બૈરૂત: શનિવારે પરોઢિયે દક્ષિણ લેબનાનના નબાતીહ જિલ્લાના અંસાર વિસ્તારમાં આવેલા જરાયેહ શહેરમાં ઈઝરાયલી યુદ્ધવિમાનો દ્વારા અચાનક કરાયેલા ભયાનક હવાઈ હુમલામાં સાત નિર્દોષ નાગરિકોનાં મોત થયા છે અને ત્રણ લોકો ગંભીર રીતે ઘાયલ થયા છે.

લેબનાનની નેશનલ ન્યૂઝ એજન્સીના અહેવાલ મુજબ, આ હુમલો એટલો તીવ્ર હતો કે રહેણાંક મકાન પત્તાના મહેલની જેમ ધરાશાયી થઈ ગયું હતું, જેમાં ઊંઘી રહેલા નાગરિકો કાટમાળ નીચે દટાયા હતા. ઘટનાની જાણ થતાં જ રાહત અને બચાવ ટીમો તાત્કાલિક સ્થળ પર પહોંચી ગઈ હતી અને ભારે મશીનરીની મદદથી કાટમાળ હટાવીને તમામ ઘાયલોને નબાતીહની નજીકની હોસ્પિટલોમાં ખસેડવામાં આવ્યા છે, જ્યાં કેટલાકની સ્થિતિ અત્યંત નાજુક બની રહી છે.

આ આક્રમણ ગત બે મહિના પહેલા યુએસની મધ્યસ્થતામાં બેરૂત અને તેલ અવીવ વચ્ચે થયેલા સીઝફાયર કરાર પછીનો સૌથી મોટો હવાઈ હુમલો માનવામાં આવે છે. આ કરારનો મુખ્ય ઉદ્દેશ્ય લેબનાન સરહદેથી સૈનિકોની વાપસી અને હથિયારધારી જૂથોને નિઃશસ્ત્ર કરવાનો હતો, પરંતુ તેમ છતાં ઈઝરાયલી સેના દ્વારા અવારનવાર સૈન્ય અભિયાનો અને એરસ્ટ્રાઈક ચાલુ રાખવામાં આવ્યા છે, જેના કારણે બોર્ડર પર તણાવ ચરમસીમાએ પહોંચ્યો છે.

અગાઉના સંઘર્ષો અને વર્તમાન સ્થિતિને ધ્યાનમાં લેતા આ ઘટનાએ મધ્ય પૂર્વમાં શાંતિ સ્થાપવાના તમામ પ્રયાસો સામે પ્રશ્નાર્થ ચિહ્ન ખડા કર્યા છે. સરકારી રિપોર્ટ અનુસાર આ સમગ્ર સંઘર્ષમાં અત્યાર સુધીમાં હજારો લોકોએ જીવ ગુમાવ્યા છે અને સરહદી વિસ્તારોમાં ભયનો માહોલ પ્રવર્તી રહ્યો છે, ત્યારે આગામી સમયમાં આંતરરાષ્ટ્રીય સ્તરે રાજકીય દબાણ વધવાની સંભાવના છે.