક્લિપ્સના આધારે તપાસ ટીમ પીડિતોની ઓળખ કરી રહી છે અને તેમને ન્યાય અપાવવા માટે કાયદાકીય કાર્યવાહી તેજ કરવામાં આવી છે. આરોપી અશોક ખરાટ હાલ જેલની હવા ખાઈ રહ્યો છે, પરંતુ તેના દ્વારા ઉભું કરવામાં આવેલું ૧૫૦૦ કરોડનું આર્થિક સામ્રાજ્ય હવે તપાસ એજન્સીઓના રડાર પર છે. શિરડી પોલીસ અને સ્પેશિયલ ઇન્વેસ્ટિગેશન ટીમ આ કેસના દરેક પાસાઓને ઉકેલવા માટે રાત-દિવસ એક કરી રહી છે.