લંડન, તા.૨૧: યુનાઇટેડ કિંગડમ (UK) માં એર ટ્રાફિક કંટ્રોલ સિસ્ટમમાં સર્જાયેલી અચાનક ટેકનિકલ સમસ્યાને કારણે સોમવારે સ્કોટલેન્ડ, ઉત્તરી આયર્લેન્ડ અને ઉત્તરી ઇંગ્લેન્ડમાં હવાઈ સેવાઓ ગંભીર રીતે ખોરવાઈ ગઈ છે. સ્કોટલેન્ડ સ્થિત 'પ્રેસ્ટવિક સેન્ટર' (Prestwick Centre) માં ટેકનિકલ ખામી સર્જાતાં અનેક ફ્લાઇટ્સ મોડી પડી છે અને કેટલીક રદ કરવાની ફરજ પડી છે. બ્રિટનની નેશનલ એર ટ્રાફિક સર્વિસીસ (NATS) એ જણાવ્યું છે કે તેમના એન્જિનિયરો આ ખામીને જલદીથી ઉકેલવા માટે તપાસ કરી રહ્યા છે.

NATS ના જણાવ્યા અનુસાર, માન્ચેસ્ટરની દક્ષિણે આવેલા એરપોર્ટ્સ તથા લંડન તરફ જતી અને આવતી ફ્લાઇટ્સ મોટાભાગે સુરક્ષિત અને અપ્રભાવિત રહી છે, પરંતુ ઉત્તર તરફ જતાં હવાઈ માર્ગો પર ફ્લાઇટ્સના સમયપત્રક ખોરવાયા છે. નોંધનીય છે કે, માંડ બે અઠવાડિયા પહેલાં જ સોફ્ટવેર ખામીના કારણે સમગ્ર યુકેમાં ૨,૦૦૦ થી વધુ ફ્લાઇટ્સ રદ કરવી પડી હતી. જોકે, સંસ્થાએ સ્પષ્ટતા કરી છે કે આજની આ ટેકનિકલ સમસ્યા અગાઉની સોફ્ટવેર ખામી સાથે જોડાયેલી નથી.

એરલાઇન કંપની ઇઝીજેટે વ્યક્ત કર્યો ભારે રોષ

ટૂંકા ગાળામાં વારંવાર સર્જાતી આવી ટેકનિકલ નિષ્ફળતાઓને કારણે યુકેની પ્રખ્યાત એરલાઇન કંપની 'ઇઝીજેટ' (EasyJet) એ તીવ્ર નારાજગી વ્યક્ત કરી છે. ઇઝીજેટે NATS ની સિસ્ટમ ક્ષમતા (Resilience) અને કામગીરી પર સીધા સવાલો ઉઠાવતાં જણાવ્યું હતું કે, આ નવીનતમ વિક્ષેપ ફરી એકવાર સાબિત કરે છે કે આવી વારંવારની નિષ્ફળતાઓને રોકવા માટે તાત્કાલિક અને અત્યંત મજબૂત પગલાં લેવાની સખત જરૂરિયાત છે.