મોસ્કો :  છેલ્લા લાંબા સમયથી ચાલી રહેલા રશિયા અને યુક્રેન યુદ્ધનો અંત લાવવા માટે રાજદ્વારી સ્તરે મોટા પ્રયાસો શરૂ થયા છે. રશિયા, યુનાઇટેડ સ્ટેટ્સ (US) અને યુક્રેન વચ્ચે શાંતિ વાટાઘાટો ફરી શરૂ થવાની શક્યતા ઊભી થઈ છે. ક્રેમલિને સોમવારે જણાવ્યું હતું કે તે ત્રણેય દેશો વચ્ચે ત્રિપક્ષીય વાટાઘાટોની શક્યતાને નકારી કાઢતું નથી. ક્રેમલિને યુએસ પ્રમુખ ડોનાલ્ડ ટ્રમ્પના શાંતિ પ્રયાસોની પ્રશંસા કરતા સંકેત આપ્યા છે કે રશિયન રાષ્ટ્રપતિ વ્લાદિમીર પુતિન અને યુએસ પ્રમુખ ડોનાલ્ડ ટ્રમ્પ વચ્ચે ટૂંક સમયમાં સીધી ટેલિફોનિક વાતચીત થઈ શકે છે. જોકે, આ બેઠક કે વાટાઘાટો માટેની ચોક્કસ તારીખ અને સ્થળ હજુ નક્કી થયા નથી.

યુદ્ધ વિરામ અને શાંતિ કરાર પર પહોંચવાના પ્રયાસોના ભાગરૂપે અમેરિકાના ખાસ પ્રતિનિધિ સ્ટીવ વિટકોફ અને જેરેડ કુશનરે મોસ્કોમાં રશિયન રાષ્ટ્રપતિ વ્લાદિમીર પુતિન સાથે ૩ કલાકથી વધુ સમય સુધી ગહન ચર્ચા-વિચારણા કરી હતી. આ બેઠક બાદ બંને યુએસ રાજદૂતો યુક્રેનની રાજધાની કિવ ખાતે પહોંચ્યા છે. રશિયન આક્રમણ બાદ આ બંને યુએસ પ્રતિનિધિઓની યુક્રેનની આ પ્રથમ સત્તાવાર મુલાકાત છે, જેને યુદ્ધનો અંત લાવવા માટેના પ્રયાસોના એક નવા અને મહત્વપૂર્ણ તબક્કા તરીકે જોવામાં આવી રહી છે.

ક્રેમલિને પોતાના નિવેદનમાં જણાવ્યું છે કે રશિયા પ્રમુખ ટ્રમ્પની શાંતિ પ્રત્યેની પ્રતિબદ્ધતા માટે આભારી છે અને અમેરિકન રાજદૂતો દ્વારા કરવામાં આવી રહેલા મધ્યસ્થતાના પ્રયાસોનું સન્માન કરે છે. જોકે, ક્રેમલિને એ પણ સ્પષ્ટ કર્યું છે કે તેમને કિવ ખાતે યુએસ પ્રતિનિધિઓની ચાલી રહેલી વાટાઘાટોના સંપર્કો અંગે હજુ સુધી કોઈ સત્તાવાર વિગતો મળી નથી.

રાજદ્વારી પ્રયાસો ઝડપી બન્યા હોવા છતાં બંને પક્ષો વચ્ચે કરારની શરતોને લઈને મોટા મતભેદો અકબંધ છે. રશિયા દ્વારા માંગ કરવામાં આવી રહી છે કે યુક્રેનિયન સૈનિકો પૂર્વીય ડોનેટ્સક અને લુહાન્સ્ક પ્રદેશોના તે વિસ્તારોમાંથી પોતાના દળો પાછા ખેંચી લે જે હાલમાં યુક્રેનના નિયંત્રણ હેઠળ છે. યુક્રેને રશિયાની આ માંગણીનો અત્યાર સુધી સ્પષ્ટપણે અસ્વીકાર કર્યો છે. આમ, વાટાઘાટોનો માર્ગ મોકળો થઈ રહ્યો હોવા છતાં અંતિમ નિર્ણય સુધી પહોંચવું પડકારજનક બની રહેશે.