કોલકાતા: કોરોના અને હંટાવાયરસ જેવા જીવલેણ રોગચાળાઓના ખતરા વચ્ચે હવે આફ્રિકન દેશ ડેમોક્રેટિક રિપબ્લિક ઓફ કોંગો (Congo) માંથી અત્યંત ડરામણા સમાચાર સામે આવી રહ્યા છે. કોંગોના પૂર્વીય ઇટુરી પ્રાંતમાં ઇબોલા વાયરસ (Ebola Virus Outbreak) ના એક અત્યંત ઘાતક અને અજાણ્યા સ્ટ્રેને ભયંકર તાંડવ મચાવ્યું છે. દેશના આરોગ્ય મંત્રાલય દ્વારા સત્તાવાર પુષ્ટિ કરવામાં આવી છે કે, આ જીવલેણ વાયરસના કારણે અત્યાર સુધીમાં 80 જેટલા સામાન્ય નાગરિકોના કરુણ મોત નીપજ્યા છે. આ આકસ્મિક રોગચાળાના કારણે આંતરરાષ્ટ્રીય સરહદો પર મોટો ખતરો ઊભો થતાં સમગ્ર આફ્રિકા ખંડમાં હાઈ-એલર્ટ જાહેર કરી દેવામાં આવ્યું છે.

'બુંદીબુગ્યો સ્ટ્રેન' ના પોઝિટિવ કેસોએ વધારી ચિંતા

કોંગોના આરોગ્ય પ્રધાન સેમ્યુઅલ રોજર કમ્બા મુલામ્બાએ આ અંગે ગંભીર વિગતો આપતા જણાવ્યું કે, તાજેતરમાં પ્રભાવિત વિસ્તારોમાં કરવામાં આવેલા મેડિકલ પરીક્ષણોમાં રવામ્પારા, મોંગવાલુ અને બુનિયા વિસ્તારમાં 'બુંદીબુગ્યો સ્ટ્રેન' (Bundibugyo Strain) ના આઠ નવા કેસ પોઝિટિવ આવ્યા છે. આ સ્ટ્રેન અગાઉના વાયરસ કરતાં વધુ ઝડપથી ફેલાતો હોવાનું મનાય છે. મંત્રાલયના જણાવ્યા અનુસાર, અત્યાર સુધીમાં ઇબોલાના 246 થી વધુ શંકાસ્પદ કેસ સરકારી ચોપડે નોંધાઈ ચૂક્યા છે, જેના કારણે સ્થાનિક હોસ્પિટલો દર્દીઓથી ઉભરાઈ રહી છે.

દર્દીઓની સેવા કરતાં ફ્રન્ટલાઇન નર્સનું પણ કરુણ મોત

આ ભયાનક વાયરસ એટલો ચેપી છે કે દર્દીઓની સારવાર કરી રહેલા ફ્રન્ટલાઇન મેડિકલ વર્કર્સ પણ તેની ઝપેટમાં આવી રહ્યા છે. ઇટુરી પ્રાંતની રાજધાની બુનિયાના ફેમસ ઇવેન્જેલિકલ મેડિકલ સેન્ટરમાં ફરજ બજાવતી એક સ્ટાફ નર્સનું પણ વાયરસના સંક્રમણથી કરુણ મોત નીપજ્યું છે. આ મૃતક નર્સમાં તીવ્ર તાવ, શરીરની અંદર અને બહારથી રક્તસ્રાવ (Bleeding), સતત ઉલટી અને ભારે અશક્તિ જેવા ઇબોલાના પ્રારંભિક અને ક્લાસિક લક્ષણો જોવા મળ્યા હતા. હાલમાં મોંગવાલુ અને રવામ્પારા હેલ્થ ઝોનની સ્થિતિ સૌથી વધુ નાજુક અને ચિંતાજનક હોવાનું તબીબો જણાવી રહ્યા છે.

પડોશી દેશો એલર્ટ: દક્ષિણ સુદાનમાં પબ્લિક હેલ્થ ઇમરજન્સી લાગુ

કોંગોમાં ફાટી નીકળેલા આ ભયંકર મોતના તાંડવને પગલે પડોશી દેશ દક્ષિણ સુદાન (South Sudan) અને યુગાન્ડાની સરકારો પણ યુદ્ધના ધોરણે સતર્ક થઈ ગઈ છે. દક્ષિણ સુદાનની સરકારે દેશમાં વાયરસના પ્રવેશને રોકવા માટે તાત્કાલિક અસરથી 'પબ્લિક હેલ્થ ઇમરજન્સી ઓપરેશન્સ સેન્ટર' ને સક્રિય કરી દીધું છે. કોંગોને અડીને આવેલી તમામ આંતરરાષ્ટ્રીય સરહદો પર લેબોરેટરી દેખરેખ કડક કરવામાં આવી છે અને સ્પેશિયલ મેડિકલ રિસ્પોન્સ ટીમોને ૨૪ કલાક સ્ટેન્ડબાય પર રાખવામાં આવી છે.

આફ્રિકા CDC ની તાકીદની બેઠક અને ગ્લોબલ મોનિટરિંગ

સ્થિતિ કાબૂ બહાર જાય તે પહેલાં 'આફ્રિકા સેન્ટર્સ ફોર ડિસીઝ કંટ્રોલ એન્ડ પ્રિવેન્શન' (Africa CDC) એ આ મામલાને ગ્લોબલ થ્રેટ ગણાવીને ગંભીરતા દાખવી છે. એજન્સી દ્વારા કોંગો, યુગાન્ડા અને દક્ષિણ સુદાનના આરોગ્ય વડાઓ સાથે એક ઈમરજન્સી કટોકટી બેઠક બોલાવવામાં આવી છે. આ હાઈ-લેવલ બેઠકનો મુખ્ય હેતુ દેશો વચ્ચે સરહદ પારની દેખરેખ (Cross-border surveillance) મજબૂત કરવાનો અને વૈશ્વિક આરોગ્ય સંસ્થાઓ (WHO) સાથે મળીને આ ઘાતક વાયરસને આફ્રિકાની બહાર જતા રોકવાનો છે.