મેરઠ, તા.૨૨: ઉત્તર પ્રદેશની મેરઠ જિલ્લા કોર્ટ આજે એક રણમેદાન જેવી ભાસતી હતી. ૨૦૨૫ના ચકચારી ‘બ્લુ ડ્રમ’ મર્ડર કેસના મુખ્ય આરોપીઓને જ્યારે કોર્ટમાં રજૂ કરવામાં આવ્યા, ત્યારે વાતાવરણ અત્યંત ગમગીન અને ઉત્તેજનાભર્યું બની ગયું હતું. ભૂતપૂર્વ મર્ચન્ટ નેવી ઓફિસર સૌરભ રાજપૂતની હત્યાના આરોપીઓને જોઈને તેની માતા રેણુ દેવી ન્યાયની માંગ કરતા કોર્ટની બહાર જ ફસડાઈ પડ્યા હતા.
માતાનો કલ્પાંત: “તે મારો કમાઉ દીકરો હતો”
વાયરલ થયેલા વીડિયોમાં પીડિત સૌરભની માતા રેણુ દેવીનો આક્રોશ સ્પષ્ટ દેખાય છે. તે રડતા રડતા આરોપીઓને ફાંસીની સજા આપવાની માંગ કરી રહ્યા હતા. તેમણે ચીસો પાડીને કહ્યું, “તેઓએ મારા દીકરાને મારી નાખ્યો... તે દર મહિને ૫૦,૦૦૦ રૂપિયા કમાઈને આપતો હતો. આ હત્યારાઓને જીવવાનો કોઈ હક નથી, તેમને ફાંસી જ આપવી જોઈએ.” ભારે સુરક્ષા વચ્ચે પોલીસે આરોપીઓને એસ્કોર્ટ કરવા પડ્યા હતા.
માસૂમ બાળકીને તેડીને પહોંચી કાતિલ પત્ની!
આ કેસની મુખ્ય આરોપી મુસ્કાન રાજપૂત અને તેનો કથિત પ્રેમી સાહિલ જ્યારે કોર્ટમાં આવ્યા ત્યારે દ્રશ્ય વધુ નાટકીય બન્યું હતું. મુસ્કાન તેના હાથમાં પોતાની ૬ મહિનાની માસૂમ દીકરીને તેડીને આવી હતી, અને તેનો ચહેરો ઢંકાયેલો હતો. જોકે, કોર્ટમાં બંને આરોપીઓએ પોતાના પર લાગેલા તમામ આરોપોને નકારી કાઢ્યા હતા અને મુસ્કાને દાવો કર્યો હતો કે તેને મિલકતના વિવાદમાં જાણીજોઈને ફસાવવામાં આવી રહી છે.
શું હતો આ ‘બ્લુ ડ્રમ’ હત્યાકાંડ?
માર્ચ ૨૦૨૫માં ઘટેલી આ ઘટનાએ સમગ્ર દેશને હચમચાવી દીધો હતો. તપાસકર્તાઓ મુજબ, મુસ્કાન અને તેના પ્રેમી સાહિલે સૌરભને નશો આપીને ઊંઘમાં જ રહેંસી નાખ્યો હતો. એટલું જ નહીં, પકડાઈ જવાના ડરે તેઓએ સૌરભના શરીરના ટુકડા કર્યા અને પુરાવા મિટાવવા માટે તે અવશેષોને એક વાદળી રંગના પ્લાસ્ટિકના ડ્રમમાં નાખી, તેમાં સિમેન્ટ ભરીને સીલ કરી દીધા હતા.
પ્રેમ લગ્નનો કરુણ અંજામ
સૌરભ અને મુસ્કાને ૨૦૧૬માં પ્રેમ લગ્ન કર્યા હતા, પરંતુ મુસ્કાન અને સાહિલના અફેરની જાણ સૌરભને થતા સંબંધોમાં તિરાડ પડી હતી. સૌરભ જ્યારે પોતાની પુત્રીના જન્મદિવસની ઉજવણી કરવા ઘરે આવ્યો, ત્યારે જ આ ભયાનક કાવતરું પાર પાડવામાં આવ્યું હતું. પરિવારનો આરોપ છે કે આમાં મુસ્કાનના પિયર પક્ષના લોકો પણ સામેલ છે અને પોલીસ તેમની સામે નરમ વલણ અપનાવી રહી છે.
આ કેસે ફરી એકવાર સાબિત કર્યું છે કે સંબંધોમાં આવેલી કડવાશ ક્યારેક કેટલી હદ સુધી જઈ શકે છે. હવે સૌની નજર કોર્ટના ચુકાદા પર છે.