ભોપાલ :   મધ્યપ્રદેશ અને આંધ્રપ્રદેશ સરકારો વચ્ચે વન્યજીવનના આદાનપ્રદાન માટે એક અત્યંત મહત્વકાંક્ષી પ્રોજેક્ટ પર કામ શરૂ કરવામાં આવ્યું છે. મુખ્યમંત્રી મોહન યાદવની અધ્યક્ષતામાં મળેલી વન વિભાગની સમીક્ષા બેઠકમાં આંધ્રપ્રદેશ સરકારની વિનંતીને મંજૂરી આપવામાં આવી છે, જે અંતર્ગત મધ્યપ્રદેશ પોતાના પ્રખ્યાત વાઘ અને ગૌર (ભારતીય બાઇસન) આંધ્રપ્રદેશને દાનમાં આપશે. આ કાયદેસરની વિનિમય પ્રક્રિયાના બદલામાં આંધ્રપ્રદેશથી દુર્લભ જંગલી કૂતરા અને અન્ય વન્યજીવ પ્રજાતિઓને મધ્યપ્રદેશના જંગલોમાં લાવવામાં આવશે, જેથી બંને રાજ્યોની જૈવવિવિધતા વધુ સમૃદ્ધ બનશે.

આ મેગા પ્રોજેક્ટ હેઠળ માત્ર વાઘ જ નહીં, પરંતુ રાજસ્થાનથી લુપ્તપ્રાય પ્રજાતિ ગ્રેટ ઇન્ડિયન બસ્ટર્ડ (ગોલ્ડન ઓરિઓલ) લાવવા માટે પણ સંમતિ સધાઈ છે, જેમને ગ્વાલિયરના ઘાટીગાંવ અને મંદસૌરના ગાંધી સાગરના જંગલોના અનુકૂળ વાતાવરણમાં છોડવામાં આવશે. આ ઉપરાંત, રાજ્યમાં ચિત્તા પ્રોજેક્ટને મોટી સફળતા મળી છે અને ચિત્તાઓની કુલ સંખ્યા વધીને ૫૨ થઈ ગઈ છે. વન વિભાગના જણાવ્યા અનુસાર, મંદસૌરનું ગાંધી સાગર અભયારણ્ય ચિત્તાઓ માટે સંપૂર્ણ તૈયાર છે અને જુલાઈ ૨૦૨૬માં ત્યાં નર-માદા ચિત્તાની બે જોડી છોડાશે, જ્યારે સાગર જિલ્લાનું વીરંગણા દુર્ગાવતી અભયારણ્ય ચિત્તાઓનું ત્રીજું ઘર બનશે.

જંગલોની સુરક્ષા અને માનવ-વન્યજીવન સંઘર્ષને રોકવા માટે પણ સરકારે ઐતિહાસિક નિર્ણયો લીધા છે, જે અંતર્ગત આ સંઘર્ષને હવે "રાજ્ય આપત્તિ" જાહેર કરવામાં આવશે જેથી પોલીસ, વન વિભાગ અને SDRF સંકલન સાધી શકે. સંગઠિત વન ગુનાઓ નાબૂદ કરવા ટાઇગર સ્ટ્રાઈક ફોર્સના મોડેલ પર નવી 'રાજ્ય-સ્તરીય ટાસ્ક ફોર્સ' અને અત્યાધુનિક કમાન્ડ રૂમ બનશે. આ સાથે જ, જંગલી હાથીઓના વ્યવસ્થાપન માટે પશ્ચિમ બંગાળથી ટ્રેનિંગ મેળવીને છ હાથીઓ પર રેડિયો કોલર ફિટ કરાશે, જ્યારે અનુપપુર અને ડિંડોરીમાં ૩૦ વર્ષ બાદ દેખાયેલા 'સાલ બોરર' જીવાતના પ્રકોપ સામે લડવા માટે વિશેષ ભંડોળ મંજૂર કરવામાં આવ્યું છે.