મુંબઈ, તા. ૧૪: માયાનગરી મુંબઈના અંધેરી પશ્ચિમ વિસ્તારમાં ગુરુવારે બપોરે એક હૃદયદ્રાવક અકસ્માત સર્જાયો હતો. અંધેરીના અંબોલી નાકા નજીક આઝાદ નગર મેટ્રો સ્ટેશન પાસે બેસ્ટ (BEST) ની ચાર બસો એકબીજા સાથે અથડાતા અફરાતફરી મચી ગઈ હતી. આ ભયાનક સાંકળ ટક્કરમાં માતેશ્વરી ઓપરેટર હેઠળ ફરજ બજાવતા ૫૨ વર્ષીય બસ કંડક્ટર શેખર બાબુરાવ રાવતેયનું બે બસો વચ્ચે ફસાઈ જવાથી કરૂણ મોત નીપજ્યું હતું.
 
કેવી રીતે સર્જાયો ‘મોતનો જામ’?
ઘટનાની વિગતો મુજબ, બપોરે ૧.૧૫ વાગ્યાની આસપાસ અંબોલી નાકા અને રાજકુમાર બસ સ્ટોપ વચ્ચેના રસ્તા પર અચાનક એક વિશાળ ઝાડ ધરાશાયી થયું હતું. રસ્તા પર ઝાડ પડવાને કારણે ભારે ટ્રાફિક જામ સર્જાયો હતો, જેમાં માતેશ્વરી સંચાલિત ત્રણ બસો (રૂટ નં. ૨૬૬, ૨૪૨ અને ૨૪૯) કતારબદ્ધ ઉભી હતી. આ સમયે પાછળથી પૂરપાટ ઝડપે આવી રહેલી અન્ય એક બેસ્ટ બસ (રૂટ ૨૫૧, રજીસ્ટ્રેશન નં. MH-01-FE-0620) એ બ્રેક મારવાને બદલે સ્થિર ઉભેલી બસોમાં જોરદાર ટક્કર મારી હતી.
 
બે બસો વચ્ચે કચડાયા કંડક્ટર
અકસ્માત એટલો ભયાનક હતો કે ટક્કર લાગતા જ બસો એકબીજામાં ઘૂસી ગઈ હતી. કમનસીબે, બસ નંબર ૭૭૮૩ ના કંડક્ટર શેખર રાવતેય તે સમયે બસની પાછળના ભાગે ઉભા હતા. પાછળથી આવેલી ઝડપી બસ અને આગળ ઉભેલી બસ વચ્ચે તેઓ કચડાઈ ગયા હતા. ગંભીર રીતે ઇજાગ્રસ્ત શેખરને તાત્કાલિક કૂપર હોસ્પિટલ ખસેડવામાં આવ્યા હતા, પરંતુ ડોક્ટરોએ સારવાર શરૂ કરે તે પહેલાં જ બપોરે ૧.૩૫ વાગ્યે તેમને મૃત જાહેર કર્યા હતા.
 
તંત્ર સામે ઉઠ્યા ગંભીર સવાલો
આ ઘટનાએ મુંબઈના રસ્તાઓ પર ચોમાસા દરમિયાન સર્જાતી સમસ્યાઓ અને ટ્રાફિક મેનેજમેન્ટ સામે ગંભીર સવાલો ઉભા કર્યા છે. ચાર બસો વચ્ચેની આ ટક્કરનો વીડિયો પણ સોશિયલ મીડિયા પર વાયરલ થયો છે, જે જોઈને લોકોમાં રોષ જોવા મળી રહ્યો છે. પોલીસે આ મામલે તપાસ શરૂ કરી છે કે શું પાછળથી આવતી બસની બ્રેક ફેલ થઈ હતી કે ડ્રાઈવરની બેદરકારીને કારણે આટલો મોટો અકસ્માત સર્જાયો.
શેખર રાવતેયના અવસાનથી બેસ્ટ પરિવારમાં શોકની લહેર છવાઈ ગઈ છે. પરિવહન અધિકારીઓ અને સ્થાનિક પોલીસ હવે આ અકસ્માત પાછળના ચોક્કસ કારણોની ઝીણવટભરી તપાસ કરી રહ્યા છે.