નવી દિલ્હી : કેરળમાં ભવ્ય વિજય બાદ હવે મુખ્યમંત્રી પદના તાજ માટે કોંગ્રેસમાં ભારે રસાકસી જામી છે. દિલ્હીમાં પક્ષના રાષ્ટ્રીય અધ્યક્ષ મલ્લિકાર્જુન ખડગેના નિવાસસ્થાને મળેલી ત્રણ કલાક લાંબી બેઠકમાં કોઈ એક નામ પર સર્વસંમતિ સધાઈ શકી નથી. કેરળના તમામ નવનિર્વાચિત ધારાસભ્યોએ એક-લાઈનનો ઠરાવ પસાર કરીને અંતિમ નિર્ણય લેવાની સત્તા હાઈકમાન્ડને સોંપી દીધી છે. દીપા દાસમુન્શીએ સ્પષ્ટ કર્યું હતું કે ખડગે અને રાહુલ ગાંધી તમામ પાસાઓની ચકાસણી કર્યા બાદ ટૂંક સમયમાં મુખ્યમંત્રીના નામની સત્તાવાર જાહેરાત કરશે.

મુખ્યમંત્રી પદની રેસમાં કેસી વેણુગોપાલ, વીડી સતીસન અને રમેશ ચેન્નીથલા જેવા દિગ્ગજ નેતાઓના નામ મોખરે છે, જેને પગલે પક્ષમાં આંતરિક ખેંચતાણ તેજ બની છે. કેરળના કેટલાક વિસ્તારોમાં સમર્થકો દ્વારા રસ્તા પર ઉતરીને વિરોધ પ્રદર્શનો કરવામાં આવતા હાઈકમાન્ડ ચિંતામાં મુકાયું છે. પક્ષના નિરીક્ષકોએ સ્પષ્ટ ચેતવણી આપી છે કે શિસ્તભંગની કોઈ પણ પ્રવૃત્તિ ચલાવી લેવામાં આવશે નહીં. ૨૩ મે સુધીમાં નવી સરકારની રચના કરવાની હોવાથી આગામી ૪૮ કલાક કેરળના રાજકારણ માટે અત્યંત નિર્ણાયક માનવામાં આવી રહ્યા છે.

રાજકીય વિશ્લેષકોનું માનવું છે કે કેસી વેણુગોપાલનું રાષ્ટ્રીય કદ અને સંગઠન પરની પકડ તેમને રેસમાં આગળ રાખે છે, પરંતુ સ્થાનિક સમીકરણો સતીસન કે ચેન્નીથલા તરફ પણ ઝુકી શકે છે. દિલ્હીની આ બેઠકમાં કેરળ કોંગ્રેસના તમામ મોટા ગજાના નેતાઓ હાજર રહ્યા હતા, છતાં સત્તાનો પેચ ફસાયેલો રહ્યો છે. સમગ્ર કેરળની જનતા અને પક્ષના કાર્યકરો હવે એ જાણવા આતુર છે કે હાઈકમાન્ડ કયા નેતા પર પસંદગીનો કળશ ઢોળશે અને દક્ષિણના આ મહત્વના રાજ્યની કમાન કોને સોંપવામાં આવશે.