ન્યુ ગુરુગ્રામ, તા.૧૬: રિયલ એસ્ટેટ ક્ષેત્રે બિલ્ડરો દ્વારા મકાન ખરીદનારાઓ સાથે કરાતી મનમાની અને ડિલિવરીમાં કરાતા અસહ્ય વિલંબ સામે હરિયાણા રિયલ એસ્ટેટ રેગ્યુલેટરી ઓથોરિટી (HRERA), ગુરુગ્રામે એક ઐતિહાસિક અને આકરો ચુકાદો આપ્યો છે. ગુરુગ્રામના સેક્ટર ૮૧ માં આવેલા 'વિપુલ લાવણ્યા' પ્રોજેક્ટના ડેવલપર વિપુલ લિમિટેડને ઓથોરિટીએ સ્પષ્ટ આદેશ આપ્યો છે કે તેમણે ફ્લેટની સોંપણીમાં ૭ વર્ષથી વધુ સમયનો વિલંબ કરવા બદલ ખરીદદારોને ભારે વ્યાજ ચૂકવવું પડશે.

ઓથોરિટીએ બિલ્ડરની એ લુલી દલીલને સરેઆમ ફગાવી દીધી હતી કે જેમાં બિલ્ડરે એવો દાવો કર્યો હતો કે ફ્લેટનો કબજો સોંપતી વખતે 'સંપૂર્ણ અને અંતિમ કરાર' (Full and Final Settlement) થઈ ગયા પછી ખરીદદારો કોઈપણ પ્રકારના વધારાના વળતર કે નુકસાનીનો દાવો કરી શકતા નથી.

શું હતો સમગ્ર મામલો?
HRERA ગુરુગ્રામમાં અરુણ કુમાર સમક્ષ આ કેસ (ફરિયાદ નંબર ૩૫૧૦/૨૦૨૫) ની સુનાવણી થઈ હતી. ફરિયાદી રાજેશ ખરબંદા અને સુમન ખરબંદાએ સપ્ટેમ્બર ૨૦૧૦ માં વિપુલ લાવણ્યા પ્રોજેક્ટના ટાવર ૩ માં ૧,૭૮૦ ચોરસ ફૂટનો ફ્લેટ બુક કરાવ્યો હતો. ડિસેમ્બર ૨૦૧૦ માં થયેલા બિલ્ડર-બાયર એગ્રીમેન્ટ મુજબ બાંધકામ ૩૬ મહિનામાં પૂરું કરવાનું હતું અને ૯૦ દિવસના ગ્રેસ પીરિયડ સાથે ફ્લેટનો કબજો સોંપવાની છેલ્લી તારીખ ૫ માર્ચ, ૨૦૧૪ હતી.

ઓક્યુપેશન સર્ટિફિકેટ વગર જ સોંપી દીધો હતો કબજો!
બિલ્ડરે નિયત સમયમર્યાદા પૂરી થયાના સાત વર્ષથી પણ વધુ સમય બાદ, એટલે કે ૭ ઓક્ટોબર, ૨૦૨૧ ના રોજ ખરીદનારને માત્ર પરવાનગીના આધારે (Occupancy Certificate વગર) ફ્લેટનો કબજો આપ્યો હતો. જે તે સમયે આ ટાવર માટે અધિકૃત કબજો પ્રમાણપત્ર પણ જારી કરાયું ન હતું, જેને ઓથોરિટીએ ગંભીર બેદરકારી ગણાવી છે.

૯૦ દિવસનું અલ્ટીમેટમ અને ૧૦.૮૦% વ્યાજ
HRERA એ પોતાના ચુકાદામાં બિલ્ડર વિપુલ લિમિટેડને સ્પષ્ટ આદેશ આપ્યો છે કે વિલંબિત સમયગાળા માટે ખરીદદારોને વાર્ષિક ૧૦.૮૦% ના દરે વ્યાજ ચૂકવવામાં આવે. બિલ્ડરે આગામી ૯૦ દિવસની અંદર જ આ વ્યાજની તમામ રકમ ખરીદદારોના ખાતામાં જમા કરાવવી પડશે. આ નિર્ણયથી બિલ્ડરોના કારણે વર્ષોથી પોતાની પરસેવાની કમાણી ફસાવીને બેઠેલા હજારો ફ્લેટ ધારકોમાં આશાનું કિરણ જાગ્યું છે.