નવી દિલ્હી : વૈવાહિક વિવાદો અને ભરણપોષણ ને લગતા એક મહત્વપૂર્ણ અને ઐતિહાસિક કેસમાં સુપ્રીમ કોર્ટે સ્પષ્ટ ચુકાદો આપ્યો છે કે જો પત્ની લગ્નેત્તર સંબંધ  માં હોય અને તેના મજબૂત પુરાવા ઉપલબ્ધ હોય, તો તે પતિ પાસેથી ભરણપોષણ મેળવવા માટે હકદાર નથી. આ કેસમાં પતિ દ્વારા રજૂ કરવામાં આવેલા ૯૨ ડિજિટલ વિડીયો અને વોટ્સએપ ચેટ્સની કાળજીપૂર્વક સમીક્ષા કર્યા બાદ સુપ્રીમ કોર્ટે નીચલી કોર્ટ અને હાઇકોર્ટના એ આદેશને રદ કરી દીધો છે, જેમાં પતિને પત્નીને ભરણપોષણ ચૂકવવાનો નિર્દેશ આપવામાં આવ્યો હતો.

ઘટનાની વિગતો મુજબ, પતિએ પોતાની પત્ની પર અન્ય પુરુષ સાથે અફેર હોવાનો આરોપ લગાવીને ભરણપોષણ આપવાનો ઇનકાર કર્યો હતો. તેની સામે પત્નીએ સીઆરપીસી (CrPC) ની કલમ ૧૨૫ હેઠળ કોર્ટના દરવાજા ખખડાવ્યા હતા. તેના જવાબમાં પતિએ ૯૨ ફોરેન્સિકલી તપાસાયેલી વિડીયો ક્લિપ્સ અને વોટ્સએપ ચેટ્સ કોર્ટમાં રજૂ કરી હતી. પ્રારંભિક તબક્કે ફેમિલી કોર્ટ અને હાઇકોર્ટે ડિજિટલ પુરાવાની તકનીકી ગ્રાહ્યતા પર શંકા વ્યક્ત કરી પત્નીના પક્ષમાં વચગાળાનું ભરણપોષણ મંજૂર કર્યું હતું. જોકે, પતિએ ભારતીય પુરાવા અધિનિયમની કલમ ૬૫B હેઠળ યોગ્ય પ્રમાણપત્ર સાથે સુપ્રીમ કોર્ટમાં અપીલ કરી હતી.

સુપ્રીમ કોર્ટે ફોરેન્સિક રિપોર્ટને ધ્યાનમાં રાખીને સ્પષ્ટ કર્યું કે જ્યારે ડિજિટલ પુરાવાઓથી પત્નીનો લગ્નેત્તર સંબંધ સીધી રીતે પુરવાર થાય છે, ત્યારે કાયદાની કલમ ૧૨૫(૪) મુજબ તેને ભરણપોષણ આપી શકાય નહીં. કાયદાકીય જોગવાઈઓ મુજબ જો પત્ની વ્યભિચારમાં જીવતી હોય, વગર કોઈ વાજબી કારણે પતિ સાથે રહેવાનો ઇનકાર કરતી હોય અથવા પરસ્પર સંમતિથી અલગ રહેતી હોય, તો તે ભરણપોષણનો દાવો કરી શકતી નથી. સુપ્રીમ કોર્ટના આ નિર્દેશથી ડિજિટલ પુરાવાઓની કાયદાકીય માન્યતા અને ૬૫B પ્રમાણપત્રના મહત્વ પર પણ મોટો પ્રકાશ પડ્યો છે.