રિયાધ તા.૨૦: યમન અને સાઉદી અરેબિયામાં હૂતી વિદ્રોહીઓના હુમલાઓને કારણે તણાવ સતત વધી રહ્યો છે. છેકવું સોમવાર, ૧૯ ઓક્‍ટોબર ૨૦૨૬ના રોજ યમનના શબવા પ્રાંતમાં સરકારી સુરક્ષા દળોના એક સૈન્‍ય તાલીમ કેમ્‍પને નિશાન બનાવવામાં આવ્‍યો હતો. આ હુમલામાં અત્‍યાર સુધીમાં ૫૩ લોકોનાં મોત થયાં છે, જ્‍યારે આશરે ૨૦૦ લોકો ઘાયલ થયા છે. શરૂઆતના અહેવાલોમાં ૧૮ લોકોનાં મોતની માહિતી સામે આવી હતી, પરંતુ તાજેતરના આંકડા મુજબ મૃત્‍યુઆંક વધીને ૫૩ થયો છે.

રોયટર્સના અહેવાલ મુજબ, ઈરાન સમર્થિત હૂતી વિદ્રોહીઓએ શબવા પ્રાંતના અલ-અલમ સૈન્‍ય કેમ્‍પ પર ૩ બેલિસ્‍ટિક મિસાઈલ છોડ્‍યા હતા. હુમલો સવારે થયો હતો, જ્‍યારે સુરક્ષા દળોના જવાનો તાલીમ માટે એકત્રિત થયા હતા. હુમલામાં તાલીમ લઈ રહેલા નવા ભરતી થયેલા જવાનોને નિશાન બનાવવામાં આવ્‍યા હતા. યમનની આંતરરાષ્ટ્રીય સ્‍તરે માન્‍યતા પ્રાપ્ત સરકારને સાઉદી અરેબિયાના નેતૃત્‍વવાળા ગઠબંધનનું સમર્થન છે.

બીજી તરફ, હૂતી વિદ્રોહીઓએ રાજધાની સના સહિત દેશના ઉત્તરના મોટા વિસ્‍તારો પર નિયંત્રણ જાળવી રાખ્‍યું છે. તાજેતરના અઠવાડિયામાં બંને પક્ષો વચ્‍ચે સંઘર્ષ વધુ તીવ્ર બન્‍યો છે. ફેબ્રુઆરીના અંતમાં ઈરાન પર અમેરિકા અને ઇઝરાયેલના હુમલાઓ બાદ વકરેલા વ્‍યાપક પ્રાદેશિક સંઘર્ષની અસર પણ યમનના યુદ્ધ પર પડી રહી છે.

હૂતી વિદ્રોહીઓના હુમલાની અસર સાઉદી અરેબિયામાં પણ જોવા મળી રહી છે. રવિવારે નજ્રાન શહેરના રહેણાક વિસ્‍તારમાં એક પ્રોજેક્‍ટાઇલ પડતાં ૬ નાગરિકો ઘાયલ થયા હતા. આ ઘટનામાં ૩ મકાનો અને ૩ વાહનોને નુકસાન પહોંચ્‍યું હતું. સાઉદી અરેબિયાના સિવિલ ડિફેન્‍સના પ્રવક્‍તાએ જણાવ્‍યું હતું કે નાગરિક વિસ્‍તારોને નિશાન બનાવવાના પ્રયાસો આંતરરાષ્ટ્રીય માનવતાવાદી કાયદાનું ઉલ્‍લંઘન છે. અધિકારીઓએ જરૂરી કાર્યવાહી હાથ ધરી હતી. શહેરમાં સંભવિત જોખમને લઈને અગાઉ ચેતવણી પણ જાહેર કરવામાં આવી હતી, જોકે પાછળથી જોખમ ટળી ગયાની જાણ કરવામાં આવી હતી.

૧૫ અને ૧૬ ઓક્‍ટોબર દરમિયાન પણ હૂતી વિદ્રોહીઓએ યમનમાં મોટા હુમલા કર્યા હતા. ૧૫ ઓક્‍ટોબરે અદન સ્‍થિત અલ-માશિક રાષ્ટ્રપતિ ભવન પર ૫ મિસાઈલો છોડવામાં આવી હતી. આ હુમલામાં ૫ લોકોનાં મોત અને ૧૬ લોકો ઘાયલ થયા હતા. હુમલા સમયે યમનના વડાપ્રધાન સુરક્ષિત રહ્યા હતા. તેના બીજા દિવસે અદન આંતરરાષ્ટ્રીય એરપોર્ટ નજીક ૨ મિસાઈલો પડી હતી. જોકે, આ ઘટનામાં કોઈ જાનહાનિ થઈ નહોતી. એક જ અઠવાડિયામાં એરપોર્ટ પર આ બીજો હુમલો હતો.

સાઉદી અરેબિયાની રાજધાની રિયાધના કિગ ખાલિદ આંતરરાષ્ટ્રીય એરપોર્ટ પર પણ આ મહિને અનેક હુમલા થયા છે. સાઉદી ગઠબંધનના જણાવ્‍યા અનુસાર, એરપોર્ટ પર થયેલા હુમલાઓમાં ૧૭ લોકોનાં મોત અને ૩૩૩ લોકો ઘાયલ થયા હતા. સુરક્ષાને ધ્‍યાનમાં રાખીને એરપોર્ટની કામગીરી પણ અસ્‍થાયી રૂપે બંધ રાખવામાં આવી હતી.

આ ઉપરાંત ઢહરાનમાં સાઉદીની સરકારી તેલ કંપની સાઉદી અરામકો (Saudi Aramco)ના મુખ્‍યાલયને પણ નિશાન બનાવવામાં આવ્‍યું હતું. હૂતી વિદ્રોહીઓના વધતા હુમલાઓ વચ્‍ચે સાઉદીના નેતૃત્‍વવાળું ગઠબંધન મિસાઈલો અને ડ્રોનને હવામાં જ તોડી પાડવા ઉપરાંત જવાબી કાર્યવાહી પણ કરી રહ્યું છે. યમનમાં વધતા સંઘર્ષે સમગ્ર મધ્‍ય પૂર્વની સુરક્ષા અને સ્‍થિરતા સામે ગંભીર પડકાર ઊભો કર્યો છે.